شبكة رواسي نجد الأدبية - قال الجباري يوم سنن سنينها = النفس لا ضاقت ترى الله عوينها

بسم الله الرحمن الرحيم
هذا اول موضوع لي اتمنى انه يحوز على رضاكم :)

هذه القصيدة لشاعر المتآلق عبدالكريم الجباري الغريري....في رثاء لي والدة
(رحمة الله) فا يقول:::

قال الجباري يوم سنن سنينها = النفس لا ضاقت ترى الله عوينها

يا كم ضيقه تبتلينا و تنفرج = تروح ما كنه أبد عايشينها

و أنا فقدت أغلى بشر يا جماعتي = و ما ألوم نفسي لو تزايد ونينها

أبوي ذخري يا عسى الله يرحمه = و يجبر عزى نفسن تقطع حنينها

يالله عفوك و أرفق بروح والدي = أنت الرحيم و رحمتك خابرينها

يالله تجعل قبر عيني و مهجتي = روضة رضا دايم تزاهى بزينها

و تجعل مكانه بين عمرن و أبا بكر = في جنتن ما مللت ناظرينها

فارقت و الفرقا صعيبه و كايده = و عجزت لا أنسى يومها و شهرينها

كل ما أبي أنسى ذكرتني سوالفه = ياليتنا لو كلنا حافظينها

دايم يوصيني على الطيب و الكرم = وصى شمالي لا تناظر يمينها

وصى على الخوه و وصى على الرحم = و قال الصداقه زرعتن زارعينها

أن كانها فأرضن خصيبه و طيبه = و الله ما ينسالك الماي طينها

و أن كانها بقاعن مثل تربة الصبخ = كثر السقي ما هو مبين بعينها

و لا جالك الطرقي تخير كرامته = لابد تدسم شاربه من سمينها

و لا تآمن الدنيا كفى الله شرها = كم واحدن روح و طاح بكمينها

و السد حطه داخل الصدر و أقفله = و أفرق بعقلك خبلها من فطينها

و لا صرت في عازه تصبر على الدهر = و النفس دايم عزها لا تهينها

و أعرف ترى ثقل الرجل في ركادته = و أختار من بعض السوالف حسينها

و ترى الجماعه عزوتك لا تهدهم = خل المواصل دوم بينك و بينها

لا طحت تلقاهم دروعك و محزمك = يذريك عن سود الليالي حصينها

و أنا أبحفظ و ألتزم في وصيته = و الله لأبقى طول عمري رهينها

الله يرحم تاج راسي برحمته = و يجبر عزى نفسن تقطع حنينها