ديوان / حمد السياري

[حمد الخالدي]

بسم الله الرحمن الرحيم

السلام عليكم ورحمة الله وبركاته

أسعد الله جميع أوقاتكم بكل خير وبركة

لا يسعني هنا إلا أن أقول..هنا سأكون وهنا سأكتب وأنقل وأتواجد..

أنهكني الكسل .. والشكر موصول للجوهرة شجعتني ودلتني الدرب :)

أسعد بمروركم وزياراتكم..

[حمد الخالدي]

الصمـت حكمـة عاقـلٍ عنـده إلمـام
والجـاهـل أكـلــف مـــا عـلـيـه يتـكـلـم

مــــن لا تـعـلـمـه الـلـيـالــي والايـــــام
يـقـضـي حـيـاتــه كـلـهــا مــــا تـعـلــم

تمضي وهو يطـرد ورا حلـم وأوهـام
وتـفـنـى وهـــو لا زال فـيـهـا يـحـلــم

يمشي مع اللحظة وتركض به اعوام
حـــدت عـلـيـه سـيـوفـهـا مــــا تــولــم

لامـنـهـا هـمــت بـذبـحـه وهـــو قـــام
يـبـغــى ينـاطـحـهـا وسـيــفــه تـثــلــم

فـي هاويتـهـا صــار هـايـم ومنـضـام
لامــن حـبـال تـطـال ولا فيه سـلــم

ازرت عـيـونــه تـنـهـضــه وازرت تــنـــام
تـــــروي مــــــرارة واقـــعـــه ويــتــألــم

(الليالي والأيام)

[حمد الخالدي]

الله أعلم وش حداني على نظم القصيد
والله أعلم بالخوافي ومكنون القلوب

الله أكبر يا زمن ما حصل شيٍ جديد
الدروب اللي سرينا بها نفس الدروب

نوب يملاني التفآؤل ولو مالي رصيد
أتجاهل علتي وأطلق حجاجي..ونوب

أتجرع من مرارة جفا الوقت العنيد
والمراره كلها..لا تذكرت الذنوب

وقتها كنه على عاتقي ذاب الحديد
يا كثر ما أتوب وأذنب وثم أرجع أتوب

وأتمعن في خفا قصة الصبر الشديد
والرسل بين الرساله ونيران الحروب

بين كر وفر كانوا يضدون الضديد
وبين ظلم الطاغية للرسالة والشعوب

صابروا لين الفرج سخره رب العبيد
الإله الواحد الفرد علام الغيوب

حظ من حبه ويسر له الراي السديد
وحظ حظ المبتلى بالصبر صار محبوب

ليه يحزننا الزمن والرجا حبله جويد
والآماني تقترب كل ما هبت هبوب

ليه أضيق خاطري بأمس دام اليوم عيد
بأتحزم بالصبر والصبر ستر العيوب

وأحمد الله وأشكره يا عسى عيدي سعيد
ويا عسى شمس الفرح ما تزاول للغروب

( مكنون القلوب )

[حمد الخالدي]

اللي بقلبي دفنته في عجاج السنين
تسفي عليه السوافي والقدر يطلعه

في حزةٍ كل خلق الله بها نايمين
وابليس حضّر وكلم خاطري وأقنعه

في وهلةٍ غاب فيها كل كنزٍ ثمين
أدفع هوا النفس يم أهل الهوا واتبعه

في لحظتي ذيك هاض اللي بقلبي دفين
سكّر دروب الهوا والحظ من يمنعه

صدفة هل الخير تزرع فالنفوس اليقين
تدل للخير وإن خار العزم تدفعه

عنوانها روضة الآمال وافرق يمين
وأقلط على اللي جروح النفس ما تشبعه

سبّح وهلّل وكبّر وإطلب الله يعين
وإن وسوس إبليس بحبال الرجا تصفعه

عز الرضى في حياتك لا تكون الحزين
دام الرضى حط في عين الهموم إصبعه

وإصبر ترى بالصبر رحمة على المؤمنين
واللي قسم لك يجي لك وأنت فالمجمعه

( روضة الآمال )

[حمد الخالدي]

يا الله يا منزل تبارك والقيامه والقمر
يا منزل التوبه وغافر والمسد والزلزله

يا منزل الرحمن فيها وصف لجنان ونهر
يا منزل الأنعام والتحريم حل لمسأله

يا منزل اهوال النشور الحق بآيات الزمر
وآيات طه تحتوي نجوا كليمن تسئله

من رحمتك من رأفتك يا منزل آيات العصر
حكمة حكيم تزيح عن صدري القنوط وتقتله

اثر الحظيظ اللي رزقته يفهم أسرار السور
اللي تفكر بالحياة وبالممات..وبعمله

يا منزلٍ يوسف ويوسف بالصبر حاز بمصر
بعد التغرب والتبلي والسجن والبهذله

يالي تجازي من أجاب ومن أناب ومن صبر
سبحان ذاتك يا صمد ما عنك بابن نقفله

أنت الكبير الواسع وخلقك تحت عرشك صغر
ما يملكون الا دعاك تعينهم فالمقبله

طالبك يامن سوجدوا لك من هداك اهل السحر
ياللي هديت قلوبهم للحق واللي تقبله

طالبك وانت أعلم بحالي والدفينه بالصدر
حقق منا عبدك على نور الصراط وذللة


( أسرار السوَّر )

[حمد الخالدي]

قلبـي خـفـق لــه وانــا شـرعـت بيبـانـه
وزاد الـغــلا لـيــن سـلـمـتـه مفـاتـيـحـه

قـفــل عـلـيـه وتـركـنـي بـيــن جــدرانــه
اجــاذب الـذكـريـات الـلــي بـهــا ريـحــه

يامـا وطيـت الخطـر كـلـه عـلـى شـانـه
ويـامــا عشـقـتـه بتصـريـحـه وتلمـيـحـه

كنت الشجر وهو طيرن يطرب اغصانه
وكان المطر والمشاعـر نفلـه وشيحـه

كنـت المـكـان الوحـيـد وكــان سكـانـه
عـمـري طريـقـه وضحكـاتـه مصابـيـحـه

كنـت القصـر والقـصـر شايلـتـه اركـانـه
لا تنشـدون القصـر وش سبـة الطيحـه

كـنـت القصـيـد الفـريـد وكــان عنـوانـه
وجـدي وجـود القصـايـد يــوم تلويـحـه

مـا خانـنـي غـيـر ظـرفـه والـزمـن خـانـه
وكلن سرى في طريقه يزعق الصيحه

كلـن لـه اسبـاب فـي صــده وهجـرانـه
الله يــوفــقـــه ويــــــــحلله ويــبــيــحــه

سجيـت رجلـي وقلـبـي تـدفـن احـزانـه
بـس الغضـي راح مــا سـلـم مفاتيـحـه


( مفاتيح قلبي )

[الجووهره]

وعليكم السلام ورحمة الله وبركاته
والنعم فيك ومبروك افتتآح الديوآن
والعفووو شآعرناا
وصح لسآنك على الافتتآحيه الرآئعه
وبانتظار المزيد من ابدآعك.

[الجووهره]

ماشاء الله على الجزاله والابدآع
صح لسآنك ودآم ابدآعك

[حمد الخالدي]

ارحبي ي الجوهرة
الله يبارك بأيامك ويحييك يا مرحبا
ما عليك زود نور الديوان .. جيتيني وانا مدهر اتلفت واجمع خخخخخ
المحل محلك والقهوه على النار دامني مشغول قهوي نفسك النظام أمريكي (:

[حمد الخالدي]

في ضميري كلام ولهفتي تدفن حروف الكلام
والليالي تعثر خطوة البوح ﻻ منه خطا

راح فكري وعود والخبر تو ما رد السلام
تو ما رد فكري بعد ما جال جولات القطا

صار قصر الاماني في عيوني كما برج الحمام
وﻻ تشكيت حالي يوم وقتي على صبري وطا

يا وجودي وجود اللي لزم مرقده يبي المنام
والهموم صحبنه في فراشه ومن تحت الغطا

شاب راسه وروحه من عناها سكن فيها الهيام
تاب تسعين توبه مير عود على درب الخطا

هكذا وجد حالي والعوض يملكه رب الانام
الإله الكريم ان مد يغنيك عن كل العطا

طاعته نور يسكن في حياتي ويجتاح الظﻻم
نور يحيي مشاعر ميته والسبب وقت السطا

يا عيوني تغني وافرحي جا لنا شهر الصيام
جا لنا بالبشاير كلها من بعد طول البطا

( خطوة البوح )

[حمد الخالدي]

جيت اعيش الذكريات القديمه فالمكان
اتونس وألعن إبليس وأجوائي سرور

أتفقد ما كتبته وما قال اللسان
ما نويت اكتب قصيده ولا اسجل حضور

لين شفت اسمٍ تغير بعد جاه الزمان
وقال تم وجاه مسرع وهالدنيا عبور

والله إن الوقت يركض ولا عنده ضمان
تمسي وتصبح جنازه تلاقفها القبور

ما يعرف الموت حاكم ولا يعرف فلان
ولا يعرف أهل الوفا من عديمين الشعور

يا ابو مشعل وين روحت يا هاك الحصان
والله إن الصدر ضايق مثل كل الصدور

الصدور اللي تعزك ولك فيها كيان
والأمور تصير صدفه وتكشف لك أمور

بالوفا والطيب تذكر وأنا شاهد عيان
يا عسى الفردوس ملفاك والذنب مغفور

ويا عسى ملفاك روضة من رياض الجنان
تسقي أرضه عقربية وتملاها زهور


( أبو مشعل )

[حمد الخالدي]

تحير العين في بعض المواقف ما لها تعبير
سوى سكب الدموع اللي تعالجها وتعميها

سعادتنا تطير وترتفع وتحط..مثل الطير
تعاكسها رياح الشوق والايام تكويها

يسامرها حلم يروي تفاصيل الضحى وعصير
تداعبها تفاصيله ويا ماكثر بلاويها

صباح الخير جعل الخير يسكن في قلوب الخير
ويزرع بسمة آماله ويرعاها ويسقيها

نشوف وﻻ نشوف الا الأماني تنرسم وتصير
كما برق المزون اللي ترازم في مناشيها

ليا هلت تعلقنا وسط دوامة التفكير
وإلى عدت تموتنا ضمى وتقلب يديها

تدور افكارنا وتثور لكن ما لها تأثير
على ظرف الزمان ولوعةٍ يا حر صاليها

تضيق وتتسع وتعاود الضيقه وما لي غير
إله الكون رب الناس رازقها وباريها

إلهٍ فرج الكربه على يوسف وهو فالبير
إلهٍ يعرف صدور الخلايق وش خوافيها

مليك الملك سبحانه إليه الحمد والتكبير
خلقنا نعبر الدنيا ونسعى في مساعيها

طبيعتنا بشر نخطي وﻻ نلقى وﻻ تفسير
وطيات الحياة نعيشها ونعيش ما فيها

عرفت ان الوفا يبقى كبير وﻻ يعود صغير
ما دامه منهجٍ يشمل مناهجنا ويحييها

لذلك نطلق يدينا وﻻ نحتاج للتبرير
نعيش بصدق وبراحه وعلتنا نواليها

تطوف سنين عقب سنين تفسد كل صالح مير
رغم إفسادها لأرواحنا ماني بناسيها

حييت وﻻ حييت الا وانا بين الرياض أسير
ولكنه توفى قلبي المتبول يبكيها

حقيقه خانني التعبير يوم ان العيون تحير
وﻻ لي غير سكب اللي تعالجها وتعميها


( تعبير العيون )

[حمد الخالدي]

يا معجبه وش يبين..إن قلت لك وش تبين!؟
ماني من اهل القلوب الخضر يا معجبه!

قلبي متيم برحله مع خطوط الحنين
امسى على مركبه وأصبح على مركبه

بين المشاعر تنقل ينتظر له ظنين
ما غير وصله يجدد قلبي ويطربه

إن قلت وش بك حزين يقول ماني حزين
يكبت همومه بصدره وأستحي وأرقبه

ساق الغلى وارخص الغالي وحبه دفين
ولو ما يصارح بيبقى عالي المرتبه

لو قلت له كل شي يجاوب بكلمتين
منهن جميع الشعر صرت امسحه واكتبه

له بالوفا والفرح..عز الله اني مدين
عده علاج العمر..يا ما حلى مشربه

يا بعد وصله ويا ماصعب دوا العاشقين
ما فيه يا فلان سندها جبل وانتبه

هب الهوا وانثنى الاول مع الياسمين
واصبح كما اللي بنى حلمه على تجربه

يا معجبه يمكن ان الهرج توه يزين؟!
يا مأكذب إحساسك المفضوح يا مأكذبه!!

يا كود جمر المشاعر مير ربي يعين
ما فيه غيره يحقق مطلبي وأطلبه!!


( يا معجبة )

[حمد الخالدي]

للظروف أحكام..لاتتلف بقايا روحي..!
وللخفوق أسرار..ترويني..وتروي حالك


كل ما صديت تكبر..لوعتي وجروحي
وكل ما شفتك أغني لك..واحيي فالك


وآتناسى علتي عندك..وأجمّل بوحي
وآتحرى حزة(ن)فيها يدوم وصالك!!


صاح شوقي..في سماء حلمك..وأظنك توحي؟!
مير ما حركت ساكن..وأختصرت أقوالك..!!


يمكن أنك..ناوي(ن)تبني جميع صروحي..
ويمكن انك تشنق إحساس الوله..بحبالك..؟!


ما عرفتك..وأنت شمسٍ أستمدت ضوحي
وتركتني والمشاعر فالظلام الحالك


ما عرفتك يا هبايب..فرحتي ومزوحي
لين شفتك تتجه يم الفراق لحالك


الصراحه كنز....لكنه خذا مصلوحي..
ثم دفنّني حي..والواقع دفين رمالك!!


( أسرار الخفوق )

[حمد الخالدي]

يا صاحبي والليل يفضح لك خفايا ما يجول
في خيمة ن بيضا علي الرفقه تشد اطنابها

احيان اهيم بقدرتي واقول وعزومي تطول
واحيان احس بشح ما عندي واقفل بابها

خوفي..من الدنيا..ومن حظي..ومن قل العقول
ومن رغبتي في كلمة ن توي حسبت حسابها

تنتابني..في لحظتي هذيك..رغبه بالوصول
لارض الامل..والحلم عيا..لا يطيق غيابها

هي صادق احساسي وهي كلش..وهي بنت الاصول
هي قمة العفه وهي..روح الوفا تحيا بها

ما تنحني لليأس..وتهده علي متن الذلول
تبقي شموخ..وترتفع..و تسرني بكتابها

اتقول لي والشوق بين في عبارتها..واقول
لبيه يا مسك المشاعر..والقيم وخضابها


( من تسالي الأرشيف )

[حمد الخالدي]

وجدي ليا مرت على البال ذكراك
وجد الفقير اللي عجاف ن ظروفه

مديون ما يرجي التباهي بالاملاك
عفيف نفس وكن عيني تشوفه

فكره تنقل بين هذا وهذاك
ما جاب طاري نكبته في حروفه

لو بامدح اللي في يده قال يفداك
نفسه على مد الجزايل شغوفه

يقدم أزهار الوفا لو الاشواك
جت له من اللي شايلتهم كفوفه

راح متعني فوق جمسه لذولاك
لعيال عمه ناقصين المروفه

قالوا يبه فراج راع السلف..جاك
كشر بوجهه جاك ينفض كتوفه

والمشكله بأسمه يعينك ويبلاك
فراج..لكن من يفرج ظروفه ؟


( من تسالي الأرشيف )

[حمد الخالدي]

كل ما قلت مات اللي بصدري وقاده
زاد صاليه واشغل خاطري وامتحني

ما هنا لي منام وعلتي بالوساده
كل ما احط راسي تسرق النوم مني

تستبيح المخبى لين يعلن نفاده
ولا نفد تنبش المدفون غبن ويوني

صرت اقلب عليها امنيات السعاده
والرضى بالنصيب اللي يغلب التمني

ونوب لا والله اني افتقر للركاده
بس اعد الليالي والطواري يجني

من يعيون الغريب اللي نفي في بلاده
الصحيح استفدت وفالسفر لازمني

الحمل في شداده والأمل في جهاده
والهنا ماحدن والله عليها متهني

يا عيوني ما دام الله كافل عباده
عيني خير ما دام التعب راح عني


( أرشيفيات )

[حمد الخالدي]

مركوز لو انه عن الناس مدفون
حي وعروقه في بحر ذكرياتي

في كل حين يعيد ركزه وما دون
ضربة عصى موسى ورمح الزناتي

اجرع لظاها والبشر لو يشوفون
ما حثربوا فالماء ويبست لهاتي

وش هو يفيد الشوف لا صار بعيون
من هو فواده مغرقه في سباتي

خسران منهو يتبع النقص والهون
يهين نفسه حين يقفي وياتي

واللي رضى ينهان لو كان مغبون
مثل الكتوم اللي ربوعه وشاتي

وده بفرقاهم ولكن مفتون
صارت حياته كل ابوها شتاتي

العز لله..والعرب لو يقولون
حنا وحنا قل لهم ياغناتي

كثر الحكي وإن زان ما يشبع بطون
وقله وقار(ن)فيه طوق النجاتي

ياللي جمعكم فالزمن خوة صحون
وإسراف في دنيا قفاها مماتي

العز شفته في رشا الدين مرهون
لا والذي نفسي بيده وذاتي

ولو لا رجا اللي رحمته تشمل الكون
ذاب الأمل فيني وذابت حياتي



( أرشيفيات )

[حمد الخالدي]

تبصرت فالدنيا وشفت العلوم أشكال
الا يا هجوسي ليت شعري يشكلها

انا ما بدعت القاف ادور وراه ريال
انا ابحث حقايق مشغلتني وأحللها

ولا فيه شي ن يحفظ الفكر والأفعال
مثل حفظ ديوان العرب يوم ينقلها

لجيل ن ورى جيل ن تتالت وراه أجيال
خذوا خبرة رجال ن تجمل فعايلها

وانا اخذت لي سجه تترجم لسان الحال
وسبحان من سخر بلطفه جمايلها

سريت بتضارس الزمن واعتليت جبال
وضويت اتخبط يوم جتني قوايلها

مسافات يمشيها البنادم بدون اشكال
ومغارت لو يدخل بها ما تحملها

حرام الكلام يروح والسالفه تنقال
ولا شكلت فيها علوم ن تغلغلها


( أرشيفيات )

[حمد الخالدي]

على درب الزمان اللي مشاويره تقص اعمار
اسج الرجل وطروقي تباريني على دربه

حقيقه طالت الغيبه سبايب مسة المشوار
ولكن الثنا للي بلطفه يفرج الكربه

سلام الله على المسجون والسجان والزوار
سلام ن ينتهض به من يصف بيوته الذربه

يحلق في سما افكاره وينهل صافي الافكار
ويرسمها قصيده تنفعه في سلمه وحربه

يغوص بحور ما ياصل لغبتها ولا بحار
هماج البحر ما ياقف بزوره لا نوى شربه

فريد اسلوب واسلوبه يصيد من القصيد قفار
ولكن الليالي حدته يستوطن الغربه

تسيد مجلس الوحده ومن حوله وجيه كثار
سوات الطير لامن طار في سرب ن ماهو سربه

وثايق من خفا ذاته ولاش قصور بالشعار
ولكنه يمثلنا نعاتبه ونفاخر به


( تسالي الأرشيف )

[حمد الخالدي]

يا مطول الغيبات قل لي علامك ......
.قل لي وش اللي صار يا هيه وش فيك

ما ادري على ابن العم كابر مقامك ......
.......ولا تبينا بالمساحر نداريك

مير انتبه يا ذيب واكرب حزامك......
..هذي نصيحه صادقه من بن آخيك

لاصار عندك مشكله في عظامك .....
.مالك سوى تطلب من الله يعافيك

و ان كان مشكلتك سبايب طعامك ......
دور بداله واشرب الماء ويرويك

والخشم ما يبتر بسبة زكامك...
.....اصبر وتلقى لك علاج(ن)يداويك

وتبي الحقيقه ما عرفنا نظامك ...
...ومهما بدر منك نحبك ونغليك


( إرشيفيات )

[حمد الخالدي]

قلبي اللي من بعدهم ما سلى
لو اكابر كذبتي ما تنطلي

جامعين الزين واصناف الحلى
والحلى والزين ما تبغى حلي

يوم اسج الرجل لدروبٍ خلا
ادعس ام الهم يمكن ينجلي

مير لا ابو جد هذاك الغلا
يرسل الأشواق تصلاني صلي

ما كن به غيري بهالدنيا ملا
لعن ابو هالشوق ما عنده ولي ؟

لا ذكرت عيونها جاني بلا
ولا ذكر اوصافها يغمى علي


( أرشيفيات )

[حمد الخالدي]

صوتي




الهـواوي علامـه حـسـه اصـبـح ثقـيـل
ســبــة الــبـــرد والا خــانـــه الاتــصـــال

ما درى انه سجين وواجب انـه يشيـل
كـل لحـنٍ يهيـض فالليـال الـطـوال

فالتسالـي مزاجـه كـان بــنٍ وهـيـل
كيف وهـو المعـزب مـا تفـوح الـدلال

لـو يقولـون يبخـل قلـت مـاهـو بخـيـل
مير شوفوا وش اللي سبـب الانعـزال

يمكـن انـه تولـع فــي غـنـوجٍ تـزيـل
كـــل عـلــه وتــبــدع قــصــة الاحــتــلال

والهواوي هواوي عند صوت الهديل
كـيـف لا جـاتـه الـجادل ولـيـد الـحــلال

ولاهـي بذمـتـي لا صــار عـنـده بـديـل
عن كلامي وهـو راع المحـل والمجـال


.........

صوت الشاعر /ناصر الهواوي


مرحـبـا ياحـمـد مــا فــرَّق الصـبـح لـيــل
وعـد مــا صــار للـوبـل الغـزيـر انهـمـال

عندي ادوا الشتا يـاذا المحيـا الجميـل
الـسـمــر والـتـمــر ومـبـهــرات الــــدلال

وذبـذبـات اتـصـالاتـي مـداهــا طـويــل
وبالفكـر للقوافـي هجرسـه واجـتـوال

اختلص من عميل ونـوب اسـدد عميـل
وبـاقـيٍ لــي وفــي ذمـتـي مــا يـــزال

والمعـنـى لـوقــتٍ لـــه تـولــى يـمـيـل
عقبهم ياحمد من صـدق مابـه جمـال

الدلع والغنـج والرمـش ضافـي ضليـل
زمــة الـصـدر تـبـهـر والـردايــف ثـقــال

كنه الشاش خد الترف صافي واسيل
اهيف البطن لاصق بالظهر له ظـلال

بمجـمـلـه يـاحـمـد والله مـالــه مـثـيــل
في عيوني وانا ما اظلم بنات الحـلال




( أرشيفيات )

[حمد الخالدي]

يا وجودي وجود اللي تعسر في دروب(ن)عسيره
حار فكره ومفهومه تشتت بين موت وخساره

ما لقى غير كثبان الرمال وطرف صبعه يديره
فوقها لاجل يرسم حالته في هويته وانحداره

زل يومين ما عنده زهاب ولا تحدد مصيره
مات تسعين موته من عناه ومن لهيب انتظاره

هكذا وجد حالي من جفا خل(ن)عيونه خطيره
اتلفت روحي وقلبي تعلق بين تاره وتاره

الوله دك ضلعان المبادي والمبادي كبيره
مير ما الله كتب له يبني قصوره وبرج انتصاره

مات غصن الامل لكن غصن الود ما طار طيره
ولو ما مات غصنه كان شفت الطير ياكل ثماره

آخ من علة العشاق يا قلبي وقل البصيره
راح عمري وانا اسلي شعوري بالشعر والعياره..!!



( أرشيفية )

[حمد الخالدي]

يا شمعة الشوق ذبتي من لهيب الفرآق
ما عاد باقي سوى ذكرى شموع(ن)فنّت

ذكرت ماضي حياتي يوم شفت النفآق
وعزمت اعيد النظر يوم المشاعر جنّت

ألد عيني واشوف ان الجلايل دقآق
وهذي بشاير سعد لأن النهايه دنّت

ما عاد ينفع مشاعرنا وداع وعنآق
لأن المشاعر على درب الخيانه بِنّت

كنت احسب ان المحبه تنحصر في نطآق
وأثر المحبه على عرش القلوب سكنّت

كنت ادري ان المحبه ضيمها ما يطآق
وإن القلوب الرهيفه للوليف انحنّت

أعرف قليب(ن)حجر واعرف قليب(ن)رقآق
وأعرف عزوم(ن)على طول المدى ما انثنّت


( أرشيفيه )

[حمد الخالدي]

الضيقة اللي كل ما قلت فكت
ينثر عليها إبليس قاز وشرارات

تحرق هدب عيني وقلبي ودكت
هاك الضلوع اللي من اول قويات

يا الله وأنت الملتجا يوم صكت
ما غيرك يفرج همومٍ كثيرات

ضرتني التكه وتكت وتكت
حتى نسيت إن به صدورٍ وسيعات

الناس قالوا من رخا يوم نكت
ولا يلام اللي خفته الخفيات

والا القرابه من ردى الحال شكت
لين إختلط بالحق سم الإشاعات

طالبك أنا يا الله بالصبر سكت
كل الجروح اللي بصدري دفينات

( من الأرشيف )

[حمد الخالدي]

صوت الشاعر / ناصر الهواوي



من غيبة الشمس اكتب البيت وامحاه
ثم اتهجا نصف شطره واتمه

واجهر بصوتي واحسب الغالي اوحاه
وابعثر حروفه بطرسي والمه

واقول ليته يستمع لي وانا اقراه
و لو جاء مرده مثله اول امطمه

يقول خل الصبر كنزك وتلقاه
وتوسيعتك للصدر جداً مهمه

والصبر من طول الصبر وصل لقصاه
ريشه فلت بيدي وازريت اخمه

بالزين فلته لو حفيدي تحلاه
قال بقصيده ليتني ولد عمه

والخالدي لو شاف طلة محياه
نفض من اهم ارتباطات كمه

عليه ذيب الصدر ما بطل عواه
يهرف خلا لين ارتفع ضغط دمه




...



صداي



يا كثر ما نكتب قصيدٍ وننساه
قصايدٍ ماهيب فتحة وضمه

يا عالم النسيان من عيّن دواه
أصبحت أسيرٍ له وهذي مطمه

فكري مشوش والسبب من سواياه
مير العجيب إنه على البال جمه

أنهل وهو يعطي ولا يبخل بماه
وقال الهواوي والحكي في متمه

خل الذي بالصدر يقنب لليلاه
خله يجر عواه في كل قمه

يسرح بعيد وباكر الصبح تلقاه
إما لقا غاديه وأرتاح همه

والا نسى والصدق ما اظن ينساه
ماله سوا يصبر على حر سمه

ذكرتني باللي كثيره مزاياه
وأحلى الكلام اللي نطق فيه فمه

وجدي عليه وجود من خارت قواه
وأزرى يجي للما ولو هو يشمه

طاح متواسي والضواري تحراه
وأمسى وحيد بديرةٍ مدلهمه


( مؤرشفات )

[رحيل]

الف مبـروك الديوان
الله يجعله عامر بكل جديد ومميز

[حمد الخالدي]

يا هلا برحيل
الله يبارك فيك ويجزاك خير نورتي الديوان
اقدعي وخذي لك فنجال :)

[حمد الخالدي]

صوتي


سجين السجن سجانه علامه ما يشب النار
ترا الليله براد وزينة النيران مشبوبه

تلحف فروته واصبح يقلب جمرة المجمار
وجابوا له حطب ماشب واثره لحقه رطوبه

وشغل موتره والظاهر إنه شغل الفيكسار
وسج خطاه من داره وميل عند مشذوبه

وحصل عسوجيٍ يحسب إنه ساكنٍ فالدار
تحلى من حلي السوق من راسه لعرقوبه

جديلٍ كنه الليل البهيم يزين لا من طار
ولامس خدةٍ مثل القطن نوبه ورا نوبه

تدلى فوق نهدٍ من قوامه يلفت الأنظار
وهو بيديته خصله يمسمسها على ثوبه

سخيف الوجه مقرون الحواجب عينه المشوار
رموشه يوم ترمش كنها تعبر عن اسلوبه

خطى له خطوتين وصار كنه تشتعل به نار
تبخر في ثواني والسجين يشوف بصعوبه

تلفت ما لقى حوله سوى نفد وطريق القار
وحط الرجل مسرع متجه للسجن ودروبه

وعقب السالفه هذيك ما يبغى ولا مشوار
ليا من قيل له هيا يقول التوبه التوبه


.......


صدى الشاعر / ناصر الهواوي


سجين السجن سجانه بحالات البشر محتار
احد يبي الدفا وآخر ظهر بالبرد في ثوبه

تقول بحموة الكنه/صحو والا تهل امطار
ومشروبه كرك لو دلة الرسلان مصبوبه

وترا رويا المنام آيه من آي الواحد القهار
لمن نامو بلا حاسوس ما صارت ولا نوبه

تجي خضر القلوب اللي عليها لو شوي غبار
من رياح السنين ومن بقايا الشوق ودروبه

ترا سهاف الخدود ولوية الحاجب كما الدوار
ما تاصفها سوى عين البخيص بنون مقلوبه

وذيل المهره اللي شعشعت به يوم جا المغوار
يعبر عنه من لا يعتني بالخيل بصعوبه

وترا خضر القلوب تحب في بحر الغرام ابحار
وتطيح بغبته لوهي من الامواج مرهوبه

ويرقص من سمع طق الطبول اللي براسه زار
بغوها له وناسه يوم غنو له وبلشوبه

( أرشيف السجن )

[حمد الخالدي]

صوت الشاعر / ناصر الهواوي


بعد رقت فكيت المساجين يالخيال
علمهم ليا امسوا كلٍ ايروح لهيله

وانا ابا افدي لاثنين وادخل على ماقال
احسب مدتي بالحبس عندك كذا ليله

ان بر الحفيد الليله وصب لي فنجال
والا كيفنا يعجبك في بنه وهيله

اريد التسالي من حمد عذبة الامثال
ونجلاء من اليوتيوب تزعج لنا شيله

من الجوهره كم بيت ابا اشيلهن موال
وعلى الناقد الهارب ليا آااب تحليله

قل للعاصمي لا مر حيثه عريب الخال
عشانا هريفي ينشوي بعد تتبيله

كان الغامدي عند الغرايس هنا مازال
بلبلها يغني نبي نسمع مواويله

وملكة الرواسي للتكاليف تدفع مال
تسمع بالحفل مهره من البعد واتجي له

وين الشاعره صيحو لها بالغتر وشيال
عساها تصنتع قافها العذب واتشيله




صداي


على الحبس ضاري يا الهواوي وحبسك طال
وأباخذ معك فالحبس يا أخوك تعسيله

ومن عقبها ما يقعد الراس عشر دلال
أبا أضحك معك لين الله يعدل الميله

أنا لي ثلاث سنين والحال نفس الحال
وجاني بهالفايت ساحابٍ هماليله

ثمانٍ ويتبعها عشر لين كلش سال
وعسى الله يعجل بالربيع ومحاصيله

الا يا ابو عبيد الليالي علينا طوال
أهوه الحطب باشب ناري بمنديله

ومن بعدها بأنشدك يا مغوي الأجيال
ترى الشعر ماهو بس في وصف أبو قذيله

قلوبٍ رهيفه تنجرح وأنت فالك فال
وجرح القلوب الله كفيلٍ بتبديله

أحبك ولك بالقلب يا عودنا منزال
وترا إبريقكم قد فاح قرب معاميله



رد ابو عبيد


احبك عظيم احببتني فيه يارجال
دربٍ لك تعسر هو كفيلٍ بتسهيله

هلا مرحبا مالاح بارق وهل هلال
وعدد كل تكبيرة مصلي وتهليله

بمن هو يراني مثل من طال عمره طال
من ساعة نزوله عايش لهذه الليله

ترا الموعظه حلوه لها كم صفه واشكال
بالحسنا تجي وان خالفتها اصبحت نيله

انا افهم مجال الشعر وادري متى ينقال
وادري كل وادي ما يجي به سوى سيله

ولانيب راعي قنص بالصقر احط امثال
ولا احب المهايط بالقوافي واغني له

معروفٍ لدى من هاهنا حرمه ورجال
مع دربي ولا اداري بحوصه وتحويله

ولا اخشى سوى الجبار ذالعز والكمال
هو اللي له المؤمن يصوم ويصلي له

ومن بعدها قل ياحمد وارسم المجال
وارز الهدف فوق الضريبه وانا ارمي له


....
ما شاء الله عليه ههههه غزير الرجال هذا

( أرشيفيات التسالي )

[حمد الخالدي]

الشاعر / ناصر الهواوي

ياللي تنادي عندنا شاهي الجمر
وتصب من ترمسك بالكاس شاهي

برادنا يطبخ على وقدة السمر
وبهار دلتنا مع البن راهي

وقدوعها نشريه من غالي التمر
كان انت بقشاش الصريع امتباهي

فنجالها كنه خضاب اجمل السمر
لاقلت وين الزين ينقال(كاهي)

ياما غدا برحاب سلهامها عمر
لمحب ما يصغي لعاذل وناهي

معها سكر ماهوب من غرشة الخمر
طفلة ضبا فيها الجمال امتناهي



ردي عليه


يا أبو عبيد النمر ما يجهل النمر
حتى لو إنه غاب ماهوب ساهي

والنعم بك والأمر ما ادري وش الأمر
مير إتجاهك صار غير إتجاهي

لا زلت بين التِرف والسِمر والضِمر
شاعر غزل عفريت بالسجن لاهي

أبيات شعرك تدمر قلوبنا دمر
منها المصيبه كلها والدوا هي

فالسجن جالس تاصف خدودها الحمر
وأقل ما ينقال بالوصف ناهي

الله حسيبك فالملوَّح وفي عمرو
حتى الدواهي منك ماهي دواهي

( مجاريات السجن )

[حمد الخالدي]

يا الربع من عين لي النجلا وجاب
علومها يرفق سبب لغيابها

اربع شهورٍ تختفي خلف السحاب
وابطى سناها ما التقى بهضابها

والدار بأركانه عزيزين الجناب
ناسٍ تلقى بالبخور اصحابها

اقلط تفضل مرحبا بك لين شاب
رد الكلام المفترض بأسبابها

ناصر عقيد الشعر في سجن الشباب
يرسم نخيل المزرعة وترابها

والجوهرة بنت الرواسي ما تغاب
سجن الرواسي صار مثل كتابها

وخيّال يتحفنا بصفحات الكتاب
يملا البحر والبر باللي جابها

والا رحيل الشاعره تحسب حساب
لا من نوت تكتب تجس اعصابها

ولا من قصورٍ بالبقيه مير طاب
جو السجون ومن مشى بأسيابها

لكن نرجع يا الربع نبغى جواب
وش بالاميره طولت بإضرابها؟


( من عين النجلاء ؟ )

[حمد الخالدي]

الا يا طيور الشعر طيري ورفرفي
وحطي على الغصن الغضي وصفصفي

بيوتً إذا ما مرها الضيف قاصداً
رأى الجود والإحسان دون تكلفِ

ولو جاءها الغر الجهول مجادلاً
تنوء به الأضغاث يوماً ويختفي



..

إن الذي للنظم قاد لساني
ذنب جنته كتائب النسيانِ

ما زال يصحبني ويغسل مقلتي
ومحاجري فيض من الطوفانِ

كم سرت أرتكب الفرار محاولاً
أن أختفي عن ما مضى فأتاني

لم أدعه لكن في سلطانه
من أوصد الآفاق حين دعاني

فمضيت أبسط بالأكف فلم أجد
غير الندامة تحتوي الكفانِ


( محاولات فالشعر الفصيح )

[حمد الخالدي]

الشاعر / ناصر الهواوي


الا يالنسيم الواهن البارد الكسلان
تنيشط شوي ورج راكدت الاغصاني

عسا غافيات الورق لا اهتزت الاغصان
تطربنابعد غفوه بعذبات الالحاني

تحرك هجوس المولع الموجع الولهان
ان اضحكني الورق بنواحه او ابكاني

على ما يجي منه امتعود ومهما كان
عنده هيك والا هيك ماصار سياني

عجب منك ذات الطوق ما كننا جيران
ما كنا تقاسمنا السعاده والاحزاني

ما كنا اشتركنا في سباق افضل الخلان
وفزنا بامتياز الف درجه عننا الثاني

طريقٍ جديد ايمر بي بيت بالخليان
وتهامل ليا شافت بقاياه الاعياني

انا ما هقيت انك لذاك الطلل نسيان
ولايوم انا للي نزل فيه نسياني



مجاراتي


الا يا السموم اللي تلظى بلا دخان
ومنك الحِجَر تبغى لها مكيفٍ ثاني

على الهون بأهل الغرس والزرع والبستان
ترى النخلة اللي تنصفق تقهر الساني

ودامك على نجد العذية كما البركان
تولي هجوسٍ بالطواري تولاني

وعن هجرسة الألحان ومصاقل القيفان
لها حول شهرين او ثلاثة تقفاني

من أول تحايلني وأغني وأنا زهقان
وهالحين ما ادري وش بلاها تحداني

طبيبة جروح وجرحها ينتثر دمان
وكم وقفةٍ منها وقفتها على شاني

وهالحين بأعذرها واباقابل الإحسان
بالإحسان ما نبغى لا مجني ولا جاني

احب القصيد الذرب وأحرص على البنيان
ولا أقول عندي زود مير الله أعطاني


( مجاريات السجن )

[حمد الخالدي]

الكلام اللي وسط صدري دفين
كل ما اهرج ما يوصفه الكلام

واقتنعت إن السكوت احيان زين
خص لا صار الحكي يبرا العظام

كلمة المغبون وإن دارا تبين
ينفضح حتى ولو رد السلام

وإن مشى هو يحسب الممشى رزين
ينفرق ممشاه من بين الانام

الاسد لو ينجرح ينصى العرين
لين يبرا الجرح يلبد فالظلام

يا هجوسي عالجي جرح السنين
أو تنحي جانباً يالله بانام

كل ما غنيت يطويني الحنين
وكل ما صديت يذبحني الهيام


( الأرشيفات )

[حمد الخالدي]

تذكرت يوم إن الليالي عليك عجاف
وانا ما تركتك بين الايام وحداني

اداريك بالكلمه واللحن عليك القاف
واصب المسامع وانت من همك تعاني

ظروف الزمن سهله وأنا لا لفت ما اخاف
بفضل الولي وأنت أول شهود الأعياني

ولكنها تكشف لنا واقع الميقاف
من اللي يعزك صدق ومن له هدف ثاني

تغافلت عنك وقلت يمكن مشى ما شاف
ومره ورا مره واشوفك تعداني

ترى النفس حره والثمان إن لفت تنعاف
بعد عشرةٍ داجت بها كل الألواني

عيونك تدلك وأنت ما تجهل الاصناف
وعقلك عطاك ابسط تفاسير برهاني

( أرشيفية )

[حمد الخالدي]

لا تلوم الوقت لوم أهل الزمن لا صرت لايم
والله ان فيهم وفيهم والمشاكل داخليه

لوم نفسٍ في عماها والضمير الحي نايم
طول بنومه ولا صحاه ابو نفسٍ شقيه

خل همك يسرح بنفسك ولا يغريه حايم
والله ان النفس وسع الكون لا صارت رضيه

وانتبه من كلمتك لا قلتها للناس دايم
كم كلمة طيبة من لفظها صارت خطيه

حظ منهو عن جدالٍ يتلف الأعصاب صايم
وحظ من يضحك طرب ماهوب من شر البليه

وذعذعي لي يا هبايب نجد جعل الحظ قايم
والله اني عشت ما احب الكبر والعنصريه

مير لي قلبٍ ولو جار الزمن في نجد هايم
حبها يملا العروق وزينها ما شفت زيه

( هبايب نجد )

[حمد الخالدي]

والله ان القاف هين مير بالي به بلاوي
بين جده والرياض وجائحة تدعى كورونا

كنت ناوي مير جانا الوقت وأثره كان ناوي
والجماعه من دخول النجم راحوا و اتركونا

والرسايل ما توقف والسوالف عند راوي
وأحمد الله من بعد كبس القميري ما نسونا

هم دعونا وكم رجالٍ ينَّشدني..تخواي؟
دعوة قرومٍ تمنيت إنهم له ما دعونا

هيضوا قلب المولع والهواوي صار كاوي
لا تتطبب بي وانا قلبي مع اللي غادرونا

بي طبيعة لا بغيت الصيد ماني ذيب عاوي
صيدتي حق العشا لو يزعلون اللي احترونا

ويا الهواوي مثلك يقدر هوا قلب الهواوي
نرمي طيور لعشانا لين ننسى من رمونا


( فضفضة وتسالي )

[عبدالله الصقري]

الله الله ياحمد
صح لسانك ملاييييييييييييييييييييييييييييييييييييين
قصآئد من ذهب 24 قيراط صافي
مبروك المدونه و عساها عامره بقافك الجزل العذب
أسعدني ما قرأته هنا و كييييف مخي
يسعدك ربي ما حييت
ولك جل الود و فآئق التقدير والاحترام

[حمد الخالدي]

يا هلا بالصقري يا مرحبا
الله يبارك فيك ويجزاك خير آمين
أسعدني تواجدك ومرورك وتعليقك
خذ لك بياله .. ما قلت بياله خابر أهل جده يحبون الشاهي (:

[رحيل]

يا هلا برحيل
الله يبارك فيك ويجزاك خير نورتي الديوان
اقدعي وخذي لك فنجال :)

منور بـ اهله طال عمرك ..

مالقيت
لا حلى ولا قدوع
ماحب اشرب القهوة تسذا سادة
من اكل التمر عنا ههههههههههه


ديوآن
جميل ورااااائع
صح لسانك على هالابيات الجميلة ،
و ما يحتاج اقول ابدعت لانك صدق ابدعت

مريت من هنا

[حمد الخالدي]

دامها تسذا اجل شوفي صينية الحلا مع جهير
لقطها وراحت تركض للسجن
والا الصقري عطيته البياله ما بغاها لقط القدوع وراح للبحر خخخخخ
مالنا الا ابو عبيد نشري منه بس يبي يبيع جمله عساه يفرد

حياك الله وصح بدنك ولا هنتي يا الأميره

[حمد الخالدي]

حالي تردى والسبب نفسي وجزلات الهموم
تجمعت والنفس ما تامر بخير ومنفعه

ما أدري ألوم النفس والا الهم والا مين ألوم
والا رفيقٍ عافني يوم إن حصل مطمعه

يا كثر ما شفنا على وجه البسيطة من جروم
بالهرج تتصدر وبالشدات فرت مهطعه

واللي ما يحمي كلمته هذاك من روس الرخوم
يهرج ولا يحسب حساب الهرج ربي يقلعه

عز الله إني يا ولد زيزوم وأملك لي عزوم
ما دامني عايش بعد ما راح نصف الأربعه

سدي وبيحته وأنا بالأمس صبارٍ كتوم
واليوم أنا من علتي أزعق بصوتي وأرفعه

إليا ذكرت اللي رحل عيت عيوني لا تنوم
تلقى على خدي دموع العين تنزل مسرعه

اللي لبس ثوب الوفا والطيب لبسه للهدوم
اللي بكته الدار والساقي وكل المزرعه

عز الله إنه تفقده كل الحلاحيل القروم
ولاهو ترى عيبٍ على الرجال يذرف مدمعه

مير البكا ما يرجع اللي راح والعلم معلوم
ولوه نفع لأبكي بكا ليما تسيل المجمعة


( أول قصيده )
في جدي من أمي رحمة الله عليه

[حمد الخالدي]

يا عيوني خابر إن صدر المعنا يشتكي لك
وخابر إنك تكرمين الضيق باللي فيك كله

مير بالهون إن بديتي فالعلاج وفي مسيلك
ابعدي عن نظرة الشمات مع دربٍ ندله

ما نقول بحزة الكربه سوا يالله دخيلك
والحلول اللي تسر القلب نتركها على الله


( كيبورديه لم تكتمل )

[الجووهره]

أبدعت وأمتعت الخآلدي
وصح لسآنك ويعطيك العآفيه
والله يرحم جدك واموآت المسلمين
والله ما اخذت شي ياما في السجن مظاليم ههه
وترا جهير خيال لزقها فيني الله يهديه
لا تشوهون اسمي هههههههههه

[حمد الخالدي]

أفااا...والله ان القصد ادلعك اسم الوالده ذا يا دبه :)
لا هين البقلاوه للحين ناشبة فضروسك خخخخخ
صح الله بدنك وعافاك وبارك فيك .. اللهم آمين ويغفر لهم ويتجاوز عنهم

[حمد الخالدي]

الجواب اللي بدا ما له سؤال
والسؤال أصعب من أني أسأله

دام نشيان الغلا روس الرجال
ما يعيش اللي رضى بالمهزله

المعزه والكرامه راس مال
هيه حذرا من جهلك تقلله

السموحه يا تفاصيل الجمال
ما هقيت اني بابيع المرجله

ما بنا كامل ولله الكمال
هاه..جبت العلم..والا تجهله؟

استمع دامك تبي خف الثقال
الستار اليوم لازم نسدله

دام كل الكون قافيه الزوال
ودام قلبك ماق يوم ادلله

كم سقيتك من قراحي والزلال
وكم شربتك يا رحيق المنحله

في ظروفك شفت تحريم الحلال
وفي ظروفي كل شي تحلله

ما ألومك دام لاقلتي..تعال
صابني سحر المشاعر وارسله

لين باتت كلمتي فوق الرمال
ونسنس السافي عليها و الوله

دك في صدري وهشم له الجبال
وﻻ تبعت المقفيه والمقبله

والله اني ما تركت أية مجال
للبشر..صاير سواة المعضله

باح سدي لك..وﻻ فيها جدال
من بعد ما باح جات المشكله

صرت أجي شفقان لغصون الوصال
آتغنى..وآتمنى..لو صله

تدفن اللي راح من ضيم الليال
وتطلق اللي قيدته السلسله

بين نور آمال وأحلام وخيال
وبين تصريف الظروف المذهله

سقت شوقي لك على درب المحال
ما بغيت الا فؤادك أوصله

عشت افكر في شعورك حال..حال
لين صرت أقول ما ﻻ تقبله

ابتعدت أعلمك قدري..بدال
ما تصرفني على اللي تنقله

الوفا طبعك..ولكن الدلال
أوهمك بأنك ملكت المعضله!


( أرشيفيات )

[حمد الخالدي]

دام العذر ما تقبله يا منفذ اسطول الغرام
ودام المكابر ساد عاداتك وزاد المشكله

وش حيلتي لا صارت أشواقي يضيق بها الكلام
والحلم لو طول صموده وقتنا ما يقبله

دارت ليالينا وصارت ذاكره ترثي حطام
ترثي حطام أعياد ولت والبلاوي مقبله

كاني بديت بجرح قلبي يوم صوبت السهام
نصبر على جرحه وﻻ ضيم الأماني يقتله

تبي الحقيقه..ما بقى غير الأمل وسط الظلام
ومن الألم خارت عزومه وأرتمى فيه الوله

يا أصدق إحساس(ن)نشا في داخل أكوام الغلام
يا ضحكة الطفل البريء اللي نسى مستقبله

يا عنفوان اليوم والبارح ويا مسك الختام
يا منبع الفرحه ويا حامل صفات المرجله

صرنا من الواقع نهيم ونجهل حروف السلام
حتى ولو إن الصدور بكل ود محمله

ماهو ردى..مير البخت من بيننا جلد وعظام
واللي قضب روحي طبيعي لو يثير الأسئله

كثر التردد علني ما هو تبلد..ﻻ حرام!!
إعرف خفايا نيتي وإعرف شعور(ن)تجهله

ﻻ صارت البسمه معاك وصارت أيامي زحام
وصار القدر يرمي بصدري شي مثل القمبله

أبدا كلامي وانتهي منه..وﻻ قلت المرام
دام المرام أصعب حصوله..من زوال البهذله

عيني تشوف دموع عينك يوم تنظر فالغمام
مير المصيبه بالشعور إن لج كيف أوصله

بأحيا على طاريك لو الوقت يقسى كل عام
على النقا نفلح ونسري والدروب مطوله


( أرشيفيات )

[حمد الخالدي]

من الهاجس اللي ما تشكى من الاوجاع
ولـــو الـزمــن مـــا صـــف صـفــه ولا لـيـلــه

اسـوق القوافـي مـن طناخـة طويـل ذراع
واســخّــر لـحــونــي لـلــوفــا وآزن الـكـيـلــه

اهــوجــس بـحّـرٍ مــا يـهـيَــب ولايــرتـــاع
يــهــده ولــــد خــالــد ويـسـبــر محـاصـيـلـه

زمـانــي حـدانــي والـسـبـب قـلــة الانـــواع
ولانـــي بمـخـبـر عـــن نصـيـبـي بتفـصـيـلـه

عـرفـت البخـيـل الـلـي تـنـزّه عــن الـطـمـاع
وعـرفت اللكـيـع الـلـي يقـلّـب ونـوحـي لــه

سلكـت الطريـق ولانـي بجاهـل المـطـلاع
ولاهـــــو مـضـيـعـنـي بـفــخــه وتـظـلـيـلــه

اشـوف السحـاب اللـي بـه الـبـارق اللـمـاع
اشـوفــه واقـــول الله يـسـخّــر همـالـيـلـه

وتنزل مـن الضلـع المنيـف وتغَسـل القـاع
سحـابٍ يـسـر الارض وزهـورهــا سـيـلــه

وتحيـا بـه قلوبٍ كسـاهـا العـنـا وجـيـاع
وحـــــال الـقــلــوب الله كفيلٍ بـتـبـديـلـه

وسبحانه العالـم وش اللـي ورى الاضـلاع
وسبـحـانـه الـلــي قـادرٍ يـعـدل الـمـيـلـه

غرسـت الشجـر ميـر الثمـر مـا يكمـل صــاع
وانــــا خـابـرٍ حـظـي وهــــذي مـواويـلــه

وغيـري لفـى للسـوق واصبـح هـو البـيـاع
شـرى لـه دكاكيـن ومــن البـنـك تمويـلـه

يبـيـع الـربــع ربـــع ويـطـفـف ثـــلاث اربـــاع
وكــلــه يـجـيــب الــعــار فـعـلــه وتـعـلـيـلـه

وتبقى السباع سباع والا الضباع ضباع
ولا تـفـلــح الـضـبـعـه ولا تـنـفــع الـحـيـلــه

ولــو لا التطـبـع كــان بـانـت لـنــا الاطـبــاع
وطـبــع التـطـبـع ينـفـضـح مــــن تجـامـيـلـه

نـسـمـي مئآسـيـنـا عـنــا جــمــرة الـمـلـتـاع
قـضـى عـمــره الـفـانـي يـسـيـر مراسـيـلـه

وهــذي تفاصـيـل القـضـيـه والاسـتـطـلاع
وفـكـر الــذي فـكـره نـشـأ سابقٍ جيـلـه

اغني طرب واطـرب وتطـرب لـي الاسمـاع
وتـطـرب مشاعـرهـا وتنشد بها شـيـلـه


( أرشيفيه )

[حمد الخالدي]

صباحي رطوبه يا العذيه صباحك غير
وانا من زحامك رحت ادور غثا ثاني

احب الطريق اللي ما بين الوشم وسدير
خصوصاً مع القمرا ليا صرت وحداني

..

اعترف يا قلب لا تترك ايامك تقول
دام خوفك ما يبرر لك إن ما تعترف

شفت كيف اشجعك لو أنا طبعي خجول
مير اشوف الجو به غيم.. والا ما أعرف؟

..

يا لطيف الروح وش عندك سوالف؟
قولها لو كان معظمها سخيفه

هي سخيفة؟؟قولها لي ما يخالف
السخيفة من فمك تطلع ظريفه*

..

ليت كل آمالنا واحلامنا اللي صاحبتنا
تضحك الدنيا لها وتصير من ضمن الحقايق

..

كانك تقول الظروف..اللي طرت حتمت
نبدا حياة المفارق دون سابق خبر

باقول ربي معك بأنساك..وأقول مت
ومن زين حظي معك بالقلب صار القبر

..

يا زين جو السما صافي مع القمرا
أنا أشهد إن به علاجٍ يبري أوجاعي

وأطلق عيوني وأشوف نجومه الحمرا
أثيرها يسرق الألباب يا واعي

عشقت ضوح القمر فوق أرضنا السمرا
ما كنها الا عروسٍ تبخص أطباعي

..

بعض العرب ودك تجنب طريقه
اللي يتهبد لا زعل هبدة الثور

ما هو بهمي يا عساه بحريقه
مير البلا من عسته زادوا العور

( مقتطفآآآت )

[رحيل]

رحيل مرت من هنا
<< لازم نطمن على احوال الرعية ههههههه

[حمد الخالدي]

هههههههههههههههه شكراً جزيلاً
بارك الله في مجهوداتكم :)

[رحيل]

نحن هنا
نتفقد احوال الرعية والاطمنان عليهم
اذا ناقصهم شي وتسذا (:

[حمد الخالدي]

يا مرحبا بالاميره يا هلا نورت الحته
ايه لا خلا ولا عدم هذي المديرة والا فلا خخخخخخخ
إقدعي وتقهوي وإن قضت الدلة نثنيها :)

[رحيل]

لازم نمر ونشوف احوال الرعية (:

وراهم ماعندهم جديد ):
نعطيهم فرصة يومين
بعدها نتخذ العقوبات اللازمة هههههههه

[حمد الخالدي]

قلبي اللي علته ما هو خلي
وان خلا تلقى على جاله ملام

ولا يلام اللي يغيض ويمتلي
يتلف الاعصاب ويحوس المنام

[هزاع محمدالعاصمي]

جميل اخي الشاعر ديوان زاخر بالجمال والروعة
اسعدني المرور صح السانك ودام ابداعك وبالتوفيق

[حمد الخالدي]

جميل اخي الشاعر ديوان زاخر بالجمال والروعة
اسعدني المرور صح السانك ودام ابداعك وبالتوفيق

الجميل والله مرورك اخوي هزاع يا هلا والله ومرحبا
وصح الله بدنك وقواك

[حمد الخالدي]

خفق قلبي وانا اخبر الشعور وخابر القصه
واخاف الوقت موجه ما يقديني على الساحل

معي قلبٍ به اللهفات والآمال مرتصه
ومعي روحٍ من صدوف الليالي جسمها ناحل

..

هيه يا نفسٍ عنيده ويا قلبٍ جموح
وهيه يا وقتٍ به أفكار خلق الله كثار

الله يزيل الجهامة وننعم بالوضوح
والوضوح أهم حاجة بتحديد المسار

[حمد الخالدي]

يا كثر ما ننظم مشد لقصيدة
ويا قل ما يرضي مزاجي وذوقي

احيان نملا من كرمها جريدة
بالصدق نكتب والشواهد عروقي

واحيان نتركها ولو هي شريده
في نجد ترعى بين حاير وطوقي

نخاف هرجٍ ما يسر الفريده
ينهي بواقي جمرها في طروقي

ونغلق البيبان وقت الجميده
ونخايل ألوان السحب والبروقي

لا من كتبنا كل حاجة جديدة
ألقى بنفسي فيه حاجة تفوقي

يا هون مزلاج الرضى للحديدة
ويا كود عنوان الشعر في خفوقي

(( عنوان الشعر ))

[حمد الخالدي]

القلب له دقةٍ ما هي غريبة علي
والحيرة اللي بنفسي تكبح جماحها

لكن روحي تساحرني وأقول اعقلي
وترجع وهي تبتسم وتلون افراحها

جالست قلبي سنه واثره غدى ممتلي
واصبحت ادور على الضبه ومفتاحها

والليل طول وهو الصاحب المبتلي
كم ليلةٍ روحت ما فزت بإمراحها

هي بنت عز وشرف والعيب ما هوب لي
مير القلوب أذعنت بيدين جراحها

روحي تبي قربها والقلب ماهو خلي
والكلمه اللي بصدري تدفن اتراحها

هي وجهتي لا نويت أسلك طريق الحلي
لكن خايف تثور وتسحب سلاحها

[الجووهره]

أبدعت وأمتعت شآعرنااا
صح لسآنك ودآم ابدآعك

[حمد الخالدي]

أبدعت وأمتعت شآعرنااا
صح لسآنك ودآم ابدآعك

حياك الله يا الجوهرة يا هلا ومرحبا نورتي المكان
صح الله بدنك يا الأميرة

[حمد الخالدي]

إنجاذبي نحوها ماهو طبيعي
والصحيح أخاف لا أطيح متواسي

أشعر إن الجو لا طلت ربيعي
تكسر الروتين وتجدد حماسي

[رحيل]

كنت في طريقي للتاج شفت نفسي فاضية
قلت امر عليكم (:
نتفقد احوال الرعية ههههههههههههههه


دُعابة (:
ديوان زاخر يالخالدي صح لسانك مدد

[حمد الخالدي]

لا خلا ولا عدم ولو إن احوال الرعية على الفضوة اجل خخخخخخخ
زاخر والله بطلتك يا الاميره
حياك الله وبياك

[حمد الخالدي]

كلمة الصاحب ولو تشرب وتاكل
وسط صدرك .. لا تحيد عن الركاده

الحماقه ما وراها الا المشاكل
والفتن وإبليس يشعلها زياده

[حمد الخالدي]

هاجرت حتى لو انا في ديرتي يا اهل العقول
يا اهل العقول الصاحيه ديني ودين القرقعه

اللي يبيك يجيك ويوصي عليك أغلى رسول
ما هوب يزعق فالملا من شان يذكر بسنعه

ديني ودين اهل المهايط بالدراهم والأصول
حاجات من رب البشر لا يا سليل الإمعه

والى مدحته تبتلش ما يفهمك مهما تقول
والى نشدته تبتلش يحسبك ترجي منفعه

[ملكة الرواسي]

صح لسانك شاعرنا


مررت من هناااا

[حمد الخالدي]

صح الله بدنك يا المديرة
حياك الله وبياك

[حمد الخالدي]

أنا ما خلقني الله أجامل وأداريك
وأنمق كلامي مير ماني معقدك

أنا فالليال السود أسلم لك تريك
وأدلك على درب السعادة وأساعدك

وأرد الخطر عن سكة خطاك وأحميك
بعون الولي أشيل همك وأساندك

ولا ارضى عليك الشين يا زين وش فيك
بليا كلام أحس عيني تشاهدك

أشوف العرب هذي وأشوف العرب ذيك
تحوم وتحوم وشربكتها مصايدك

[هزاع محمدالعاصمي]

صح السانك على جمال متصفحك كنت رائع واكثر
كما اسعدني اخي العزيز مروري ارويتني شعراً هذى المساء بالتوفيق واعتبرني من متابعينك اخي الكريم دمت ودام مداد قلمك المفعم بالجمال

[حمد الخالدي]

صح السانك على جمال متصفحك كنت رائع واكثر
كما اسعدني اخي العزيز مروري ارويتني شعراً هذى المساء بالتوفيق واعتبرني من متابعينك اخي الكريم دمت ودام مداد قلمك المفعم بالجمال

حياك الله وبياك اخي الكريم هزاع
أنرت متصفحي وأثريته بمرورك الجميل
صح الله بدنك

[حمد الخالدي]

طرف الليل وهجوس الشعر له تدفعني
قلت اغني قالت إكتب وإنتبه لشعوره

كان له روحٍ تحس وخافقٍ يسمعني
والله إن ياصل كتابك باللحن والصورة

رتب إحساسك وهات الوافيه وإتبعني
للنقا دام القمر عم البلاد بنوره

إنثر إحساسك وعبّر لا تكابر..طعني
العمر واحد ولابدك تخوض بحوره

يسمع أصوات المشاعر لا قرأها المعني
وغيره يخايل سحاب حروفك المنثوره

[حمد الخالدي]

صليت فرض العصر وأمضيت نصف العصر
في واحة الذكريات اللي سقتها السنين

سجيت رجلي وراحت بي لبيت الحجر
من دون ما أشعر بحالي رحت يا مسلمين

حصلت بابه مشرَّع وأستمر السحر
ليما دخت ولقيت جنينة الأولين

اللي رِكز وسطها برحيتين وشجر
يمينها للعنب ويسارها كان تين

كانت طيور الصباح تدور حول الثمر
راحت وحطوا بها بنيان للعاملين

سجيت رجلي وأنا بأشوف حال الحِجر
وياليتني ما دخلت وشفتها شوف عين

سقف المقلط غدى اسود من حميس القدر
والمجلس الله وكيلك بالبضايع دفين

شاورت نفسي وقلت أرقى وأتم النظر
رقيت للطايه وحصلت لي حجرتين

راحت لراجو ومزمل وأخيه عمر
كانت لخالي وخالي توهم معرسين

حولت ضايق ولكني ذكرت العمر
اللي مضى وأندلع فيني شعور الحنين


( واحة الذكريات)

[حمد الخالدي]

أنا والليل صرنا أكثر من الأخوان
وش اللي في ليال البرد يجذبني

يطير النوم عني وانزل الميدان
واحس إن الفكر للشعر يسحبني

أصف بيوت وعيوني على البنيان
بحزة ما بها اللي حولنا يبني

أغني وأنطرب وألحن القيفان
بوقت أسحار يا الله لا تعاقبني

أحس إني قوي وأجندل الفرسان
وعنتر يرتعد لا جا يحاربني

شوي أفز واتعوذ من الشيطان
وأقول إن العشا لا شك متعبني

وألا يا ليل شفت العاشق الولهان
سرى ليله وهو ماهو بعاجبني

يقدم خطوته ويردها حيران
ووضعه بالشكل ذا ما يناسبني


( أنا والليل )

[حمد الخالدي]

لك بقلبي حاجةٍ ويش أسميها
تسرق البال وتعيشني لحالي

أتجنب مزحةٍ ما تدانيها
ولو بأمزح بأخلط المر والحالي

في ضميري كلمةٍ خايف أبديها
كلمةٍ ما هيب بالهون تنقالي

لي زمان وخاطري سارحٍ فيها
صاير المحتار لا يا بري حالي

تحت ضوح البدر أغني وأناديها
ثم تعود نظرتي تصحب ظلالي

أكره إن الخبل يخطي ويرميها
وهي مثل البدر منزالها عالي

ما درت عن رميته يوم يغديها
مير قلبي حر وشلون يهنا لي

[حمد الخالدي]

يا وردة الفُل ما أدري زهرة الأرجوان
يا نجمة الصبح يا حلمٍ بترنا يده

ليت العمر يسعف اللي ما خدمه الزمان
اللي غدى محزمه وعمامته وسنده

خال الخيال بعيونه لين وصل المكان
ومن يوم وصل المكان اللي يبيه فقده

كان يتحرى المطر والعشب والديدحان
لكن ما عيّن إلا بارقه ورعده

ويا مهرةٍ ما عسفها اللي يعسف الحصان
واللي يفكر يطاردها يموت جهده

في نجد عاشت بليا سرج والا عنان
ويا حظه اللي لقاها والله إن تسعده

أقفيت عنها وأنا حرٍ يخاف الطمان
حتى لو إنها شموخ وهقوةٍ مبعده

مير الهوا ما تهيا..لين فات الأوان
والطيب يبقى شذا ذكراه ما نجحده

((وردة الفُل))

[الجووهره]

صح لسآنك شآعرناا
ودآم ابدآعك

[حمد الخالدي]

صح الله بدنك يا الجوهرة ودام تواجدك وحياك الله

[حمد الخالدي]

ما للجفا داعي ليا صرت زعلان
عاتب..ترا معاتب رفيقك يسرّه

الصد دربٍ ملتوي فيه شيطان
والا الوصل خيره..يكافيك شرّه

وش عاد لا صرنا بني عم واخوان
متشابهين بكل حرفٍ..وذرّه؟!

نقطف زهور الخير من كل بستان
وإلى أظلمت صرنا نجوم المجرّه

شجعان..ونصاحب على الطيب شجعان
وإحساسنا عالي..ولله درّه

أحيان نجرح جرح..ويخرّ دمان
لإخراج سمٍ في مكوثه مضرّه

ونصبر على المرّه..وكله على شان؟
يسبق مذاق العافيه..كاس مرّه!
.
.
.
ما للجفا داعي

[حمد الخالدي]

الجو روعة وأنتي أروع من الجو
وإحساسك ألطف من هواه ونسيمه

وإسمك جمال وفيه عزّه وبه قو
وفيه الخصال الوافيه والكريمه

أضحك معك وأمزح..وقلبي على ضو
ضو إشتياقٍ جمرها في صميمه

طيفك لمع برقه على خاطري تو
ومديت له كف الغلا ومد ديمه

إيه والله أحبك..عدد ما هطل نو
وأضمر بنفسي كل كلمه حميمه

وأقول هذا الوقت؟ والا ماهوب هو؟
والليل راح وكل حيرة مقيمه

والصدق..أنا ما أحب ليتي ولا لو
عند المشاعر والنوايا سليمه

اللي لا جا الداعي على دروبنا جو
وأسقوا لنا ودٍ عسى الله يديمه