يامرحبا ما ذعذعن به هفاهيف=وما جالهن في كل بقع ادراجي
ترحيبةٍ صبت مثل صبة الكيف=منها شذا ريح ازرق العود فاجي
باللي له بعذب المثايل محاريف=يجي بسامعهن طرب وابتهاجي
ماءً خصر للضميان في لاهب الصيف=وللجايع اهجى من حليب النعاجي
يابو محمد خل كثر التصانيف=ما فادني قبلك كثير احتجاجي
اهرف مثل سرحان بالسوق واقيف=ولبيت الشعر في خافت الصوت اناجي
اقول وين اللي يشيل التكاليف=ذالي سنه وكسور انا اروح وآجي
قال اسكت اسكت عارفك دون تعريف=هالقفل حطه بي وزاد انحراجي
طمعان ما ادري مرهقته المصاريف=با ديس ابابا امسى وصابح سواجي
يورد مجاهيمن شعرهن كما الليف=جاله مع الناس بسببهن لجاجي
وان مر سوق منقشات الاطاريف=نجل العيون مقوسات الحجاجي
زِمْ النهد والردف وبطونهن هِيف=مثل الجواهر وسط صندوق عاجي
هجرس وقام يصرِّف القاف تصريف=حتى مساره صار فيه اعوجاجي
وان ظن مابه للبشر باين وشيف=لافه عليِّ بلا مبرر وماجي
وفهد تحيزم يقهر العفر بالريف=ما كنه الا عقاب ولد العواجي
ايوده لشقح البكار المواليف=وليا رفع صوته يجنه هجاجي
بعينه يلد بلابسات النفانيف=لقيت في مفلى الضباء له مداجي
وان سلت عن هزاع من سِيف في سِيف=لف الوطا ولغبة البحر باجي
ممساه في صاهد ومقياله بقيف=في كل معرض له سوالف واحاجي
وانا كماك ولا علينا تخاليف=لو بيني وبينك يصير اندماجي
ومن عدهن صدرت قنعان وامعيف=رويت من عذبه وعفت الهماجي