قصيدة في قمة الجزالة

[محمدبن عبيان القحطاني]

جربت في الدنيا تجاريب شــــــايب
وعرفت عدواني وميزت الاصحاب

وعرفت طبع الناس مخطي وصايب
ومانيب خبلٍ تخدعه ضحكة الناب

جنبت انا العالم وبعض الـقرايب
البعض منهم قربهم عقرب وداب

لو كان تعطيهم عيونك وهــــايب
ماينـفعونك جــيدهم عند الاجناب

ناسٍ يعادونـك بـــليا ســـــــبايب
حط الحواجز دونهم واغلق البـاب

واللي تكبر عنك شد الركـــــــايب
جنب طريقه واحقره كـنه ذبــاب

بعض البشر قلبه من الحقد عايب
لافيه طب وقلبه اسود من غــراب

عنده نجاحك من كبار المصايب
واذا سمع مدحك من الغيظ ينصاب

لولا الحيا سالت دموعه سكايب
مسكين من نار الحسد ماكل تـراب

اللي يذمك كلما صرت غـــايب*
وان جيت قدم لك تراحيب واعجاب

كبه ترى مثله مع الناس خايـب
عادات ابو وجهين يــكذب ويغتــاب

لو تغرقه بالطيب ماهوب طايب
لاتنخدع في مثل شـــرواه لو طاب

وتبقى الحقيقه يازمان العجايب
الروس روس ولو يغارون (الاذناب.

[شيخـــة الغــيــد]

/

قصيدة رائعه ابياتها حكَم

صح ذوقك يا أخي وبارك في جهدك
وصح لسان شاعرها

[ملكة الرواسي]

نص راقي
صح لسانك ملايييين
يعطيك العافية

[محمد الغنامي]

محمد القحطاني
صح لسانك وصح لسان شاعرها
ناصر الدوسري
سجل اعجابي وتقديري
ولك اجمل تحيه

[روابي]

محمد القحطاني
تسلم على الابيات الروعه
ومشكور على الطرح المميز
الله يوفقك

[محمدبن عبيان القحطاني]

هلا وغلا ياشيخة الغيد

الف الف الف شكر على المتصفح الرائع

[محمدبن عبيان القحطاني]

هلا وغلا ياملكة الرواسي

الف الف الف شكر على المتصفح الرائع

[محمدبن عبيان القحطاني]

هلا وغلا يابوبندر

الف الف الف شكر على المتصفح الرائع

[محمدبن عبيان القحطاني]

هلا وغلا ياروابي

الف الف الف شكر على المتصفح الرائع