شبكة رواسي نجد الأدبية - عرض مشاركة واحدة

25-12-2018, 11:37 PM

لا يامهنا وصار الحب غلطة عمر
غلطة عمر يامهنا مير يازينها
اللي لمغليك فالزله تدور عذر
وانت الخطايا تحرك فيك سكينها
الشوق صدري غدا لوسوم جرحه مقر
وانا البلاء يا مهنا ويني ووينها

لاتشتكي لي ياحاكم والقلوب الخضر
في هالزمن يابن عمي الله يعينها
انا عن الحب لامني نويت السفر
يردني حبي لمحبوبي بحينها
اللي غرامه مشبعني سرور وقهر
فاول سنين الغرام وتالي سنينها

اشكي لك من الجفا والوقت عيا يمر
دقايق جروحنا تمشي على هوينها
صحيح بعض المحبه للمحبين مر
والله احاسيس قلبي ترفع ايدينها
شكوى لله وانا ما عاد فيني صبر
هاللحظه اللي تونس خافقي وينها

تشكي وانا اشكي وللمقسوم وجهة نظر
اللي فصل في وقوعه بيني وبينها
غرواُ نحرها القمر في ليل خمسة عشر
والموت من رسمة الشفه ليا عينها
الفاتن اللي ملامحها تسر النظر
احبها من تغنجها ومن لينها

محبوبتي يوم اميز في بنات البشر
في جنبها الغيد لا فرقت يا شينها
الشيخه اللي تقول الخد مثل الجمر
ما ودك انها تنوش القاع رجلينها
ضامر خصر كنها جيعانة من دهر
لا والله الا غدينا من مساجينها

النوم ما شافته عيني وذقت السهر
يا الناعمه نومتك من وين تلقينها
مرت علينا الليالي بالفرح والكدر
لحظة غيابك ما كنا صدق حازينها
خلاص ما عاد نبغي للمحبة ذكر
يالحظة صدق ما كنا متمنينها

https://www.youtube.com/watch?time_c...&v=dzeLpxuFxbc