مرت اليومين الأولين على رهف ومشاري وهم بغاية السعاده والتفاهم والإنسجام..
وماكان يعكر صفوهم إلا الآلام اللي تتعب مشاري وتسهره إلما الصباح..
وكانت رهف لماتجيه هالآلام تحاول تسيطر على نفسها إنها ماتبكي قدامه وتحاول تخفف آلامه بإنها تكون جنبه وتهديه وتعطيه أدويته وتسويله مساج خفيف..
كان كل البيت ينظر لرهف بكل احترام وتقدير لأنها ماخلت مشاري دقيقه وحده وخذت إجازة استثنائية للترم الثاني كله.. عشان تتفرغ لزوجها وتراعيه ..
كانت طول الوقت تسهر على راحته وهي اللي تشربه وتأكله وحتى تدخله الحمام وتروشه وتلبسه..
وكان دايمآ مشاري يعاتبها وينبهها إنها حامل ومو زين لها إنها تبذل مجهود كبير خاصة إنه بطنها بدا يكبر وهي بشهورها الأخيره.. لكن رهف دايمآ تطمنه وتقول إن كل الأمور ماشيه تمام..
,,,,
,,,
,,
,
,,,تحديدآ في الصاله..
كانت غرفة مشاري الجديده مليانه رجال وزوار..وأهم زائر بالنسبه للعائلة اللي هو عبدالإله...
والشغالات رايحات جايات بالقهوه والشاي..
وكانت لطيفة جالسه بالصاله مع حريم عيالها.. يسولفون ويتقهوون...
شوي ولاسمعوا بالحوش صوت صراخ حمودي وعبدالرحمن ولدتركي..
وساره وسيرين..
هنا لطيفة خافت وقالت: بسم الله وشفيهم العيال يصرخون..
منى بخوف: بسم الله.. أسماء طلي شوفي اشفيه..
,,مشت أسماء بسرعه وهي متوجهه لباب الحوش لكنها انصدمت وقالت:
أسيـــــــــل؟؟
,,دخلت أسيل الصاله وهي مي مصدقه نفسها وطايره من الفرح وقامت تسلم عالكل وتحضنه وهي تبكي وترتجف..
,,رمت نفسها أسيل عالكنب وهي فرحانه إنها رجعت لبيت أهلها..
كان الكل يناظر لأسيل باستغراب ومومصدقين إن اللي قدامهم أسيل..
كانت أسيل متغيره 360 درجه.... كانت نحفانه ومسمره ومن تحت عيونها سواد كبير ووجها أصفر وذبلان..
منى: أسيل وشرجعك يابنيتي الحين؟؟
أسيل بزعل وعصبيه: ليه ماتبيني؟؟
لطيفة: لايابنيتي اشلون ماتبيك.. بس احنا مستغربين لأننا عارفين إنه رجعتكم للرياض مي بعد أقل من شهرين..
أسيل: لا أعوذ بالله.. تبوني أقعد شهرين ماشوفكم..
إلا صح وين أبوي وأعمامي.. وغريبه عمتي دينا هنا.. شكلكم مارجعتوا جده من بعد زواجي..
,,الكل استغرب وقاموا يناظرون ببعض وحسوا إن أسيل ماعندها علم عن الحادث اللي سار لمشاري..
,,دخل فيصل وبدون ماينتبه لأسيل قال:
يمه خلي الشغالات يجون يشيلون القهوه.. [وفجأه شهق وقال] أسيــــــل؟؟
أسيل وهي تضحك: صح النوم توك تنتبه..
وتقوم أسيل وتسلم علي فيصل..
فيصل: أسيل.. وش اللي جابك؟؟
أسيل وهي متنرفزه: حلوة ذي اللي وش اللي جابك..
فيصل: لابس أنا أقصد وين رجلك معاذ؟؟
أسيل كشرت لاإراديآ وقالت بدون إهتمام: الظاهر إنه لسه بالشارع برا..
الكل باستغراب: بالشـــــــارع؟؟؟
منى: فيصل بسرعه رح دخل رجل إختك .. قبل لايزعل بسرعه..
,, وينطلق فيصل عند معاذ..
لطيفة: أسيل.. الحين تدخلين وتخلين رجلك برا..
أسيل: وشتبين أشيله على ظهري وأدخله..
من فرحتي إني وصلت بيتنا دخلت ونسيت أدخله..
,, الكل جلس يناظر بأسيل باستغراب ومو مصدقين إن أسيل تحكي عن معاذ بهالطريقه..
,,,,
,,,,
,,بغرفة مشاري..
كان معاذ جالس بين الرجال ووجهه تعبان وباين عليه ضيقة الصدر..
عبدالإله وهويتكلم بصوت واطي جدآ:
أقول تركي.. منت ملاحظ على أسيل شي يوم سلمنا عليها..
تركي: إلا والله إشلون ما ألاحظ.. وجهها تعبان وحالتها حالة..
عبدالإله: حتى معاذ شوف إشلون سرحان ومتضايق.. ويادوبك قال كلمتين على بعض..معقول كل هذا تعب السفر..
تركي: ماظنيت.. شوف إشلون حتى عبدالرحمن متضايق وطول الوقت عينه مانزلت عن معاذ..
عبدالإله: الله يستر.. معاذ وأسيل مايستاهلون إلا كل خير.. ياترى وش اللي حاصل بينهم..
***
****
*****
(في بيت أبوصالح...)
,,خلصت أثير غسيل ملابس وتوجهت لغرفتها فوق وهي تعبانه وسرحانه وشايله هموم الدنيا على راسها..
ومادرت إلا بإيد تمسك ذاعها..
أثير: بسم الله صالح..
صالح: بسم الله عليك خوفتك؟؟
أثير وهي تبلع ريقها: صالح.. وشفيك؟؟
صالح: تعالي أثير معي غرفتي أبيك..
,,دخلت أثير مع صالح غرفته وجلست على سريره وسكر صالح الباب وسحب كرسي المكتب وجلس قبالها..
أثير: صالح إشفيك؟؟
صالح: أنا بسألك وأبيك تجاوبيني بكل صراحه..
أثير بخوف: أجاوبك على وشو؟؟
صالح: أثير.. أنا ملاحظ شي غريب..
أبرار سايره لاتاكل ولاتشرب وبس نايمه ومسكره على عمرها وفي حالة برود شديده..
ومي جايبه خبر لزواجها أبدآ.. يا إنتي تشترين لها أغراض جهازها يا أمي..
وحتى لما نوريها وش شرينا.. ماتظهر أي فرحه أو حماس أبد..
إشفيها هي تعبانه..
,,سكتت أثير وهي تطالع بعيون صالح بكل خوف..
ياربي أقوله ولاما أقوله...
لازم أقوله عشان نمنع المصيبه اللي بتسير..
صالح: أثير تكلمي إشفيه..
أثير بتردد: وش ...وشفيها يعني مافيها شي..
صالح: بس أنا قلبي قارصني مو مرتاح للحاله اللي أبرار فيها..
أثير وهي تقوم: لا..لا.. أبرار مافيها إلا كل خير..
بس يمكن عشانها زعلانه إنها بتفارقنا..
,,وتقوم أثير وتطلع من الغرفة بسرعه وتترك صالح حيران ومو مقتنع بكلام أثير أبدآ..
***
****
*****
(في بيت أم عبدالرحمن..)
,,,في مجلس الرجال الرئيسي..
,,,ماكان موجود إلا عبدالرحمن ومعاذ..
عبدالرحمن وهومتضايق: لاحول ولاقوة إلا بالله..
معاذ: يعلم الله ياعمي إني ماكذبت عليك بكلمه..
أرجوك ياعمي.. أنا شاريها وأبيها ومابي أرجع أسبانيا وأباشر عملي إلا وهي معي..
أنا أحب أسيل ياعمي ومستحيل أستغني عنها..
شوف إنت وعمتي منى.. وشفي خاطرها.. ووش اللي مكدرها وقولوا لي..
عجزت معاها عجزت..
عبدالرحمن: متى بدت هالحالة معها؟؟
معاذ: بعد زواجنا بأسبوعين..
عبدالرحمن:خلاص ياولدي تطمن وهدي أعصابك وأنا وأمها وجدتها .. بنشوف وشفيها .. خلها عندنا كم يوم..
معاذ: خلاص ياعمي أنا أستأذن ... بروح أسلم على أهلي..
وانشالله كل يوم بكلمك..
عبدالرحمن: في حفظ الله إنتبه لنفسك..
,,,
,,,
,,في غرفة أم عبدالرحمن..
الساعه 11 الليل..
منى وهي مصدومه: إنا لله وإنا إليه راجعون..
عبدالرحمن: أنا الحين ماقلتلكم إلا أنتم الثنتين لأنكم الوحيدات اللي ممكن تعرفون شالسالفة بالضبط..
لطيفة:خلاص ياولدي إنت هدي قلبك وريح بالك وأنا وأمها بنمسكها ونشوف وشفيها..
يمكن في أشياء ماتقدر تقولها لك.. ويمكن ترتاح لنا أكثر وتقول اللي مضايقها..
عبدالرحمن: خلاص أنا الحين مابيكم تضايقونها أو تبينون إن فيها شي أبيكم تعاملونها.. معامله عاديه.. ولاكأن فيه شي إلين تشوفون وشفيها وقولوا لي..
لطيفة:يسير خيرروح إنت وزوجتك الحين غرفتكم ريحوا وهدوا بالكم.. والله يقدم اللي فيه الخير..
,,,
,,,
,,بغرفة مشاري..
,,الساعه 12 الليل..
مشاري بعد ما أخذ حبوب الدواء من رهف: وشفيك زعلانه..
رهف: هاه.. لاولاشي..
مشاري: إشلون ولاشي.. كل البيت مكتئب..
إنتي وأمي وأخواني ...وحتى أسيل اللي يشوفها مايقول عروس وشفيكم..
رهف وهي ماودها تضايق مشاري بسالفة أسيل: مشاري مافي شي..
مشاري:إي صح دريتي.. أبوك دق على عبدالرحمن وعزمه على زواج إختك أبرار..
رهف مصدومه:زواج أبرار!!!..
مشاري:مادق عليك؟؟
أبرار: لاوالله مادق ولاقالي..أنا سمعت من صالح إنها انخطبت بس ماقالي إن الزواج تحدد..
مشاري وهويختبر رهف: بتروحين؟؟
رهف: وين أروح؟؟
مشاري: زواج إختك...
رهف: والله إذا أبوي دق عليك وعزمك وعزمني بروح..
إذا مادق عليك إشلون أروح من غير عزيمه..
مشاري وهومرتاح من رد رهف: رهف إذا تبين تحضرين أنا ما أمنعك..
رهف بضيق: مشاري أبوي ماعزمك وشلون تبيني أروح أرز وجهي.. وأصلآ حتى لو أروح... أنا أعرف أبوي ماعنده تفاهم بيخلي أمي منيره تطردني..
مشاري: نفسي أفهم شي واحد..
ممكن الأب يسير قاسي والطمع يعمي عيونه..
بس معقوله الأم يسير فيها نفس الطبع.. وين اللي يقولون قلب الأم..
رهف وعيونها مليانه دموع قامت تضحك ضحكة استهزاء وقالت: أم..
مشاري وهويحاول يهدي رهف: خلاص يارهف لايضيق صدرك..
إذا هم مايبونك وبايعينك أنا أبيك..
وماشالله يارهف أمي لطيفة مي مقصره معك وتعاملك مثل بنتها..
رهف: إي والله .. الله يطول عمرها..ويخليها لنا..
,,شوي ولارهف تعفست ملامح وجهها وحطت يدها على بطنها وهي عاقده حواجبها..
مشاري باهتمام: وشفيــــك..
رهف: الله يهديه يرافس وهومتحمس..
مشاري وهومبسوط: على أبوه .. نشمي ..رجال..
رهف: إي والله من الناحيه هذي صدقت.. ماترتاحون إلا لما تعذبوني..
مشاري: ماعاش من يعذبك.. خليه يطلع دلوع أبوه وأمه وأوريك شغله..
رهف: ليه شبتسوي؟؟
مشاري: أبد بس بسوي شعره سبايكي..
وألبسه برمودات.. وأشتريله همر.. وأعطيه أغلى وأحدث الجوالات..
وأشتريله شارع التحليه بكبره.. عشان إذا عاكس.. ماحد يضايقه..
رهف وهي مبتسمه: لا والله تبي تفسد الولد بالدلع الزايد..
لاتشتريله ولاشي.. خليه هويعتمد على نفسه..
مشاري: براسك.. أول ماينولد.. بدخله العسكريه عشان يطلع رجال..
,,رجعت رهف كشرت ونزلت راسها تحت وهي تحس بألم شديد..
مشاري: رهف.. تبين أهلي يودونك الطوارئ..
,,وترفع راسها رهف وتبتسم وهي تكابر.. وتقول:
لاتخاف .. مافيني شي..[وتسحب يد مشاري وتحطها على بطنها وتناظر في عيون مشاري]..
,,ابتسم مشاري وناظر لرهف وقال:
سم الله عليه.. كل هذي حركته..
مستعجل يبي يطلع..
,,شوي ولامشاري يناظر ببطن رهف ويقول:
هيه إنت.. اسمعني.. ترى ياويلك ان سرت بكاي وصياح بذبحك ذبح..
خلك مثل أمك هادي..
رهف وهي تناظر لمشاري بحب: بالعكس ياليته يطلع بطيبتك وصفاء نيتك وقلبك الحنون..
مشاري: لا لا.. انشاله ياخذ أخلاقك.. وياخذ وسامتي وحلاوتي..
رهف: لاااوالله... إخس عليك يعني أنا شينه..
مشاري وهويضحك: لااااااا.. واللــــه.. موقصدي..
رهف وهي مكسور خاطرها: لا....لا تحلف.. واضح إنه قصدك..
,,جلس مشاري يتمعن بملامح رهف البريئة وهي تناظر لتحت وتلعب بخيوط المخده اللي حاطتها تحت إيدينها..وهي ساكته..
مد مشاري يده وخذ جواله وقال:
رهف.. اسمعي زين هالأغنيه .. وقولي لي رايك..
,,بلعت رهف ريقها وهي لازالت مدنقه وساكته.. ولا شوي وتسمع..
,
,
,
حقك علي إن كنت زعلان..
يابعد عمر وقلب غاليك...
برضيك مهما يكـــــــــون يا فـــلان..
حتى ولو راضي براضيــــــك...
قلبي بك مولع وحيران..
محتار مايدري بك اشفيـــك..
ويقول لك إن كان غلطان...
إرضى عليه اللــــه يخليكــــك...
عليك أنا ياشوق ولهــــان..
دايم أنا وقلبي في طاريك..
جفني يقضي الليل سهـــران..
والعين يالغالي تنـــــاديك..
إنت وأنا يازين خلان..
واجب تداريني وأداريك..
مانختلف لوكان ماكان..
ولاعاد تشفيني ولا أشفيـــــــك..
,
,
,
,,بعد ماخلصت هالأغنية اللي منزلها مشاري بجواله..
مشاري: ها اشرايك بهالأغنية؟؟
رفعت رهف راسها وناظرت بمشاري وعيونها كلها دموع وقالت:
اللــــه يا مشاري.. ياحلو كلماتها..تجنــــن..
مشاري وهومبتسم: أول مره تسمعينها؟؟
رهف وهي تمسح دموعها بأصابعها قبل لاتنزل:
لاقد سمعتها قبل.. بس مادري هالمره أحسها غير..
مشاري: هالأغنية لك يارهف...
,,ويمد مشاري يده ويمسك يد رهف ويضغط عليها ويقول:
حقك علي يارهف..
لاتزعلين علي..
يعلم الله إنك أحلى ماشافت عيني..
وينقطع لساني قبل ما أقول عنك شينه..
رهف وهي تحضن يد مشاري بيديها الثنتين:
سم الله عليك.. لاتدعي على نفسك..
أنا موزعلانه... أزعل من نفسي ولا أزعل منك..
مشاري: رهف... ودي أقولك شي..
رهف: قول؟؟
مشاري: عمري ماتوقعت الحب حلو لهالدرجه؟؟
,,تنحت رهف وجلست تطالع بعيون مشاري وهي بتطير من الفرح ومومصدقه إن مشاري يقول هالحكي..
مشاري: كل ما أتذكر إني فكرت أضيعك من إيدي أكثر من مره..
ألوم نفسي وأقول قد إيش أنا غبي..
وكل ما أتذكر قد إيش قلبي كان قاسي عليك.. وأرتاح لاجرحتك وضايقتك..
أحس نفسي وحش.. مو إنسان..
رهف برجاء: مشاري.. الله يخليك..
إنسى كل اللي فات.. وخلنا نبدأ حياة جديدة..
حياة إحنا الإثنين نرتاح فيها.. ماحد يجرح الثاني بقصد..
مشاري: رهف.. أبي أفهم شي واحد بس .. وش اللي جابرك طول الأيام اللي فاتت تصبرين علي وتستحمليني...
,,انصدمت رهف من سؤال مشاري وقالت:
مشاري.. مارح أكذب عليك وأقولك إن طول الفترة اللي فاتت كنت أحبك..
بالعكس..مرت علي أوقات كرهتك فيها.. لأنك كنت في قمة القسوه معي..
بس أرجع يامشاري لأرض الواقع وأعرف إن مالي بهالدنيا غيرك..
ممكن تقول إني مصلحجيه.. وصبرت عليك عشان مصلحتي وما أرجع أذل نفسي لأبوي اللي طردني..
بس في أوقات لما أتضايق منك وأبي أصرخ بوجهك وأقول كفاية..
أرجع أهدي نفسي وأقول يمكن الله يغرس بقلبك لو شي بسيط من مقدار الحب اللي بقلبي لك..
والحمد الله يامشاري.. أملي ماخاب..
الله لايخليني منـــــك..
مشاري وهو يتنهد: آآآآه... ليت هالحادث سايرلي من أول يوم من زواجنا..
رهف: بسم الله عليك.. مشاري اشهالحكي؟؟
مشاري: لأني ماحسيت بقيمتك وعرفت قدرك إلا بعد ماتكسرت..
,, بعد هالتعليق.. تموا مشاري ورهف يضحكون ويسولفون بكل حب وود وتفاهم وهدوء..
,,,,
,,,,
,,اليوم اللي بعده..
,,,بغرفة أسيــــل...
,,,الساعه 6 المغرب...
كانت منى جالسه على كرسي الكمدينه وضامه يدها اليسار على بطنها وحاطه يدها اليمين على فمها ودموعها تنزل على خدودها غصبن عنها..
ولطيفة جالسه عالسرير ووجها أحمر وضامه بين إيدينها الثنتين أسيل اللي كانت منهاره تبكي وترتجف بطريقه غريبه وتتأوه..
لطيفة:يابنيتي بس حرام كذا تخرب حياتكم من غير سبب..
أسيل: مادري..مادري.. بس اللي أعرفه شي واحد إني ما أبيه.. مابيــــــــــه
طلقوني منه طلقــــــــــوني..
لطيفة: يابنيتي مابعد خلصتوا شهر واشلون تطلبين الطلاق؟؟
وبعدين الولد مسكين متعذب وتعبان وبيموت وترجعين طبيعيه مثل أول معه..
أسيل: جده تكفين ياجده تكفيــــــن..
إذا تحبيني لاترجعوني عنده .. تكفيـــن..
لطيفة: أسيل أناجدتك.. لاتخبين علي..
قوليلي..قد سار بينكم شي موبزين ... ولاقد شفتيه يشرب ولايتعاطى شي..
ولااعترف لك بشي.. ولاضايقك بشي.. ولامد يده..
أسيل:هذا اللي ذابحني..
إنه فحياته ماضايقني أو عاملني معامله سيئه..
بالعكس..يدور خاطري ويعاملني أحسن معامله..
بس ياجده غصبن عني.. غصبن عني..
موطايقته.. أحس إني لاشفته.. كني شايفه جني..
وإذا قرب مني أحس بجسمي زي نغزات الدبابيس.. وإحس الدنيا سوداء بعيني..
,,بعد ماقالت أسيل هالكلام.. طالعت لطيفه بمنى ورجعت طالعت بأسيل وقالتلها:
خلاص يا بنيتي.. إنتي الحين نامي وريحي..
وانشالله مايسير إلا كل خير..
أسيل وهي تطالع بجدتها برجاء:ها ياجده..بتطلقوني..خلاص بتطلقوني..
تكفين ياجده تكفييين..
لطيفه وقلبها بيتقطع:خلاص يا أسيل ..خلاص..إرتاحي وموبصاير إلا اللي تبينه..
,,وغطت لطيفه أسيل اللي حضنت مخدتها وتمددت على السرير..
لطيفه وهي تقوم: منى.. نادي عبدالرحمن وتعالي إنتي وياه غرفتي أبيكم..
,,,,
,,,,
,,بغرفة لطيفه..
بعد مادخل عبدالرحمن وزوجته وجلسوا قبال لطيفه..
لطيفه: شوف ياعبدالرحمن..
الحاله اللي أسيل فيها.. ماتفسر إلا بشي واحد..
أسيل فيها عيون قويه.. فرقت بينها وبين زوجها..
منى وهي مي مستوعبه: عيـــــن؟؟ لامومعقول..
لطيفه: وليه مومعقول.. العين حق..
والرسول عليه الصلاة والسلام قال(نصف قبوركم من عيونكم)
ولاتنسون يوم زواجها البنت وشطلعت.. ملكة جمال..
والكل يوم شافها يتهول من جمالها وزينها.. والعيشه اللي بتعيشها..
وأسيل من يوم هي بزر وهي عايشه عيشة ملوك..
وتزوجت واحد كل بنات الناس يتمنونه..
وكل هذا وتقولين يامنى مومعقول..
البنت ماتشكي من شي بجسمها صحتها سليمه ويوم قعدت معنا هاليومين استردت عافيتها وسارت تاكل وتسولف وتضحك..
وبس تجي سيرة رجلها تختبص وتتكدر..
عبدالرحمن بألم: طب شالسواه يمه.؟؟
لطيفه: من بكره ناخذها ونوديها عند شيخ يقرأ عليها..
ويشوف البنت وشفيها بالضبط..
إن وديناها عند الشيخ وقال إنه مافيها شي ..اعرفوا إن بنتكم تتدلع..
لكن إن وديناها وشافها وقال البنت فيها شي..
خلاص نستمر نوديها عند الشيخ إلين الله يكتبلها الشفاء..
عبدالرحمن:إنا لله .. لاحول ولاقوة إلا بالله..
لطيفه: وضروري زوجها يدري..
**
**
**
,,اليوم اللي بعده..
,,بغرفة أسماء..
,,باب الغرفه يدق..
أسماء: ميــــن؟؟
رهف: أنا رهف..
أسماء: تعالي عمه رهف .. ادخلي..
رهف: لايكون ازعجتك؟؟
أسماء: لاوالله.. بالعكس طفشانه..
أسيل راحت مع جدتي وأبوي... مادري وين راحوا..
وفيصل جالس مع عمي ميشو وعمي تركي ...
وعمتي دينا وعمتي إيمان جالسين مع أمي.. في غرفة الجلوس.. وسوالفهم عن الحمل والولاده..
طفشت وطلعت غرفتي وقعدت عالنت..
رهف: أسماء حبيبي ممكن طلب..
أسماء: إنتي تامرين يارهف؟؟
رهف:شوفي أسماء.. تعرفين أغنية عبدالمجيد.. حقك علي؟؟
أسماء: ياقدمك ياعمه..
رهف وهي تضحك: داريه إنها قديمه..تعرفين كلماتها..
أسماء: لاوالله ماعرفها كلها..
رهف: طب شوفي أبيك تحملينها من النت.. أوكي..
أسماء وهي موفاهمه شي:أوكي..
رهف: وخذي صور مشاري هذي..
أسماء وهي تمسك الصور: طيب..
رهف: أبيك تدخلينها عالبور بوينت وتسوين فيها حركات..
أسماء: حركااات؟؟
رهف: شوفي أسماء حبيبي أبيك تحطين كل صوره من صور مشاري بشريحه وبعدين تحطين خلفيات غير أو مثلآ تدخلين صورغير... يعني تحطين قلوب ولاقمر ولاأوراق ورود وشجر.. ولا شلال..وتدخلينها على الصور..
يعني تبدعين بكل صوره.. وبعدين تحطين أغنية عبدالمجيد هذي تشتغل طول الوقت بالعرض كله.. وطول ما الصور تنعرض أبيك تعرضين كلمات الأغنية بشكل كتابي تدخل بالشرائح بطريقه حلوه..
بعدين إحفظيه في سيدي وعطينياه..
أسماء: ليه تبين تسوين ندوه عن مشاري؟؟
رهف وهي تضحك:أسماء أي ندوه..
أسماء: أنا أدري عنك؟؟وشوله كل هالشغل..
رهف:بصراحه مشاري سمعني هالأغنيه.. وهالمره من جد حسيتها غير..
وأبي هالسي دي أهديه لمشاري..
ها أسومتي تسوينه لي..
أسماء: أمممم أفكر..
رهف: لاأسماء تكفين..طلبتـــــــك..
أسماء: البلشه إني ما أقدر أرفضلك طلب..
خلاص تعاليني اليوم الساعه 12 الليل.. تلقينه جاهز..
شغلته سهله ما يبيلها...
رهف: ياعمري يا أسماء.. خلاص الساعه 12 بجيك وأشوف إبداعات أناملك الذهبيه..
,,,,
,,,,
,,في غرفة الجلوس..
جوال منى يدق..
منى بقلق: هلاعبدالرحمن..
عبدالرحمن:منى.. تعالي لحالك الحوش بسرعه..ونادي فيصل معك بس..
منى:طيب..
,,دقت منى على جوال فيصل وخذته وراحوا بسرعه للحوش وقعدوا على كراسي الحديقه وشوي ولاسيارة عبدالرحمن تدخل حوش البيت وتوقف..وينزل منها عبدالرحمن وهومتضايق.. ويروح يفتح باب السيارة الخلفي..
أول ماشافتهم منى نطت بسرعه هي وفيصل وراحوا عند السياره..
لما فتح عبدالرحمن باب السياره كانت لطيفه جالسه وأسيل نايمه بحضنها ووجهها أحمر وفمها شبه مفتوح..
أول ماشافت منى الوضع خافت وقالت:
بنتـــــي..
فيصل بخوف: أسيـــــل..
عبدالرحمن وهو يحاول يتماسك: أووصصصصص..
ولاكلمة.. لاحد يسمع حسكم.. مانادينك إنتي وولدك عشان تصرخون..
فيصل: يبه أسيل اشفيها..
لطيفه وصوتها تعبان: ياولدي تعال عاون أبوك وشيل إختك..
,,شال فيصل أسيل من جهه.. وعبدالرحمن من جهه وطلعوها فوق غرفتها ونوموها على سريرها..
,,فيصل بعد ماحط أسيل عالسرير وهويتنفس بصعوبه: يبه أسيل اشفيها..
منى ويدها ماشالتها من على قلبها: عبدالرحمن البنت وشفيها..
لطيفه: تعالوا غرفتي .. خلنا نطلع من عند البنت لانزعجها..
منى: اول شي تكلموا أسيل اشفيها؟؟
فيصل وهويهدي أمه: يمه تعالي نروح مع جدتي غرفتها ونعرف كل شي..
,,,
,,,
في غرفة لطيفه..
منى: عمه.. عبدالرحمن تكلموا أسيل اشفيها؟؟
عبدالرحمن: وشفيها.. وش اللي مافيها..
بس جلست عالكنبه.. وقرى عليها الشيخ..
صابتها حالة بكاء شديده.. وبعدين جلست تصرخ وتتأوه إلين أغمى عليها..
منى وهي تبكي: ياويلي على بنتي..
لطيفه: وبعد ماقامت من إغماءتها جلس الشيخ يحاول فيها ويقولها.. إنتي شفتي أحد معين يوم أغمى عليك..
ماردت عليه ومستمره تبكي.. آخر شي الشيخ قالنا نستمر نجي نقرى عليها عنده..
وانتي وابوها تقرون عليها بالبيت..
وعطانا مويه مقري فيها... وزيت..
ونصحنا.. نخليها تبتعد هالأيام عن زوجها..
فيصل وهومقهور على أخته: حسبي الله على هالناس..
مايربحون أحد.. نتكلف ونعزم ونوجب ونقدر.. وآخر شي حتى الله مايذكرونه لاشافوا شي عجبهم..
منى وهي تبكي:ياربي شالسواااه..
لطيفه: سواة الله أبرك.. إحنا نسوي اللي نصحنا به الشيخ..
ونخلي زوجها على بينه.. والخيره فيما اختاره الله..
عبدالرحمن بلهجة عتاب: كله منك.. الظاهر لاإنتي ولاأمي..نبهتوها تقرا على نفسها يوم زواجها.. وهذي النتيجه..
منى وهي تبكي:والله ياعبدالرحمن إني قاريه عليها بنفسي.. بس مادري..مادري..
لطيفه: هذا مو وقت لوم.. خلاص هذا قدر الله ولا اعتراض على حكمه..
,,,,,
,,,,,