صوتي
سلام ياعفيف واثنيها لبوابة عفيف=ولمن يجي بوابة الجيران والجيرانيه
ترحيبةٍ دسمه اتصب لمن قراها صب كيف=ابهارها عنبر وهيل وزعفران ايرانيه
عسى القنوف اللي من الصفره لبارقها رفيف=من أطولته الى المطار اتسيِّل الوديانيه
لن اصفره من بد ضلعانه من اول لي وليف=ولو كل ضلعانه نستني ما اهقى ينسانيه
وياجعل واديه المسمى كل ما جيته امريف=وعسى غصون الطلح في واديه دايم دانيه
مربى الرشأ اللي ما أخبر له مع شواردها وصيف=يوم الليالي مسفهله والخواطر هانيه
من قبل طول الوقت يهدي للجفا باسٍ عنيف=وصدق العواطف ما تحول تسلية ورعانيه
لو ان ذات الطوق تنسى السجع بالظل الوريف=ما انسى طعم فنجاله اللي في يده قهوانيه
ياخال مشعل بلغه عني ترا سمعه ضعيف=سلام من قلبه بسود حجارته ولهانيه
والواهس اللي نط بك في قمة الضلع المنيف=تراه مثل الواهس اللي بالشعيب اشقانيه
صدى الشاعر مشعل المرشدي
عليكم السلام يابوعبيد ياعذب النزيف=نزيف نبعك بالجزال النادره دعانيه
اعز صوت افزله واجاوبه واعز ضيف=لوكان ماانت بضيف في بيتك والك مكانيه
يامرحبا ترحيبتً ماهيب باالوزن الخفيف=ترحيبتً من ثقلها تدري بها العربانيه
من كبر قدرك صوت راعيها يضيف ويستضيف=على صدى نجره وريح العود والرسلانيه
حي البناخي والطلب والشعر والطرق النضيف=اللي بعد ماقمت اعيد قرايته سرانيه
على وصوفه يستدير البال ولصدري وحيف=وعلى لحونه يستمد الفكر بالالحانيه
يابوعبيد الضلع مايسمع ولاينظر كفيف=ناديت لين اقفيت عنه وضنتي ماوحانيه
قمت اتمعن فيه واحاكيه باسلوبً طريف=وكني سمعته قال ياوجدي على زمانيه
ايام كنت بعز قدام الدركتر والرصيف=كانو هنا حولي ومن حولي عرب خلانيه
وطرا على وهزني شوقي على الغض العفيف=اللي رحل واقفا وجمرة غيبته تصلانيه
وناديت باعلا الصوت يالاصفر ترى وضعك مخيف=لاكني اوصل سلام ابوعبيد اوصانيه
واقفيت مدري وين اوجه بين ريف وبين طيف=لاكن شعوري يوم اخدمك سرني وارضانيه
مشعل المرشدي
[/quote]
[/QUOTE]
[/poem]