حنين
 

ياللي على عيني لمحت المواجيع
على الشقاء بعلمك وش دفعها

البارحه ما نمت نومي تقاطيع
عزي لعينٍ صبرها ما نفعها

حنين سمحه قطع القلب تقطيع
وكم مرةٍ حنت وحنيت معها

واللي خلق بيض النجوم اللواميع
واللي بسط سبعٍ وسبعٍ رفعها

ماهاضني ذكرى غرامٍ وتوديع
(من حبها روحي تحس بوجعها)

حنينها بالليل رهبه وترويع
ويغص بالعبرات منهو سمعها

على حوارٍ لا ذبحته ولا بيع
أمس آلضحى كأس المنيه جرعها

هي ورث جدي يوم بقعاء على الريع
عن كل روضٍ زاهيٍ ما منعها

من دونها حد السيوف البواتيع
كم روس هيّبها وروسٍ ردعها

وابوي صيته بالكرم عندها ذيع
ورثة جدوده عزها ما قطعها

في العسر ولا اليسر ماهي مجاويع
دراهمه في شفها ما جمعها

ماله وما لأهل الفلل والمشاريع
ما طاوع اللي بالغلاء* قال بعها

يقول ما اشري في غلاها ولا ابيع
ايلين روحي خالقي ينتزعها

#سلمى

صح السانك شاعرتنا
ابيات جميلة وزن وقافية ومعني
راقت لي كثيراً مميزه بلاشك لك إعجابي ومتابعتي
بالتوفيق

صح لسانك ولا هنتِ شاعرتنا
نص راقي يعطيك العافية

الله الله
ياسلام عليك وصح الله لسانك ملايين
مبدعه وجزله وشهادتي فيك مجروحه
دمتي ودام ابداعك وتألقك
تقديري وتقييمي وختم التميز لسموك
النجلاء

صح لسانك وبيض الله وجهك على اتحافك الجزل
لاعدمنا ابداعك شاعرتنا
تحياتي

صح لسانك يالشاعره
ابدعتي وامتعتي بحضورك الطاغي بالمتعه والفخامه والجزاله
دمتي بود وتقدير

صح لسانك مليون في مليون
قصيده جزله ورائعه
الف شكر لك