أقر القصيدة علـى لوحـة بجـدر الزمـان=اليـوم تُقـرا وبكـرة تصـبـح الفانـيـه
فيها خيالات مـن شعـري وصـدق البيـان=وفيهـا تواصيـف مـن حسـي ووجدانيـه
سكبتها لـك بمـاي القلـب حبـر الجَنَـان=وسبكـت فيهـا حروفـي لونـهـا قانـيـه
اسمك بصدري وتشكيلـه بطـرْف اللسـان=وليـا تحـرك يعجّـل قـول يـا فلانـيـه
حتى قسـيّ الكـلام يصيـر لأجلـك لِيـان=طاريـك طـرّا مـدارج مخـرج لسانـيـه
حزمت ظهري وشديـت السفـر والحصـان=والهاجـس الصلـف قبـل الوقـت ودانيـه
المـال جسمـه قـوي لكـن رأسـه جبـان=والحـب مـا يتّقـد والــروح بردانـيـه
تثعلـب الفكـر بيـن الـجـد والألعـبـان=وانحى على ضلـع وأصطفـت لكـم حانيـه
أظمرت في خاطري إنـي كسبـت الرهـان=وا تحقـق الفـوز بالمطـلـوب وامانـيـه
صنعت لك صدر من صندوق من سيسبـان=بيديـن حاكـت هجـوس الفـن متفانـيـه
ويوم أشرق الوجه شمسه شعشعت ف المكان=ومن النواعـس غشانـي نعـس وأطمانيـه
يـا هـول حلـمٍ توقـظ شاهديـه العـيـان=القـدّ سيـفٍ تثـنـى وأبــرق أثمانـيـه
و الخصر دلّه.. وشفّـه تنبـت الزعفـران=والخـد صحـن القمـر للـدلّـه آوانـيـه
والروح منهـا يفـوح المسـك والحبهـان=والعيـن منهـا شـراب الـبُـنّ فنجانـيـه
والكف مخضوب يشهد لـي و راس البنـان=أنه دمـي .. سـال فـي كفينهـا الجانيـه
يا شوق يا عشق يا حبي له أظهـر وبـان=هذا من الحـور مـا ظنـي مـن انسانيـه
دنيـاي بعـده غـدت لـي وردة كالدهـان=كنـى بروضـة نخيـل أكمامـهـا دانـيـه
كيف أوصفك يا مليك الحسن ياحلى الحسان=الشعـر مـا يوصفـك مــرّة ولا ثانـيـه
برسمك منظر على لوحـة مـن السنديـان=وأكتـب قصيـدى بركنـك يحكـي أزمانيـه
وهاك القصيـدة وعلقهـا بصـدر الزمـان=يمكـن يجـي يـوم تقرانـي وهـي فانيـه