الكلبش الرمش واعيانه هي الزنزانه=لكن ارحم سجنته لي فيه من سجن الرواسي
انعم بهمسه بلمسه بالرموش اوجانه=ياورد جوري تخالط مع زهور الآاسي

يالقريحه بالمعاني نادي السيحاني=ودي ارسل له بيوت الشعر واسمع ردّه

خابره شاعر تكانه مبدع وفنّاني=والليالي من غثاها .. ماتبيح سدّه

مانسنّد ب القصيد الا على الشجعاني=والضعيّف مانبي له شي لابو جدّه

جيت ابشكي له همومي واحكي بما جاني=والحياه همومها للأدمي .. ممتدّه

كنت احب انسان غالي واقرب من اخواني=لين شفته قام يبدع في جفاه وصدّه

ثم عطيته كلمتينن من صميم لساني=وابتعدت وقلت للهجران عانه وده ..

هو يحسب ان الكرامه عندنا مجاني ؟=لو يموت من القهر ماقول حبك ردّه

ولو دموعه فوق خده شبّت النيراني=ماطرى لي .. يوم اجي له واتطلّب ودّه

السلامه تتبعه ياصاحبي .. والحاني=قد وصل حدي معاه .. وليت يعرف حده

مرحبا ترحيبةٍ عطورها الريحاني=ودهن كمبودي ماولع بالقديحه نده
يامصوت للسجين ودونه السجاني=لو بغى يفزع يلاقي في طريقه شِده
لكن الدعوى عنى منها الرفيق يعاني=لو عصى باب السجن سور السجن لاهده
والعلوم بلا فعايل مالها برهاني=والتروي بالمسايل لازمٍ لابده
انت مجنيٍ عليك وبالحقيقه جاني=وكري الصبر المبرقع وش بلاك اتهده
بالتنازل للغلا ما يرجح الميزاني=من مواجيب الايتيكيت الخضوع انعده
من ثلاث اثنين راحن والبقا يافلاني=وادرك الباقي بسرعه لاتفوت المده
وحاضر بمالي وجاهي يافتى وسناني=ما تبيه اخذه وما استغنيت عنّْه رده
والسموحه كان ما جازت لك القيفاني=والله ان الفكر باقي له نحاها لده

مرحبا بالعاصمي من بعد طول الغيبه=يازعيم القاف مانرغب بطول غيابك
كان معك من الغنايم شي تكفى جيبه=ودنا نكسب حضورك يوم ربي جابك

المشاركة الأصلية كتبت بواسطة محمد الغنامي (المشاركة 395475) الله الله صح لسانك ياسامي الغنامي قصيده جزله وعذبه واسندتها لشاعر كفو ابو عبيد .صح لسانك مليون رد وافي وكافي ابيض وجه مبدعين ياشعارنا الجزلين

مزاجي الليله عكر بالحيل والخاطر غثيث=ولو كل علمٍ فيه ادقق كان زودت اغثثه
هواجسٍ صلفه من البارح بنافوخي تعيث=تبني بمخي للوساوس منزلٍ واتثثه
جرير والاخطل ومعهم جا الفرزدق والبعيث=كلٍ يقول اني فصيح لسان ما فيِّ لثثه
همٍ زجرته وانهزم واقدم هذاك إقدام ليث=منه المشاعر صابها راعه وجا فيها احثثه
يامن فراقه قحط والا شوفته للقلب غيث=يحيي معاليقه بهتانه ووبله وهثثه
ان مات انا الوارث وهو لومت من بعدي وريث=يعيش لو غيره تضيق ارض الجزيره بجثثه

يقولون جزل ومبدع ورايع وفنان=امحق فن ما يطرد من السجن رواده
لولا ما يحد الهجس لمتابع القيفان=كان الشعر مالي فيه رغبه ولا راده
مدينن لي بحاجه وانا له بشي امدان=حقوقن غدت مابين رجواي واوعاده
بلشت بشرابيكه واظنه معي بلشان=دعامة عمر غطت حزونه على اعياده
امواجه رمت مركب نجاته على الشطان=خرج ما نقص منسوب جمه ولا زاده

بغيت اسجنك يابرق الوسم بسياج برق الصيف=ابي عقراب برقه لاشعق يضحك بعقرابك
لو اني من ابروقٍ تلتعج في هالزمان امعيف=لكن خلك شمالي صدر لا تفتل لي اشنابك
اشبه هالبروق بنار لكن الولوعه ليف=واقول لبرق صيفي لاتنزل لجلها كابك

احيان تاتي هواجيسٍ تقزيني من النوم=واسج مرات وادله كن في قلبي بلاده
واستثقل الهم واجلس واستريح شوي واقوم=من كثر ماهي تراودني غدت سهمه وعاده
وارحب بطيفها اللي زارني في لذة النوم=ترحيب صاحب سعاده في لقا صاحب سعاده
البارحه وامس واللي سابقه مع دربه اليوم=هالاربعه حظي المقرود زادنه قراده

تزفك احلام الغلامابين قلب وبين عين

اقول ماعاد انا زاهم وادعِّم صملتي باليمين=ومن غير ما اشعر لوان الرقم قدامي وانا ازهم علاه
مطبوعٍ اسمه بسادسة الحواس وثابتٍ من سنين=مابالخمس منمحي ماباقيٍ في قلبي الا غلاه
اطرب بقافي واضيق صدر من حولي بكثر الحنين=ولا احد يعرف ان مابي من مشاكل من عيونه سواه

لاتزهم البعد مادام المسافه بعيد=صم المشاعر تذوب ويحترق كرتها
يضيق صدري وفي صدري همومي تزيد=ليا حسبت المسافات أو تذكرتها
محبتي لك جرت مجرى دمي فالوريد=اعلنتها لك قبل عامين ما انكرتها
وان كان يبغا الهواوي علمها بالاكيد=شيهانةٍ بين عوج ضلوعي اوكرتها

هذي قصاصات شوق ونبي منك المزيد=مادام عندك طفت ع السطح واعلنتها
مضغة ضلوعك سلبها منك عنق الفريد=وفياض ياغل كبدي قد توطنتها
وانا اعرف الشوق جنيٍ رياحي مريد=كل الرقا الوارده عليه جربتها
في قرب من له تتوق النفس ساعه يهيد=صاحبت انا مرَّدْ الجن وتعلمتها

لا والله الا وقعت وخربت الرصّه=وجه الزعل منكشف عن وجهي الراضي

من ضيقة النفس مدري ضيقة الغصّه=احس بأني وحيد وهالبلد .. فاضي

من يعذل القلب مايدري وش القصّه=باقول خلك عن اللي شفت متغاضي

حبل الرجا قَص والقصه هي القصّه=والعلم مايقدره ظابط .. ولا قاضي

ضربات رمح الهوى فالصدر مختصّه=والقلب منها .. يعاني كل الامراضي

فيه الفيوزات ملتمسه .. ومنقصّه=وجروح حاضْره .. نادت جرحه الماضي

دور حكيم الغرام الفاهم و وصه=لو ما انت عما مضى يالذيب معتاضي
القلب سلعه ومفتول الرمش لصه=واسرقهن الخدَّر اللي كنها امراضي
ترباس حدب الضلوع القاسي اتقصه=على اخضر القلب للنعاس مركاضي
ان سلم من ناديه ما كبته حصه=على ذكاته اتوصي موضي امواضي