الصدر ضاق وداعي الهم زادي=وحان الفراق ودمع عيني ذواريف
ابكي متيهت الجهام التلادي=اهل البيوت اللي كما قارة طريف
اهل البيوت اللي سوات النوادي=الابة اللي بالشحم تكرم الضيف
قطاعة الفرجه بقطم التوادي=علط الرقاب المكرمات المشاعيف
ذخاير اللي يلطمون الاعادي=نطاحة الصابور بالشلف والسيف
متعبة صُم الرمك بالطرادي=فيهم على الاخصام بالمعركه نيف
راحت بدوة نازلين الرهادي=آهل النظاء وآهـل المهـار المزاعيف
لاغرد الجندب بوسط العرادي=من لاهب الكنٌه يزغرف زغاريف
وبان العبس بالبوش بقران حادي=واقفت نوات العشب وقبالة الصيف
وقامت حباحيب الغوالي تنادي=من العطش حنت صغار المعاطيف
والقيض حان وراح وقت البرادي=والصيد خلا نايفات المشاريف
وشالو على الزلبات والنور بادي=مع دربهم يهذل نماء الذيب ويقيف
قطاعة البيداء حثاث وحمادي=لاسمعت الحادي يغطرف غطاريف
فيها شوابيش(ن)وفيها عنادي=لا جلعت للورد راحت زواريف
ثور نفلها مثل سرب الجرادي=لا طار من دار المحل ناصي الريف
گن الشمطري والنفل والزبادي=ريحة عبس حم الشعاف المواليف
وردوا بها مخمار ماهـو هـدادي=على جبا عدٍ طويل المحاريف
وحطوا لهـا العبوه على گل هـادي=اسود سهاوي گاملٍ بالتواصيف
يسقي سهاف من گبار الهـوادي=تزرع فؤاد إللى سقم حاله الحيف
على جباء عدٍ به الجم زادي=الريهجان اللي يبذ الغواريف
منهال قطعانٍ رعت بالثنادي=ترعا رقايب نجد من دون تصنيف