على صهوة حصان الخيال العشي سجيت=ارخي له عنانه وان جرا حيله اشده
من العصر يجري بالخيالات لين امسيت=وان حاول عن الماضي يرجعني ارده
مابه ذكريات الا على اطلالها مريت=من غرب الخليج ايلين شرقي بحر جده
مرور الكرام امرها الا بقايا بيت=بعد شوفته لولا الحيا جيبي اقده
عرفتني وحاكتني رسومه وانا حاكيت=زوايا الغرف من جاير الوقت منهده
ابكتني خشيباته وانا من بكاي ابكيت=جذوع النخل في ساحة الحوش ممتده
منزل من يفديني من اول بحي وميت= وانا افداه حتى اليوم بالروح واعده
وزينٍ لها وانا بعد غيبته ما اطريت=سواه ولا ارى بالبيض من تعتبر قده