أحمد الحربي

يامرحبا وعداد نجم المجره=ترحيبة (ن) مني تهز الميادين
الصيف بارد والشتاء زاد حره=الليله الليله بلا مذهب ودين

عبدالرحمن العلوي

دام البقاء وسهيل تعرف مقره=ماتاصله لو كان عندك جناحين
ياللي درست الكون بحره وبره=هل الزلازل جات قبل البراكين

أحمد الحربي

يالله تجيب الخير منه ودره=من قبل لايصبح ضحى يوم الاثنين
برخي حبل معكم وحبل ٍ نجره=وأكبر قضيه يالولد في فلسطين

عبدالرحمن العلوي

لن صارت أوضاع البلد مستقره=مايطلب الدولار راع الملايين
ون صارت أوضاع البلد ماتسره=يبسط يمينه عند باب المصلين

أحمد الحربي

ياصاحبي لولا البشر ماتشره=لاشريك باريالي وأقصدك بعدين
ترى كلامك واضح (ن) مانغره=خلك على القبله وصل الصلاتين

عبدالرحمن العلوي

ياحر ماجيتك على حين غره=جيتك نصو ياللي تعرف القوانين
من شان مانجلب عليك المضره=وأنته تروح أيسار والعالم ايمين
أحمد الحربي

ابعيركم شيب وسنه تفره=طيع النصيحه ونحره للميامين
قدمت لك خيري وقافيه شره=ياللي تكحلها على الزين والشين

عبدالرحمن العلوي

ابعيرنا له يابيض الوجه جره=وبانت رسومه في ظهور البعارين
وقهواكم من الكيف حلوه ومره=وان كان ماتدري ترى الناس دارين

أحمد الحربي

ابعيركم شارب مع التوت جره=والحمل ماشاله برك للساكين
ترى فناجيلك بها اليوم مره=والناس ماتدري بعد كافي الصين
عبدالرحمن العلوي

درب المشاكل والعناء لاتمره=وتصير مثل الحب بين الطواحين
ماراح ليه حق مثقال ذره=مير النصايح ماتفيد المجانين
أحمد الحربي

درب العناء درب السعد والمسره=نكسر طواحينك بشويل وبكلين
أطغي على الطاغي وكره وكره=خل النصايح ليلنا في سارين