جيتك غرامٍ به الاشواق منتشره=واستبشرت من قدومك شيبة اشواقي
ومن السعاده خفوقي غص بالعبره= ولعيونك اقبل يزف الود براقي
حتى القلم مستثير ومنتخي حبره= وناوي قصيده تعيد الروح لاوراقي
وتجبر مشاعر من الهجران منكسره= وتنعش تلاقي يخيب هقوة الهاقي
كنت احسبنك وله واشواق منتثره=وكنت احسبني بلملمها بخفاقي
وكنت احسبن الغلا بك فايضٍ نهره= ظنيت نبع الوله بالجوف دفاقي
واثر الغلا في خفوقك منكسر ظهره=عطبت نصه وناوي له على الباقي
ودم الوفا في ضميرك معلنٍ هدره=واثرك فـــ بحر القطاعه ناوي اغراقي
وكسرت خاطر حبيبٍ منكسر صبره=حبيب كان لجفاف ايامك الساقي
سقت العنا وجيتني بالجيه الغبره=جبت التجافي مع الخذلان منساقي
مالان باسي ولو خانتني الدبره=وان كل متني يفز بعزتي ساقي
وحلفت لاقتل غرامك واورده قبره= دامك نسفت العهد والغيت ميثاقي
ومن القهر قلت ابشعل داخلي جمره= تحرق غرامٍ تغلغل داخل اعماقي
ويا للاسف ماهقيت وخابت الفكره=منها انحرقت وغرامك للاسف باقي

وصوم الثلاثه عليها النفس منجبره=دامي حلفت ورهنت ابحلفي افراقي

بدر ناصر المورقي