شبكة رواسي نجد الأدبية - عرض مشاركة واحدة

19-06-2019, 02:41 PM

تسليه من الخفير

الحر جانا واقتوى واهـج الصيـف
وكل(ن) نوى بالحال يهجر ديـاره
ناسٍ على لندن وناسٍ على جنيـف
لديـار مافيهـا سمـوم وحـراره
واللي مثل شرواي عاف المصاييف
يقضي مصيفـه حايـمٍ حـول داره
لاشك ماهبنا نسـوق المصاريـف
وماهوب حبٍ في حيـاة الحضـاره
لكن هوانا مع هبـوب الهفاهيـف
لاقـام يآخـذ ليلنـا مـن نهـاره
والليـل بـرده لازمٍ لـه تلاحيـف
والعصر ضلك طول ضـل المنـاره
لازان مجلاس الضحى للسواليـف
والجو راكد مـن عسايـم غبـاره
لاهوب لاحـرٍ ولامـن عواصيـف
برَد لهيب الجـو عقـب استعـاره
وسهيل فايت له ثلاثين قـد شيـف
نجمٍ طلوعـه يالسنافـي بشـاره
وطرَى علي خدٍ بذيـك المشاريـف
العـام جيتـه مخلـيٍ مـن زواره
مع ربعي اللي للجمايـل ملاهيـف
الكل منهـم فـارضٍ لـك وقـاره
نآخذ لنا سجة بذيـك المشاعيـف
أيـام نقضيهـا عسـوس ودواره
نبي على اللي في غلبها زخاريـف
من شانها دجنا السهل والوعـاره
برفقة حـرارٍ نـادرة بالتواصيـف
مافيهن اللي متلـبٍ فـي طيـاره
عوق الخرابي لاستـل بالمغاريـف
لاخذت عن طيـري وزاد انسعـاره
ثم انهزع وقلوبنـا لـه مراجيـف
وسقنـا معـه والطيـر رده وداره
وناشه بصلفـاتٍ حـدادٍ معاكيـف
ونوخ محيفٍ كاسـرٍ لـه فقـاره
أوقاتٍ أقضيها همومـي مذاليـف
لو كان يلحقنـي وراهـا خسـاره
واليوم أنا أذكرها ودمعي مذاريـف
يتـوق قلبـي للولـع والصَقـارة
من يوم حل القيض ربطة وتعليـف
ولا حولي مطراشٍ تقـول بخفـاره
ماغير أحسب كم على الطير تحذيف
وأراقب الكبـره بحـرص وحـذاره
أقـزر أيامـي بكثـر التصانيـف
مربوط ربط الطير وكنَـي جـواره
وراع الولع دايم يعشق التكاليـف
ماهوب همَـه مكسبـه والتجـارة
هذي حروفي قلتها لجـل تخفيـف
من واهـجٍ بالكبـد يوقـد بنـاره
لا قلـت زورٍ ولا فيـه تسويـف
نقيتهـا للـي يـحـب الـنـداره
وصلاة ربي عد رملٍ على السيـف
على النبي الحـق بيـن مسـاره

غزلان ,عبدالله الدّنّيش ,عبدالله الصقري و 2 آخرون معجبون بهذا