شبكة رواسي نجد الأدبية - عرض مشاركة واحدة

04-09-2019, 02:25 PM

تسليه
من أشهر قصائد شاعر الوجد والغزل الأمير عبدالله بن سبيل قصيدة الركايب

يوم الركايب عقبن خشم ابانات
ذكرت ملهوف الحشا من عنايه
ليته رديفٍ لي على الهجن هيهات
أما معي والا رديف اخويايه
اخذت لي في ماضي العمر سجات
يوم الهوى قايم وانا اتبع هوايه
يوم ان لي مع تلع الارقاب صرفات
ابيع واشري بينهن بالسعايه
الليل نجدع به وعايد وضويات
ولا خاشر الوعاد راع الضوايه
واليوم شبت وتبت عن كل ما فات
وطويت عن كل الموارد رشايه
الا الى مرت خطات الخونداة
اللي جدايلها تعدى الحضايه
اتجازي الهراج بغضاي وسكات
ولا تبين له سريره وغايه
تصد عما قال من غير مجفاه
وتعرض بخد كن فيه المرايه
طرالي الهاجوس هاجوس الافات
وعرض لي المبعد على كل رايه
ومن ظن في قلبي جروحٍ خفيات
وانا خبر ما بي سببها منايه
ساية هوى ما هي بطب المداواه
انا طبيب الروح ما بي غوايه
ما هيب بدعه يلحق الرجل شرهات
ناسٍ عدوا قدمي وناسٍ ورايه
لولاي أوسع خاطري بالتنهات
وابصر بحالي من خلاي بخلايه
لا أغدي كما المذهب وارمي بالاصوات
خبلٍ على ما قال راع الروايه
باهل الهوى من شارب الخمر شارات
وبهم من اللي يطرد الصيد شايه
شارات راع الخمر فاقه وسكرات
والصيد ولعه ما على الله كناية
ولو اتمنى لي من المال غلات
وانفد الغله واحصل منايه
مير المقل ضعيف ما فيه نوهات
وراع التمني مثل زراع طايه

عبدالله الصقري معجب بهذا