السلام عليكم احبّائي وعيدكم مبارك قبل الزحمه :)

متواضعه راجي لها القبول

الهم لا شن غاراته على الخاطر=ودكّت حصون السعد وافنت مبانيّه
وبصدرك الضيق فايض غيمه الماطر=وازهر نبات الكدر واثمر بلاويّه
والغم قايد وحزنك بالخطط شاطر=واجتمعوا بنيّة الحرب الاباديّه
وجاك القدر بالرماح القشر متْساطر= نيّاته السود لك تسبق خطاويّه
والوقت سيفه بدم الغدر يتْقاطر= والحظ يعرض من الويلات منقيّه
وظهرك قِصَمْه الزمان بحدّه الشاطر=وماعاد تقوى تشيل الحمل موليّه
وبَكْرَة عزومك غدت من هولها فاطر=وحصان صبرك لياسك رايح اضحيّه
ولا صار حاكم هواك ابليس وامشاطر=كف المنيّات في هجمه عدائيّه
وحسيت بانّك تعيش ايّامك امْخاطر=صبحك غدا عقرب وليلك غدا حيّه
في حينها ازبن حمى الله ويش له ناطر=ولوجه رب المخاليق اخلص النيّه
اسجد خضوع ومذلّه للذي فاطر=سبع السماوات واطلب عفوه وفيّه
سجدة مذلّه بها ريح الشذى العاطر=يرسل لك ابها من التيسير وسميّه
يحيي بها افراح فاقت فرحة الفاطر=من عقب ماجاه وقت الصوم صيفيّه
ياطير عطر التسابيح بسمانا طر=سبّح وصبح الامل لا ينطفي ضيّه
تغريد ذكر القدير ايوسع الخاطر=ويهدم حصون البلا وينسف مبانيّه