تسأل عن غيابك طيور الشبابيك

[صـدووودٓ]

تسأل عن غيابك طيور الشبابيك
وتسأل زوايا بيتنا وين الأحباب؟
والفجر يسأل عنك ومصايح الديك
والورد نام.. وكان لابس لك ثياب
وعطرك.. وسلسالك.. وخاتمك يبكيك
ودفتر خواطر حاوي حضور وغياب
أشياء شتى حاويتك ومهي فيك
تنشد ولاني لاقي لبعدك أسباب
من جد.. لاني عارف آصلك وآجيك
ولاني قدرت أنساك وآقفل الباب
تدري غيابك بالدقايق تهاليك
وتغيب (عام) ولا خبر من ينجاب
وأدري الغياب يزعلك ما يرضيك
خابرك ما تقوى على صك الأبواب
وشلون غبت؟ وخابرك يوم أحاكيك
بتغيب يوم.. ومن هكـ اليوم باسهاب
يعني نموت من الحزن.. ما نلاقيك
ونصير من بعد الغلا.. غرب وأجناب
يا حيف.. كنت أغليك وأهواك وآبيك
يا حيف.. ماعدنا حبايب ولا أصحاب
شقول للأشياء لا جات تشكيك
سادي على هالناس.. لو كانوا أحباب
فاقدك قلبي حيل.. والعين ترجيك
والنفس تشره.. والعقل حاسب حساب
دفترك مبطي ماانفتح.. ناطر ايديك
فوقه بنى غبار الزمن كومة تراب
وتسأل عن أحبابي طيور الشبابيك
وآقول: "مدري وينهم.. بس غيَاب"

[محمد الغنامي]

صدود
صح ذوقك ياذوق
وصح لسان شاعرها
مروري وتقديري

[مهرة يام]

صدود
انتقاء جميل ومميز
يسلموو على الطرح
يعطيك العافيه اخوي
احترامي لك

[السيد زيني]

عسى يوم قريب يجتمع الاحباب
وتنتهي غصة الأشواق لمن غاب

انتقاء جميل ونقل رائع
حضور مميز بعد غياب


تسلم ايدك

[غزلان]

روووعه ي صدووووو ~
صح لسان شاعرهاااا ~
ودي وتقديري لك يالغلاااا ~
على اختيارك العذب ~

[صـدووودٓ]

كل الشكر لكم على جميل مروركم وتفاعلكم
لا عدمت اطلالتكم
يعطيكم العافيه