شبكة رواسي نجد الأدبية - عرض مشاركة واحدة

07-11-2019, 07:38 PM

يا موتري ذب الخلا واقطع اليأس
اكرمك بالبترول و تقول عطني
ودي بشوف اللي بهم نرفع الراس
لو عنهم الحد الجنوبي ربطني
ربعٍ على ترقوة المجد جلاّس
يا موتري ماهوب حلمٍ غلطني
اليا غدا فوجيه الأبطال عوماس
أسيوفهم من فوحة الدم عِطني
يوم اذكر الماضي يج الراس لولاس
أشجع بني آدم عليه يغبطني
واليوم صار الفعل حبرٍ وقرطاس
وأنا على كل السواليف فطني
يا موتري سولف من علوم الاجناس
شعرٍ اليا مني سمعته بسطني
نوادر ابن عون و أبتوت محماس
وأبيات ابن جدلان هتّان هطني
وصوت الزلامي لاهرج كنه أجراس
لو انني مشطون ينجال شطني
ولأشعار ابن هذال هجرس تهجراس
وملفي ليا غنى الحماس اعتلطني
وحبيب يغني و مستور رمّاس
ومكيفك شغال والكشن قطني
عودتك لقطع الفلا قبل الاغلاس
لا دك هاجوس القصيد ونشطني
روهج ترا ما فوقك الا ولد ناس
راسه على كسب النواميس يطني
أنا ولد بويه وجدي على ساس
وأمي لبنها أول غذا طب بطني
يا موتري لا كثروا عيال الادناس
مع شلة الانذال لا تشترطني
أموت ما خاويت مكّار بلاّس
الي ليا قفّيت موسه لقطني
أنا خوي لباسة الجوخ والطاس
والمجد لنجوم الثريا مغطني
واليا كفخ بالريش للجو قرناس
فعلي يقلطني وحظي قلطني

عبدالله الصقري معجب بهذا