إن بخلت بجرعة البلسم لطب جروحـي=لا تقول الجرح ليه ابطى وهـو ماطابـي
والله اني كل ما اشـم العبيـر يفوحـي=صرت شرِه بكثرته و اشفق على الاطيابي
لو تقول اني شرِه يالصاحب ومشفوحـي=قلت هذا الصح لو هم يزعلون اصحابـي
مير لا تبخل بسجعك ياحمـام الدوحـي=كل ماهبت هبوب النـود هـد اعصابـي

ما يهيضني و يجبرني على بدع القوافـي=غيـر طـاري نجـد يـا نجـد المسمـى
فـي ربيـع وقيضـه وعـج وسـوافـي=لـو عطشـت بنجـد كنـي وارد الـمـا
ولو مشيت بنجـد فـي رمضـاه حافـي=عندي الرمضا حرير وصارت الاقدام سلمى
ولو ب/ احـادث نجـد يبسـن الاشافـي=يعجـز المنطـوق لـو بالـقـول هـمـا
هـي مـلاك الارض و المجـدول ضافـي=كـل مـا تضفيـه , عـنـي زال هـمـا
وهي سهام العشـق مـن زرق الشلافـي=قاتـلـة عـاشـق ويفديـهـا بـدمـّى

وصّلتني نجـد للنظـم الفصيـح=والنبط قد صغت منه ارقى البيوت
لا تجادلني بعشقـي يـا مليـح=طاري اطريته عليّه مـا يفـوت
كيف تسأل صاحب القلب الجريح=من غلاه لنجد كـن الـدم تـوت
فدوة لنجد المسمـى والصحيـح=من قتل لعيونهـا لا مـا يمـوت
كلّي عيون ٌ لها وقولي صريـح=والدعاء يحميه ربي في القنـوت

ليه تنبش لجرحي عقب ما هوب غاير = و تترك الجرح ينزف يا الغلا من جديد
ما هقيت إن قلبك قاسي و دوم جاير = كل ما ارجي حنانك صرت قسوة تزيد !!
صرت قيس الملوّح وانت سيد الحراير= و الغرام اعترف به في حروف القصيد
آآآهـ/ وا صبري اللي ما بقى له ذخاير = لا تلومون مغرم لو يقول و يعيد
صاحبي فيه ضاعت يا العباد البصاير = هيّن ٌ,, ليّن,, و فيه القساوة حديد

إن سالت الدمعـة بعـد مـا تعالـت=غيضٌ من الضيقة و فيضٍ من البوح
تروى عطش بالفعل ما قيـل قالـت=و تستاق روح و لا لها سر مفضوح

وقّف دقيقة هوى بالـي علـى هونـك=بعلن بالاشعار هجس الفكـر وعماسـه
من لمحة الطيف تدمي صدري طعونـك=يوم الخطر من عيونك دقت اجراسه !!!
يحق لـك مـن دلالـك تظهـر فنونـك=تغلي وثقل , تسلب عقل بسياسـة !!!
سـدد ديونـي وانـا بسـدد ديـونـك=تبي الصراحه ؟ غلاك اسقيتنـي كاسـه
فتنتنـي بالغـرام وصـرت مفتـونـك=و احرمت جفن السهر من لذة نعاسه !!!
و صرت احسد اللي من قريّب يشوفونك=و إن كان قصدي جهلته ضاعت الطاسه
ماتدري إنـي قريـت الكـف لشجونـك=وحطيت لك من ضلوع الصـدر كرّاسـة
وماتدري إني محـال اخيّـب ضنونـك=راعِ الهوى ما يخيّب ولفـه احساسـه
بيّن طوي صفحة الهجـران ف/عيونـك=إن كان بنك الغلا لي ما اعلـن افلاسـه
و إن كان قفيت عنـي شُـح بمزونـك=بيت الغـلا مـا تقفـي عنـه حرّاسـه

سامريني يالهجـوس اللـي بريتـي حالـي =كود اعبر عن غـلا الغايـب بوقـت غيابـه
ويا النجـوم الساريـه ودّن لهـا مرسالـي=آآآه/يا طـول الغيـاب اللـي مشـرّع بابـه
واهنيـه يـوم قلبـه فـي بعـاده سـالـي=ما انشغل فكره ولا آثـار انتظـار اعصابـه
ما دريت إن الهوى يقضـي علـى الرجالـي=لين شال القلب من صدر العنا و اقفـى بـه
اختفى برقه ولـو صـوت الرعـد بخيالـي=كنـه يناديـه بإسمـه , مايـرد الجابـه !!
و الله إن الجـو كلـه عقـب خلـي خالـي=و إن حضر ما انشد عن الغيّاب و ادرى عتابه
عنـدي إن الليـل قمـراء والقمـر يبرالـي=لو شهـر شـوال يشهـد لآخـره بحسابـه
ويا العيون الساهـرة يـوم ابـدع الأمثالـي=من صفا جو الطبيعـة مـدري مـن اسبابـه

ثلاثة ارباع وقتك لو خذيته حلال = بس انتي الوقت كله تأخذينه سدى
ما قد تذمرت من سرقك لو الوقت طال = ساعات مثل الدقايق لو يطول المدى
و ساعة غيابك تعادل في قياسي ليال =و ما عاد اميز خطأ دربي من اللي قدا
قل لي وش اللي تبي مافيه شي(ن) محال = لو تطلب الروح مني قلت سم وفدى
المستحيل إني ارضى منك قطع الوصال = و المستحيل إني اضحّك عليك العدا