شبكة رواسي نجد الأدبية

من الإرشيف
مقطع مختار من قصيده مطوَّله

..

رقيت فكر ٍ قآعـه بـ رآس حَزمه
مْن الولَع و انصب خيآل المئآتَه

أزف جنحه ماكسى الريش عظمه
من وآهج ٍ تحرق موآري سنآته

على قديم افكاري آذوق طعمه
و يفز بركآن الغلا من من سبآته

أهفّ زيفه رآمد بـ جمر وَهْمَه
والله و جمر الصدق سوَّى سوآته

أغرآني بـ وآد ٍ مجآريه ضخمه
غَصَبْت رجل ٍ ما تلاحق وطآته

و الله لو ادري نيَّة السيل ردمه
ما كان عندي منظره يا حلآته

رسمت معه ورود وغصون حَطمه
و سهرت اجبِّر بآقتي من غلآته

مثلي هذاك الشمع معروف قسمه
يموت ما حيٍّ يقدِّم عزآته

ترى الأسى عنوآني و صرت رقمه
وانا عذآب الليل و آنا نجآته

و انا هذآك السيف في وقت حسمه
وانا القبر . وآريت فيني رفآته

على الورق عآنقت كلمه و نغمه
تضمّني والقلب دآرت رحآته

وصلت به لـ ابعد مجآهيل فهمه
سريت به في دآئرة وقت فآته

على السما رتَّبْت نجمه و نجمه
رسَمْه نجم و نجم كمَّل صفآته

و بـ ديمته رشّيت بروآز رسمه
حجبت عنه البدر من غيم ذآته

و من الوله ضوّيته بـ ليل عتمه
عسآه لو مرَّه ينول امنيآته

و اظلله يا ليته يبوق سهمه
من قلبي اللي كل السهوم جآته

و جيت قصدي من شفآيآه بسمه
تغيِّر اللي صآبني من قسآته

أو همسة ٍ يشدي بها الشعر نظمه
يجيه عذب ٍ لو قست مفرداته

يجيب لي شبآك طاريه نسمه
يا حي من هبَّت علينا طرآته

على عليل ٍ ضيَّع الشوق علمه
هآضت شجونه هزّته ذكريآته

يلمح بقايا الحلم و يضيع رسمه
لا هي بعيد و لا قريب ٍ منآته

يظل حبّه دآم في القلب سهمه
و سنآه في عيني يبيّن غلآته

الفآتن اللي ينطق الجرح باسمه
يا ليتني من فوق جسمه عبآته

لو اِيتهنَّى كل واحد بـ حلمه
ما كان ذآق الغير صآفي شفآته

1419/6/19 هجري