على صباحات الغرام الجميلة=أسهر ومعظم خلق ربي ينامون
أقرأ حكايات ألف ليله وليلة=ولا قدرت أرسم لها داخلي لون
وأستنشق أنفاس الحنين العليلة=وأبكي من اللهفة على شوفة عيون
طويت مشوار الحياة الطويلة=وصنعت من أشيائي الخاصة كون
شاعر ومتمرد على كل جيله=بقبوع حر وكرفته وغليون
وحزين وأضحك للرجاء كل ليلة=وأقول ياربي عسى بكره تهون
من الغرام عظام جسمي نحيلة=ومن راسي لراس قدمي كلي طعون
وأن جات لعلوم الرجال الأصيلة=باقي على الهقوة مثل مايقولون
راع الكحيلة عاش راع الكحيلة=يموت عز ولا يجي يوم مغبون
يابوك أنا من روس قوم وقبيلة=على القنا و الموت الأحمر يفزون
كم فرقوا مابين خل وخليله=لا جنهم بيض العذارى يصيحون
والحب موجود و دروبه فضيلة=ولا ينكره واعي وعاقل وموزون
كم قلت يابهلول شف لك وسيلة=خل الهوى والحب للي يحبون
بس أنت ماتفهم ولا فيك حيلة=إلا تبي تنحب و تحب و تخوون
وجهك قناع ألوان حاول تشيله=شف وش بيبقى لك سوى كم بالون ؟