ياهاجسى خذنى بروس المشاريف = فى عالي ٍ يبعد عن احباب واقراب
ودي اسويلي بيوت ٍعلى الكيف = تبري خفوق ٍ بالهوا ما بعد طاب
اخايل بروق السمّاء واذكر الطيف = لعل يلمح لى مع البارق اصحاب
حبيت اسلى خاطرى دون تكليف =وابعد عن اللى شب بالقلب لهاب
بعيد عن هرج العباد الملاقيف=ان قلت بيت من خفايا الحشاء صاب
ابكي خفاء بعد القلوب المواليف=لو ان مالي عنه صده ومجناب
أناجي الخافق ببعض المحاريف =واذرف دموعي دم ما احسب له حساب
استرجع الماضى على قول ياحيف = واذكر ليال الشوق مع سيد الاحباب
واهيم مع طيف الغلا بكل توصيف = واعيش في حلمي ولو كان كذاب
واردد لحالى اعلوم وتخاريف= ياكيف صار الحب من بعد الاعجاب ؟
هذى حروف الشوق من غير تحريف= تبقى / أسيرة حلم / فى راس مرقاب