شبكة رواسي نجد الأدبية - عرض مشاركة واحدة

27-08-2017, 02:06 AM

صدقيني العيد نفسه ما تغير من سنين
..............فرحة اطفال وتلاقي .. لمة احباب وقرايب

الاغاني والكروت وقولة ( من العايدين)
..............والتمام الشمل يوم العيد .. وانسام الهبايب

التهاني والهدايا وحب روس الوالدين
.............والمواصل .. للعمام .. وللخوال . وللنسايب

كل حاجه مثل ماهي بس انا حالف (يمين)
...............إن لا غبتي بسجل نفسي في هالعيد غايب

وارجعي بالذاكره يابنت وانتي تعرفين
.................ليه احس العيد عقبك جيته جية مصايب

ليه لطالعت ( كرت العيد ) اكفكف دمعتين
..............من ذكرت اعيادنا وايام كان الوضع طايب

اذكر اني من ( مصلى العيد) وانتي تذكرين
.................كنت اسابق خطوتيني متجه يمك وذايب

لجل اكون الشخص الاول لجل مني تسمعين
..........في صباح العيد ...جملة (كل عام احنا حبايب)

لجل نكتب خلف ( كرت العيد ) ذيك الكلمتين
........كنت اجيك بقلب طفل وطيش شاب وثقل شايب

كنت انا اعايد وحالي حال باقي العاشقين
..........وما معاي الا خفوقي وذي عيوني لك وهايب

وإنتي في (اجمل) ثيابك كاشخة والزين زين
...............تثبتين انك عجيبه غير عن كل العجايب

فرحة العيد .. بلقانا كانت اصلاً فرحتين
............مثل ضحكات الورود ومثل زخات السحايب

ما ليوم العيد طعم ومالها الذكرى حنين
.................وكل منا في مكان وكل واحد له طلايب

الرجاء في (عيد الاضحى) يمكن انك ترجعين
................ما اقول الا الله يجزي من كان السبايب

وإن رجعتي وشفتي اني في عداد الميتين
................ذا انا بوصيك حاجه قبل تنحط النصايب

طالبك .. في كل عيد .. بعد موتي.. تكتبين
...........خلف ( كرت العيد ) جملة كل عام احنا حبايب

محمد الشهري

محمد الغنامي ,رحيل ,ملكة الرواسي معجبون بهذا