شبكة رواسي نجد الأدبية - عرض مشاركة واحدة

14-01-2021, 12:16 AM

أهداء لمديرتنا رحيل

نامت عيون العدل والظلم وداك

لأقصى حدود الكبرياء من جنونك

سارت خطا رجلك وكبرت خطاياك

خيبت ظني فيك وخابت ظنونك

واصدرت حكمك ظلم واخلفت مبداك

حكم المؤبد في غياهب سجونك

يا أم العيون الحور وش لون ابا انساك

وش لون اعيش سنين عمرك بدونك

ان جيت ابا اسلا صاحت جروح فرقاك

يا قو هجرانك وما أقسى طعونك

صدك هلاك وتحرق القلب ذكراك

في ذمتي لو طال صدك ما أخونك

اشفق على شوفك وقربك ولاماك

وافرح لفرحك واشتقي من حزونك

باجمل وصايف مالك الملك سواك

تقصر بيوت الوصف والمدح دونك

شمس الضحى تشبه لطلة محياك

والبدر يأخذ من شعاعك ولونك

وكن الشفق يأخذ وهج حمرة اشفاك

والليل الاسود تكتسي به متونك

والخد برقٍ لى سرى يربك ارباك

زاح الظلام ولاح نوره بكونك

والعنق عنق الريم والزين يزهاك

جعل الولي من شر الانفس يصونك

يا حلو منطوقك وضحكة ثناياك

ويا حلو سلهامك بنظرة عيونك

اهيف حشا في مشيتك تقصر اخطاك

ريان عودك والدلع من فنونك

ليت الطريق اللي شهد يوم لقياك

ما جف ورده يوم شحت مزونك

فيصل بن خلف

عبدالله الصقري ,رحيل ,حمد الخالدي و 1 آخرون معجبون بهذا