العذر يامسجون ضمن المساجين=اليوم قصرنا معك بالزياره
في كل يوم الربع دايم قريبين=واليوم كلن مبعدن عن دياره
نجلاء تمشا عانها بالبساتين=الها على الكرنيش غاره وغاره
والشيخ ابو مشعل كبير السلاطين=العرس جاه وغادياتٍ جفاره
سرح معه برسيمٍ اخضر وكيسين=وضاع التتن والبوك والاستماره
عقب توقف موتره نقص بنزين=جاه المرور وكلبشه من نهاره
وحمد ومهره عندهم شبه تمرين=موضبين الددسن ام الغماره
ركبو عليها اليوم بين الصلاتين=واشتالو العزبه وطاسه غضاره
يبون طلحٍ منقلع حول ميتين=متمشيه والجيب مامن خساره
التيس فالصندوق معه الوراعين=وابو علي فالبر سواق طاره
وغزلان في جده تقاس الامرين=تشكي على الجدران فرقاء الاداره
وان جات تظهر خشمها يالموامين=خطرٍ يميع خشيمها من الحراره
ولا مهاوي ياعسى حضها زين=دغبوسها عينه تقادح شراره
معاقبن فيها بغسل المواعين=لارحم ابو جده ولارحم داره
واهل الجنوب بشرهم يا احمر العين=بياضهم ماينعرف من سماره
جوهم مع الظلعان قطعت شياطين=اوادمٍ مسكانهم فالجحاره
واهل الشمال مدلهين الحزينين=كلٍ من الراحه بناله عماره
صدورهم رحبه سوات الدواوين=وصغيرهم مليان شر ونعاره
وانا غداء ليلي من اليوم ليلين=عقب الحلى ذقت العناء والمراره
بقالتي راحت مع الربع الادنين=عفت المكاسب كلها والتجاره
اطق بيبان الغزاه الملاعين=تلقاني ارثع صبح في كل حاره
لاكن نويت ارتاح واوقف الدين=واسحب على خشم العميل الستاره
هذاه عذري واقبله يا احمر العين=من عقب قصرنا معك بالزياره