شبكة رواسي نجد الأدبية - عرض مشاركة واحدة

09-03-2021, 01:28 AM

حضرنا مناسبة عند ضيف الله الهواوي وفاجأنا أبو عبيد بقصيدة جزلة وغير مستغربة من أبو عبيد ترحيبية منصيها الوالد وسأقوم بتنزيل القصيدتين
يقول ناصر الهواوي

بسم الذي ماله شريكٍ ولا ند=جل وعلا شان الكريم الجوادي
يالهجس من ما يسر الله لنا جد=خل المقوَّل جب بيوتٍ جدادي
ياصل لها نقد النواقد ويرتد=رتب حروف القاف فكرٍ سدادي
نقد الفلوس اللي بصراف تنعد=ايداع دوله في رصيدٍ سيادي
تشدي لغيداً عرسها ليلة الغد=من عصر تزهم ناقشات الايادي
الليله ابرك ليل بالعمر واسعد=نعدها ثالث ليال العيادي
يامرحبا ترحيبةٍ ريحها ند=وعنبر وكمبودي امعتق وكادي
للي نوده ساقها خاطر امود=يقول شوف الربع غاية مرادي
لضيوف ضيف الله مع الطيب تنمد=لشرح الصدر مفعولها غير عادي
شروى الرجال اللي ليا وصلت الجد=يشفون غل الكبد علمٍ وكادي
مكرمين ضيوف ومنزحة ضد= ليا زلزل الميدان دبك العوادي
خيلٍ تهد حصون من صبحت هد= شهب المهار الصافنات الجيادي
وشَف الشباب لبيتٍ بعرضها لد= واشوف بعيون العواده تحادي
قاف الغزل بابه امسايف ولا سد=واخاف ادش يقال وين انت غادي
اما بنبذه عن وصف باهية خد=او عين مثلوثٍ بوقت الهدادي
ويمكن عوض لو صادفه فارع القد=عصير لاسير بوقت البرادي
دارس هجوسه لاشعاه ايتجدد=ويسعف بقافٍ في حدود المبادي
وصلوا معي بالختم على محمد=مالاح بارقها وما سال وادي

____________________________________________

وهذا رد الوالد

يـامـرحـبــا تـرحـيـبــةٍ مــالــهــا حــــــد=بـالـلـي زهـمـنــي بالـمـثـايـل يــنــادي
شاعـر بجـزل القـيـل صــاغ وتـفـرد=إنـتـاجـهـا تـصـديــر فــكـــرٍ ريـــــادي
مـن فيـض عقلـه نـاحـتٍ لــه زمــرد=من حسنها تغتاض منها الأعـادي
شـهــمٍ وأديـــب وبالمـحـافـل مـســدد=فــي كــل منـهـاج الـمـراجـل قـيــادي
جعـل المحـل عامـر وقصـره مشـيـد=مدهال لأهل الطيب حضر وبـوادي
يـــاعـــزوةٍ فــالــكــون نــــــارٍ تـــوقـــد=أرواحـهـم مــن دون قِـطْـم الـتـوادي
لامــــن وِلْــــد الــــلاش ذَل وتــراعـــد=يردون حوض الموت يوم الطرادي
يـابــو عـبـيـد الـعـمـر مـاعــاد يـنــرد=البِيض صارت فـي محـل السـوادي
امجفِّلات الصيـد لاحـن علـى الخـد=ولابــاقــي ألا عــفـــو رب الـعــبــادي
قلبي يلد خـلاف وعْـن العـرب صـد=صـارت لـي الـذكـرى شـرابـي وزادي
كم ضاق بي جولي ولاباح لي سد=لو كان حاديني من الضيق حادي
وإن قـامـت هجـوسـي علـيَّـه تـــوارد=والنفـس ملـت مــن كثـيـر القـعـادي
وصار الفضا عندي كبر راحة اليد=ونجم السويبـع بـان والوسـم بـادي
يازيـن تـل الجيـب مــع حــزمٍ أجــرد=أزور دارٍ مــانـــســـاهـــا فـــــــــــؤادي
لـو كـان أهلهـا راحـوا أقسـام وابْـدد=مـتـفـرقـيـنٍ فـــــي نـــــواح الـــبـــلادي
مــاكــل جــــرحٍ يـالــهــواوي يـضــمــد=ولاكــل طـيــر بـحــزة الـهــد صـــادي
أتعبـتـنـي مـــع درب قــــافٍ مــشــدد=يالـشـاعـر الـفـنـان والــكــل شــــادي
مايجتمـع لاهنـت فــي سـاحـة الــرد=دكـتــور قـافـيَّـة وطــالــب اعــــدادي

عبدالله الصقري ,رحيل ,الجووهره و 1 آخرون معجبون بهذا