ياعنك يادرب الحجاز ان كان توحيني = هديت حيل الي للاحباب مشتاق
اجرمت بي يادرب والبعد كاويني = عز الله انك بالعنى تكسر الساق
يامبعدك يادرب عن من سكن عيني = الي يتل القلب من وسط الاعماق
الي جمع جيشه علي وقام يرميني = وهد الضلوع العوج معلاق معلاق
احتل صدري وانا احييه وش فيني = من يوم شفته جاني الشوق منساق
لا ياقصيده خالده في دواويني = تكرم عن الحبر الرخيص وظهر الاوراق
ياريحه المسك يانبت الرياحيني = شايلك في جوف الحشى وسط ترياق
واليوم غاب وغيبته حيل تشقيني = توقد بقلبي جمر والجمر حراق
اليا طرالي صاحبي قمت من حيني = اخايل القبله وانا يم الاشراق
متى يحين القى بين المحبيني = ويرتاح قلبً للقى حيل تواق
ونذوق صافي حلاه امن الشفاتيني = ونقضّي الساعات في حب وعناق
ودي بلقياه مير البعد حاديني = انا اشهد ان البعد ماعاد ينطاق
يابري حالي ليا جاء الليل يمسيني = يضيق صدر العنى والدمع رقراق
دمعً نحت له خط من فوق خديني = ادري بكثر البعد تاليته فراق
ياهيه يادرب الحجاز ان كان توحيني = سألك بالله تقرب لديرة اشواق