ياسلام الله بردّه غن يالحمادي = غن دام الليل توه والبلد ممطوره
غن والمعنى معنى والسيوف احدادي = والعلم مرفوع والله ينصر المعموره

مرحبا بك يالمنادي من صميم افوادي = غن دام ان القمر فوقك يشع بنوره
البلد ممطور والاخبار جوف الرادي = والعرب راحو شراذم في عجاج الثوره

البقا والعلم عندي والشداد اشدادي = سم بالرحمن والاحداث صوت وصوره
سجل التاريخ بالهجري وبالميلادي = يزعل الغندور ولا تزعل الغندوره

الشداد اللي معك مطلوب للبغدادي = انتبه له لايشوتك مثل شوت الكوره
كان تطمع في نجادي نوخ العبادي = والامور الباقيه يا صاحبي مقدوره

يلحقك شرهه وجارك يسبرك من غادي = الله اكبر كيف صارت نيتك مقشوره
نفرق الممتاز ياعبدالله اعن العادي = لاتبين راسها ورجلينها مبتوره

الحقيقه راسها بين الاوادم بادي = والخوافي في زمانك ماهي بمستوره
سالفه والسالفه سردادي و مردادي = شايفين الحبه اللي في فم العصفوره

فوق عرجا يازميلي بارق ورعادي = لاتروح بعيد عن حيرانها المقهوره
والله انا رافضين الميل كالمعتادي = مابغينا نكتب الجمله على السبوره

فوق عرجاء يازميلي نازلين أجدادي = في طرف واد الرشاء والعبله المذكوره
رحمة الله ياجدودي محتمين ابلادي = ويسلمون عيالي اللي في حدود اشروره

السوالف جنب نار ودله وبرادي = والبحر لاهاج موجه مارحم بابوره
انت لو ناديت هادي جاك فازع هادي = جاك فازع عقب نشبت لقمه بحنجوره

خلّها ياصاحبي دام الجمل منقادي = لا تحاول تلتفت بالخطوه المعثوره
هادي بوادي وانا يا صاحبي في وادي = و البلا لن رضيت ولن زعلت السنيوره