يا قطوف القافية يـا عناقيـد القصيـد = كل ما يقبل لي الليل هوجاسي ضـوى
و العيون الساهرة جاوبن هل من مزيد = و الصدر يا نسمة الليل يعشـق للهوى
والسهاد ارهق لي الحال والفكر العنيـد = و الهدف من دونه ظروف ويحد النوى
يوم احاسيس الغلا ما توصّـل بالبريـد = ياقطوف القافيه ما غويـت ولا غـوى
كل ما هبت هبوب الشمال يصيـر عيـد = جاب من نفحة عبيره وما صدره حوى
معه جاب لنغمة الصوت و العزف الفريد = ما يبرد به ضمى الذوق عندي وارتوى
و اتشفق للهبوب الجنوبي معـه اعيـد = الصدى من قطوف قافي نغني به سوى
ومن عناقيد القصايد نظمت إله الجديـد = والخيال وما مضى من العناقيد انطـوى
كني اشوفه وسع عين معها طول جيـد = وايتغطرف كنه الغصن من ساقـي روى
وكني اشوفه يغني على خضر الجريـد = مع حمام الورق ميلاف , عال المستوى
وكني اشوف الخجل منه يخفي ما يريد = وكني اشوفه مذيّر سمع ذيب(ن) عـوى
و كني اشوفه ينادي عليّ يقـول هيـد = و إن بغى يغضب يرده حنانه ما قـوى
و لو احاسيسي تبلّـد ومثلـت البليـد = العتب في طبعه إيحير اصحاب الهـوى
و ليت قطف القافيه مع عناقيد القصيـد = تحتوي كل العتب والغضب لا من ضوى