شبكة رواسي نجد الأدبية - رســـالـــــه

كُلّمَا يِتلَخبَط اِحسَاسِي بْـ رِسَــالَـه
أَلتِـقِـي في دَاخِـلـي جَـــرح ٍ دفِين

جَرح غيراَلجَرح الاوَّل أَو بـدَالَـه
يختِـلِــج في قَلبـي المَـدمِي سِنيِن

يَـنـزِف و يسقيني لـ حَـدَّ الثّمَـالَـه
ليـن فِي وَجهِـي عَـلَامَــاتَــه تِبين

بين حِكْمَة عَاقِل وُ نَزوَة جَهَــالَــه
و بين آآهَة صَابِــر وُ بَسمَـة أَنين

كُلّ جَرح بْـ قِصَّـه وُإِثبَــاتْ حَـالَــه
وكُلّ دَمعَـــه تَجعَـل القَـاسِـي يِلين

ليتَهَـا لآنَت قُلُوب اَهل الجمَــالَـــه
مَا قسَت بالمِمتلي شُـوق و حَنِين

اَلرّسَـايـِـل لَا غَدَتْ للبُـــوح آلَــــه
خَلِّي الخَــافِقْ مَـعَـاهَـا مـسـتِكـيـن

إنْ طَرَى لَه جَرح وَالاّ مَاطَرَى لَه
خَلَّـه ينَــاجِي وَ لَا تِســأَلْـــه مـيـن

للحَيَـاة الظَّالمَـه صُـورَة عَــدَالَــه
مثلمَــا فِي ظَـالِـمِـيــنَـــا عَـادِلِـيـن

مثل من ضَاعَت يمِينَه فِي شمَالَه
يَآكُل بْـ يُســرَآه و يَحسِبهَــا يِمِين

متّقي رَبَّ المَلأ في كَسب مَــالَــه
مَا يسَـاوِيـه الّـذِي بَـه يِـسـتِهـيـن

من غَرَس في رُوضَةالخِلاَّن بَالَه
مَا جَنَى غَير الهَــوَاجِسْ كُلّ حين

يسْـرِجَ اَلتَّفكِيـر وَ الأَوُهَــام فَـالَـه
يفقِـد اَلتَّمييــز لَـو عَـقْـلَــه رزين

العَنَا مَوجُود واَشْقَـاني وصَــالَـه
والهَنَـا مَفقُــوُد واَلمَعنَـى الثّمِيـن

لَامنِي من يعتِبـر حِـسّــي هَبَـالَـه!
لَـو يِحِسّ الّلي فِـ ذَاتِي مَــا يِهِين

فِينِي التَّعبِيــر لَـه نَهْج و دَلَالَـــه
فِيه سَلوَى و فِيِه عِبْـرَه للـفطِين

هُو أَعَـزّ بْدَاخِلِي . وهُوَ الِّرسَالَه
لَو أَمُــوُتْ يظَلّ بين اَلعَــالَـمِـيــن