ياللي خذيت الفكر جمله وتفريد=وياللي كسبت الذنب في روح مغليك
يما تبدد سقم الايام تبديد=والا توحى صوت دك الدواكيك
اللي تجدد نوح الايام وتعيد=واللي تفكك قاسي الصمد تفكيك

ماكل من والاك تقدر تواليه=بعض البشر عن دربهْ النفس دلها
ولاكل من عاداك تقدر تعاديه=بعض النفوس معلقات بكللها
ولا كل من جازاك تقدر تجازيه=بعض السوايا مايجازا اهلها
اثر دروبك يالــهوا كلها تيه=واثر القلوب الغاديات بسبلها
ياللي تتل القلب باقصى عراويه=قلي وش اسبابك مع الناس تلها
وانا قليبي من لظى البعد كاويه=والروح منكم كل هاجس دبلها
الروح تبحر بالهوا دون توجيه=رحله الى المجهول محدٍ عدلها
في ليل مظلم والهبايب تلاحيه=والبحر الاقشر غبته ليَّ ولها
ابحرت مدري وش خفى من خوافيه=ولاني بداري بالسموم وعسلها
يعني على النيه ركبنا موانيه=واثر المغربِل موتتي قد جدلها
واثر الهوا لو طال يوذي براعيه =واثر النفوس اقدارها تختـتلها
واثر الغلا والشوق محدٍ يهاديه =لأن المهادى زود ناره شعلها
واثر المواجِع ليل الاحزان تحييه =واثر الجفيا للمحبه خللها
واثر الحبيب اللي تحبه وتغليه =هو فرحتك وايضا هو اللي قتلها
واثر عيونك يوم يقفي تناديه =وتصيح بدموعٍ غشتك بوبلها
تبغاه لكن خيب الله مساعيه =يسمع ويسفه خطوته مابتدلها
هذي صدوف العشق تبت اياديه=وهذي علومي يوم جادت عللها
منك انت ياهادم فؤادي وبانيه =منك انت يامتلف هدومٍ غزلها
منك انت يا آمر بقلبي وناهيه =منك انت يارضوه مناي وزعلها
منك انت ياشيخٍ لقى مايهقويه =وغيره يموت ومنوته ماوصلها

ياخاطري منته على العشق ملزوم =ولاهو لزومٍ بالغثا تبتليني
من راح جعله مايعود ولا يوم =واللي بقى فيه البقى بالسنيني
هذي هي الدنيا موفق ومحروم =واللي خفاك اليوم بكره يبيني