يا غايبٍ غاب عنّي صوته وزوله=ما زال ينبض على رجواك خفاقي
لك في خفى الروح ضِعْف المملكه دوله=وحدك تعليت عرش الحب بـ اعماقي
يا طول ليلي عقب فرقاك يا طوله=صدّك ظلامي وبهجة وصلك إشراقي
عندي كلامٍ يخصّك ودّي اقوله=أبعترف بالحقيقه واكشف اوراقي
عواطفي منْك يوم ابعدت مذهوله=ما هزك الشوق ما حنّيت لعناقي
معقول صديت لالا ماهي معقوله=فعلاً تأقلمت بفراقي على فراقي
أحلام لقياك مخذوله بمأموله=وما تسر الاصحاب في هالحاله اخلاقي
في ظل سدرتنا ذيك احتاج قيلوله=تسرق عناي وشقى دنياي وارهاقي
معاك بالموقع اللي ماحدن حوله=أطفي لهيب الوله في نشوة اشواقي
أنا لو آمال قربك شبه مقتوله !!=هاقي بوصالك أمانه أنت وش هاقي
أحكام الاقدار من مولاي مقبوله !!=بس ان فقدتك عقب هالعمر وش باقي