شبكة رواسي نجد الأدبية - عرض مشاركة واحدة

11-01-2019, 12:58 AM

تسليه من ألاقشر
يقول الشاعر : الكبير / عبدالله بن لويحان رحمه الله

هاضني وابدا كنيني يــــوم طبيت المنــامـــــــه
= ديــــرة مـــــا طبهـــا جدي ولا ابوى القريبي
يـــا ولي العرش منهـــا كف رجلي بالسلامــــه
= قبــل مــــا يلحق جديد العمــــر فلاَّج الطليبي
اتنحــر نجد حيث ان نجد مضبــوط كمامـــــــه
= ضابطـــه مقدم هل العوجا منزحـــة الحريبي
والله ان ركبي على هرش ومن فوقه مسامــــه
= اشهب ذيلـــــه مشلوط كن جلـــده جلـــد ذيبي
في هبايب نجد وارقى من عدامه في عدامـــــه
= شربي الما الهمج بأوطاني كما شرب الحليبي
انه اشوى من ركوب الغوص مع خطو الفدامه
= ما يحوش الليل معهم غير مقــــرود النصيبي

ويقول

شبيت واليوم شايب والهدف واحد واعرف السّلوم
مــا حب هرج القفا ولا انقل (النمّة) ولا امشي بها
ما اصادق الاّ الرجــال إلاّ يفكون الحسب واللزوم
مـــا اني بصــادق طيورٍ مـــا تعشيهــا مخاليبهـــا

ويقول الله يرحمه

شعرٍ مثل يا فاهمين التمـــــــاثيل
= كلٍ يجي شعره بحسب اقتــــداره
من عاش ينظر بالسنين المقــــابيل
= يذوق من عقب البروده حـــراره
الطيب يخلق مع قلوب الرجــاجيل
= ما هوب في بنك التجاره تجــاره
والرزق من عند الولي بالتســاهيل
= ماهوب بالقوّة ولا بالشطـــــــاره
من عاش في حيله وكذب وتهاويل
= ياسرع من عقت الطلوع انحداره
والشور ما ينفع قلوب المهــــــابيل
= كالزند وان حرّك تطاير شــراره
لو تامره بالعدل يعرض عن الميل
= بستل على رايه بربح وخســــارة
والطبع مـــــــا ينزال غيره بتبديل
= مثل الجدي مرساه ليله نهــــــاره
والحنظلة لـوهي على شاطي النيل
= زادت مرارتها القديمة مـــــراره
هذا مثل يـــــــــــا فاهمين التماثيل
= كلٍ يجي شعره بحسب اقتــــداره

محمد الـفراج ,شاعرة نجد ,الجووهره و 2 آخرون معجبون بهذا