شبكة رواسي نجد الأدبية - عرض مشاركة واحدة

27-01-2018, 12:44 AM

دنياك هاذي يابن غزاي غشاشه
وانا بعد دنيتي يالقرم جنيه
.
سريت مع عالمٍ بالقيض طراشه
من فوق حمرٍ من الزلبات عمليه
.
ما حافها الراكب المثبور شواشه
تهذل هذيل اسحمٍ بأرضٍ خلاويه
.
لالا حبال الرسن بالراس طواشه
وبطانها والحقب بالبطن مزويه
.
راحت مراح اشقرٍ صاف الثمد ناشه
ثار النهيلي عليه من الامانيه
.
من كف قرمٍ يسر البال مغباشه
منها عنود المها بالقاع مجذيه
.
يمناه بالطيب للمحتاح كداشه
باللي تفقها يصيب ونارها حيه

عيد بجاد بن شده

حي الجواب اللي قريته على الشاشه
احوال بانت وفيه احوال مخفيه

من صاحب فالقوافي كنه الباشه
يسمل قوافيه ويقنا كل منقيه

الناس في وقتنا تسعى ومعتاشه
اللي على الدين واللي معه نقديه

واحدن من الزل الاحمر يفرش فراشه
واحدن بلا عقال وعمامه وطاقيه

واحدن يدوب يجيب للورع فشفاشه
واحد يتسوح على ضلعان تركيه

والوقت هو الوقت مير الناس منداشه
والكور لاباس شده فوق ريميه

الناس ماتبكي الا من طوى فراشه
واليوم كلن يحب اللي معه ماليه

اخوك ابن غزاي
1439/5/8 الخميس

عبدالله الصقري ,ريم الفلا ,رحيل و 4 آخرون معجبون بهذا