يابو منيف الناس معطى ومحروم = احدً عجز عنها واحد هي تجي له
دنياً تقلب ماعرفنا لها وسوم = لاشافت المسكين تشوي غليله
دنياً ربيت ابها وانا خوك مظلوم = دنياً تحني الراس ماتنحني له
كم واحدً عايش بها مابه هموم = مونس بها حر المقيظ ومقيله
وكم واحدً يشكي همومه على القوم = يبدي لهم خافيه وا عزتي له
تشمت به العدوان تضحك به رخوم = واعزتي للي شكى مايجي له
وكم واحدً عدا على الرجم مكتوم = يقنب قنيب الذيب لو هد حيله
لو هو حجاجه طلق مايعرف النوم = همه وحزنه شايله في شليله
يخفي عنى وقته لو الحال مسموم = لو زاد حمله ماعجز لايشيله
يشكي على الله فارض الحج والصوم = ربً كريمً كلنا نلتجي له
ولادامت الدنيا على الفرس والروم = قفت بهم هاك السنين الطويله
عقب الذهب وكنوزهم راحو قسوم = ومن لا يطيع الله هذا حصيله
يامشتري دنيا الفلس بأتفه السوم = تاليك يابن الناس فالمستطيله
قبرً عبوره للمخاليق محتوم = ماجنبه حتى الرسول وخليله
لاحامت الدنيا على الادمي حوم = ثم حانت الساعه وقرب رحيله
حل الفراق ودع الربع والقوم = تلقى الملك في حزته مرتكي له
ينزع حشى صدره وتوحي له فحوم = ولاخاب رجلً حط ربه وكيله
يالله يارحمن ياحي قيوم = ترحم قلوبً بالخطايا ثقيله
تغفر لعبدك لادنت حزت اللوم = لاقام كيال الخطايا يكيله
في ساعةً فيها الرجى شبه معدوم = ثنتين مال الخلق عنها بديله
يا لاهب النيران والزاد زقوم = والا تحت ظل الغصون الظليله
وختامها يالله تفرج لنا دوم = من كل ضيقً مالنا فيه حيله
وصلاة ربي عد مالاحت غيوم = على محمد ياعساه الوسيله