البال لاشال الاقاويل ماقال = والحال لاطال المحال اشتكاله
لازال شيال التهاويل حمال = مثل الجبال إشتال ما مال حاله
أفعال واقوال المهابيل تحتال= ولاطل من طال العوال لشماله
ثقال وإجزال التماثبل تنقال = وحثال منخال الحكي للزباله
أعمال وخصال الرياجيل تمثال = وعقال لجيال الفخر والاصاله
ومنزال حلال المشاكيل مدهال = ومقيال لرجال الوفاء والجماله
والحل مابين الرياجيل رحال = ولاكل رجلٍ بالقساء ينعناله
شربت من عشرة فناجيل فنجال= وألحقت عقبه يالفهيم البياله
ماكل رجل من الرياجيل رجال =الطبع ثابت في عيون الجهاله
ياخال كيال المحاصيل حيال = واموال واملاك العرب للازاله

مافات مات وعادة الوقت فوات = والفوت في بعض المواقف غبينه
يالو تعدتك المشاريه خطوات = حبل النقايد بشنبك محكمينه
الذيب مايقنب عبث فالطويلات= ولا تحرى من يجيه ويعينه
لد النظر تلقى للانظار وجهات = وللحر نظره ثاقبه في سنينه
إلزم زمام العلم والواقع إثبات = والخافي إركـد لاتبيح كنينه
ياخاطري مالك من العلم زلات = لو الدهر في ناظرك شب عينه
الصبر وجهه والحياة إتجاهات = والزند في وجه القشر قادحينه
إنشد عن اللي في دجى الليل مابات = ياكم سرى من جور بآسه وشينه
له في صميم المستحيله مهمات = ماهججه عن محزمه ناقدينه
العمر يمضي في ثواني ولحظات= والموت حوضٍ كلنا واردينه
واعمالنا في ما جنينا علامات= واللي زرعنا بالخفا حاصدينه
يلي فعايلكم عليكم مدلات = الكذب خيبه بينكم محتمينه
الى متى تنبح بروس المنيفات = وبنّك على جمر الردى محرقينه
للخبل هرج ولحمر العين وقفات = وكلٍِ مواري هيبته في جبينه
والناس فالدنيا سوات المسارات = واللي على سيده مشى خابرينه