شبكة رواسي نجد الأدبية

يالورق وينك لك عن النوح مده
او ضيقتك يالورق تذهب مع البرد

صوتك يوثر بي بمزحه وجده
يستدعي الذكرى ويستقطب الشِرد

يرجع بي لوقت ومكانٍ نوده
وما كان صدَّر من طواري تجي وِرد

لو ان حيلي لــ سمعته يهده
وتبرك ركاب الصبر من ونتك حِرد

يا الورق لا تبحث خفاً ما انت قده
ما ترف بالجنحان لو اسرده سرد

يالورق خذ ما اوحيت مني ووده
لدارٍ زمت من دونها صحصح الجِرد

نبه بالاسم وقل له اسمي ومده
وشف نرجسه وش هل منها على الورد

وسلم عليه وما حصل لا تعده
يكفيني اللي فاز به حظي القرد