ياناس ماني روسول ٍ وأنصح الامه=ولاني بعد جاهلن والعلم يخفاني
لاكن قلبي هموم الناس من همه=يعني أنا طيب ٍ والطيب عنواني
وأنا بعد شاعر ٍ وأمشي على يمه=والشعر لامن نظمته قام ويحاني
لاني جزل وأكتب الجزلات من جمه=جمه بها الماء سبيل لكل عطشاني
وادلي بدلوي وكل الناس ملتمه=وأسقيهم الماء وانا ماني بروياني
انا اللي خلا الشعر قمه على قمه=وفوق القمم ذيب جر عواه قيفاني
ياهل الشعر كل شاعر كفو ماذمه=لاكن ودي واضح شي الاخواني
شين يخلي جبال طويق منهمه=ويثور من همها نارن ودخاني
ياوجد حالي وجود اللي نشد عمه=يقول ياعم أبويه ليه خلاني
وأمي توفت وقلبي زايد ٍ غمه=ياليت ربي خذا عمري ولا حياني
ياناس فكري تشتت كيف انا لمه=من شان اوضح لكم موقف وبكاني
شفت الولد رافع ٍ يده على حرمه=ويجرها وسط بيته شوف الاعياني
وطرقت بابه وعيا يفتح الرمه=واشوف عود ٍ باعال الصوت ناداني
يقول ياوليدي وش لك بالولد وامه=ترى الولد ماهو بعقله وسكراني
هلت دموعي وهرج العود ماتمه=واقفيت عنه وانا ضايق وحيراني
أقول في نفسي أمه دايم اتزمه=ولاتذوق نوم العرب لاصار تعباني
حتى الاكل مايطب فمها قبل فمه=يالله تصلح لها وتهل الامزاني
ياناس من عاشت أمه يربط العمه=لبيه وسمي ويشوف اللي تبى ثاني
ويبقى على ماتبى والعلم مايزمه=ترى رضى الله رضاها والعمر فاني
بالله شوف اليتيم وشالن يشمه=اللي بكى قدم عم ٍ مابه إيماني
عم ظلوم ولاله قلب ٍ وذمه=في كل ليله يزيده هم وحزاني
ياناس ماني رسول ٍ وانصح الامه=لاكن حبيت اوضح شي لاخواني
وختامها ياعرب منهو يشوف امه=يحب يدها وانا صح الله لساني