مدري انا وشفيني امشي على مـاش = وناقل هموم الناس مدري على وش

في واقعي زي الذي يكره يناش = حســاس من بعض الاقاويل والحش

لا تقحموني في حوارات ونقاش = افكار كــوره عيت براسي تخـــش

مشكلتي اني دايم اعطي من الكاش = وان بعت بالحاضر او الدين ما اغـش

ابي رفيقا بالوفا رابط الجــاش = اللي اليا جيته نبا خاطـره بش

هاتو لي اللــــــي قلبه ابيض من الشــــــاش = لو صــــــــــــــار ما كشيت منه ولاكــــــش

ذوقا عســـــــــــــل طيب وللقلب خشاش = وان خش مايطلــــــــــــع مثل راعي القش
اللي يقش العفش مقفي ومنحاش = ما تعجبه جلســـه نظيفه بـــــــــــــــــلا حش

قضى حياته بين الاجواد هلاش = بكل سالفه يلقا مداخل وينخش

يرعد لسانه للبشر كنه كلاش = واهل الردى معهم مسالم ومنفش
اللي نوى الغيبه بالاعراض يعتاش = وراعي النميمه جاي عنده يطقش
مثل الضباع اللي تدور لها عراش = والا الافاعي يوم تدخل لها بعش
ماغادين شي يجي هيك وبلاش = عند الولي كل شي باللوح ينقش
وش فايدة عمر الذي عاش حشاش = يومن حسناته مع الوقت تنحش
وماني على الانذال شرطي وهواش = ربك حسيب اللي يحب التلاكش
ولاني بلص ولاني انسان غشـــــــاش =حتى لو اكثرهم يعيشون بالغش
ولاني بمعصوما ولا بالردى خاش = يارب تغفر لي عدد مالمطر رش
وختامها جتنا غيوما على مـــــــــاش= ياربي عفوك ذنوبنا تقـــــــــــــــطع الطش