لاح البرق شرق وهل وبل المطر مدرار=يخيله نجم ويقول خالد تحليته

صدوق المخايل بارقه يخطف الابصار=سيوله تدم احيا وتحيي لها ميته

واشوف ابو رامي جاه عقب البروق افكار=مشروعٍ يقول ان سهل الرب سويته

مرامي بشعلٍ في وبرها تقادح نار=وانا جازم بتحقيق ما قد تمنيته

مليت الضجيج وزحمة السوق والدوار=من العام عيش المدن يالربع ملبته

ابا انزل خلاً من عام ما داج به ديار=يم العتش وان ربع شماله تعديته

ماني مكترث باجوا الخلا برد والا حار=ترف هالحضاره عني اليوم قطيته

ابا اصمم الغرفه واولع بها الانوار=وما سووا اهل الطيب من طيب سويته

وابا اشوف نجم ان كان هو طاوع الاشوار= يشري له نياق وكان انا اشملت مريته

واكب الهواوي يزعج الناس بالبيطار=هذاني لكم في سجن الابداع رديته

وانا اقول يالمعبود يا عالم الاسرار=يامن لك بكاف ونون يتم ما شيته

من الذود ترزقني بعشرين وضح خيار=وبعفراٍ قفاها باشعل اللون كاسيته

ابحدر مع الذيدان لو ما ارغب المحدار=الوايت شريته كاش والدرب دليته

لكن خايفٍ قلبي ليا ابعد طروا واندار=ورديت المطايا قبل ما تاصل حويته

وصارت سالفه بكره يحوكونها الشعار=ولنفسي بنفسي جبت شري ومديته

لـكـن خـايـفٍ قـلـبـي لـيــا ابـعــد طـــروا وانـــدار
ورديـــت الـمـطـايـا قــبــل مــــا تــاصــل حـويـتــه

وصـــارت سـالـفـه بـكــره يحوكـونـهـا الـشـعــار
ولـنـفـســي بـنـفـســي جــبـــت شـــــري ومــديــتــه

الله الله
مبدع شاعرنا حد الثماااله
نص فاااخر اوله جزل وآخرهـ عذذب

تقديري لك,’’