شبكة رواسي نجد الأدبية - احدى روائع الشاعر الكبير / حمد هادي المسردي رحمه الله

قالوا لي أقصد في فـلان قصايـد
ثم امدحه يعطيك موتـر مكافـاه
قلت أمدحه وشلون والمدح كايـد
ما يمدح إلا الي طروقـه مخـلاه
"فلان" لا ينقص ولا هـو بزايـد
والمدح ما هو له ولا هـو بويـاه
المـدح للـي يرتكـي للشدايـد
المدح لحمود الجهيمـي وشـرواه
والشيخ إبن شفلوت مقـدم عبايـد
مترك هو الي ترفع الراس طرياه
وإلا إبن سمرانٍ صدوق الوعايـد
معجب محمد جعل الأنذال تفـداه
وإبن شبيب القرم دسـم الموايـد
مناحي الي تذبـح الحيـل يمنـاه
وإلا ولد فالح حمـد مـن يكايـد
ويقاوي العسـر بزمانـه مقـاواه
أمدح حمد حيث إن لفعله شهايـد
ماهوب لأجل إني من أقر ب دناياه
وإلا إبن خربوشٍ ولا هـو بعايـد
راجح عسى الجنة مقره ومثـواه
شيخ علينـا مـن كبـار الفقايـد
يا كبر فرجة راجح اليوم كبـراه
والأجواد واجد ما عليهـم زوايـد
لكن نعـد الـي سمعنـا وشفنـاه
ذولا الحلاحيل الزحـول التنايـد
ذولا الأسود أبنا الأسود المضـراه
ذولا الـذي والله تجـوز النشايـد
فيهم وكلٍ منهـم المـدح يزهـاه
ولا الردي لو مدح ما هـو بفايـد
والمدح ما هو داري ويش معنـاه
حي القروم أما الرخـوم الفسايـد
ما للرخوم وجيه عندي ولا جـاه