ديوان الأمير الشاعر (خالد الفيصل )

[ملامح خجوله]

صــاحب السمو الملكي الأمير
خـــالد الفيصل بن عبد العزيز آل سعـــود
( دائم السيف)
http://www.alfrasha.com/up/542339194658163562.gif (http://forum.5aa5.com/t46757.html)

كانت بداياته بالشعر وعلى لســانه كما قال :
http://www.alfrasha.com/up/1846397128693008415.gif (http://forum.5aa5.com/t46757.html)
‘‘ انفعلت ذات يوم بحدث... أحسست بكلمات تتفاعل في داخلي وتنساب على لساني تعبيراًعن هذا الانفعال، واستحساناً لمن حولي.
هكذا عانقت الكلمة لأول مرة وعانقتني هي ولا أدري أيُّنا بدأالعناق؟"

”.. وأنا لم أحاول أن أكون شاعرا ًلأن في الأسره شعراء، ثم إن أخي عبد اللـه هو أستاذي نعم أعترف بذلك لا أدري لماذا تفجَّرت العواطف والأحاسيس وشقّت مجرى للشِّعر؟"مجرى سال منه شعر يطرب الخاطر ونثر يسكن الفؤاد، وتهفو لـه نبضات القلوب”وجدت نفسي قادراً على تقديم شيء.. ولي ثقة أن لديَّ بعض الجمهور ولكن ليس الغرور.. كل ما أستطيع تأكيده أن لديَّ جمهوراً من المتلقّين في ميدان الشعر، ومثلـه في ميدان الفن التشكيلي "

وقد بدأت محاولاته لكتابة الشّعر وهو في حوالي الرابعة عشرة
عندما كان في مدرسة الطائف النموذجية

http://www.zahrah.com/zpix/wel067.gif


دايم السيف



وعن كتابته تحت اسم (دايم السيف) في بداياته يقول: ”لكل إنسان ظروفه وقناعته.. على أن الاسم المستعار وحده ـ بطبيعة الحال ـ لا يصنع شاعراً” ويضيف: ”وكل من يود أن يقدِّم عملاً جيّداً عليه أن يحترم الذين يُقدَّم لـهم هذا العمل الفنّي.. والتخوّف من هذا المنطلق احترام للنّاس وليس جبناً. هو احترام لمستوى القارىء واحترام لتذوِّقه.. والكتابة تحت اسممستعار تكون لجس النّبض.. وهي اختبار للشّعر لمعرفة مدى إمكانية وصولـه للمتلقِّي، وبحمد اللـه أثبت الشّعر نجاحاً فتم تجميعه في ديوان"

”والحمد للـه عُرف شعري قبل أن يعرفني النّاس، وهذا فخر لي"

ويقول شاعرنا عن هذا الاسم المستعار: ”إنه رمز يحتاج إلى شيء من الجهد للوصول إلى المدلول، لا سيّما في تلك الفترة التي لم يكن اسمي الحقيقي قد عُرف جماهيرياً بالشّعر بعد، فخالد مرادف لدايم، والفيصل اسم للسّيف، (ومن وقتها وحتى الآن أجد ميلاً إلى هذه الرموز المقننة في إنتاجي)"

http://www.zahrah.com/zpix/wel067.gif


والدته

هي (هياء بنت تركي بن عبد العزيز بن عبد اللـه بن تركي)، وأسرة آل تركي أسرة علم ودين وفروسية، وقد كان لأفراد هذه الأسرة إسهامات وجهود كبيرة في توطيد دعائم المملكة، ونشر لواء التوحيد على كافة أرجائها، وقد كانت والدة شاعرنا مثالاً حيا للأم الحريصة على تنشئة أبنائها تنشئة دينية سليمة تكون عوناً لـهم في مستقبل أيامهم وما ينتظرهم من مسؤوليات، وكانت في ذلك كما يقول الشاعر حافظ إبراهيم.

http://www.wtv-zone.com/emma/wedd/gifs/doverings.gif (http://www.kwkbh.com/4754-%D8%B5%D9%88%D8%B1-%D9%84%D8%AA%D8%B2%D9%8A%D9%8A%D9%86-%D8%A7%D9%84%D9%85%D9%88%D8%A7%D8%B6%D9%8A%D8%B9-%D9%88-%D8%A7%D9%84%D8%B1%D8%AF%D9%88%D8%AF-%D8%A7%D9%84%D8%AA%D8%B1%D8%AD%D9%8A%D8%A8.html)

زوجته
تزوج شاعرنا عندما كان عمره 25 سنة، يقول شاعرنا: ” زواجي كان طبيعياً، وكان باختياري أيضاً"ويكفي للتعرف على العلاقة بين الاثنين أن نقرأ الصفحة الأولى ـ الإهداء ـ من ديوان (قصائد نبطية ) والتي يقول فيها شاعرنا: إلى قصيدة العمر أم بندر:

لك يا عنود الصيد حرفي ومعناي .. عمري قصيدة حب قدمتها لك

معك أشرقت شمس المحبة بدنياي .. صورة قصيدي لمحة من خيالك


ابناؤهـ
لشاعرنا من الذرية ثلاثة أبناء وبنت هم:

1 ـ الأمير بندر: تخرج من جامعة الملك فهد للبترول والمعادن، وحصل على درجة الماجستير في العلاقات الدولية من أمريكا، متزوج، ويعمل في القطاع الخاص.

2 ـ الأمير سلطان: تخرج من جامعة الملك فهد للبترول والمعادن، متزوج من كريمة صاحب السمو الملكي الأمير بدر بن عبد المحسن، ويعمل ضابطاً في القوات البحرية.

3- الأمير سعود: وهو ما يزال طالباً.

4 ـ الأميرة لؤلؤة يرحمها الله: توفاها اللـه وهي في الثالثة من العمر.



اترككم مع شاعرنا الرائع (دايم السيف )

[ملامح خجوله]

حنا العرب



حنا العرب يــــا مدعين العروبة
وحنا هل التوحيد وانتم له أجنـــاب

وحنـــا شروق المجد وانتم غروبه
وحنا هل التاريخ وأنتم به أغــراب

يوم الفقر شلتوا علينا عيوبـــــه
واليوم عقب النفط جيتوا لنا أنسـاب

ويوم الفقر فينــــا البداوة سبوبة
واليوم صرتوا مثلنــا بدو واعراب

لو الهوى منكم منعتم هبوبـــــه
لا شك رزاق الملا رب الأربــاب

ولو المطر منكم منعتم صبوبـــه
لا شك رزق الخلق من عند وهـاب

جيش الحسد سقتوا علينا حروبــه
كل يبي يزرع على جسمنــا ناب

حرب على المحسن تراهـا عقوبة
بالله عســـاكم ما تفيدون حراب

يا ما عطينــــا ما ندور مثوبه
إلا من اللي من ترجــاه ما خاب

ويا ما نصرنـا صاحب ضيقوا به
عاداتنا نقدم الى مالردى هـــاب

ويامـــا نصانا من تعثر دروبه
يدخل حمانا من تعذرة الأصحـاب

حنـــــا بنينا دارنا من طيوبه
وانتم سلبتوا داركم كل ما طــاب

الله سقانا من بحرنــــا عذوبه
وانهاركم مثل البحر هدر تنسـاب

حنا زرعنا الحب بارض خصوبه
وانتم زرعتوا كره الأجيال بتراب

وحنــا دعينا السلم نوبه ونوبـه
وانتم حمــام السلم بعتوه بغراب

يا من دعا للحرب ما درك خطوبه
لا تحسب أن الحرب تهديد وخطاب

من شب نار الحرب يصلى شبوبه
ومن ثور الفتنة تعرض للأسبـاب

ما يستر الرجــال ملبوس ثوبه
الدين وافعال الكرامــة له ثياب

ما يقبل الرجال بحمـــاه حوبه
مـــا دام له حق وللحق طلاب

[ملامح خجوله]

(غـريـب والله)

غـريـب والله يـا حبيبـي هـوانـا

نستعذب الأشواق ما نطفـي الشـوق

شـوقـي وشوقـك هايمٍ في سمانـا

في ناظري حيره وفي ناظرك مـوق

نطـرد سرابٍ في صحاري ظـمانا

لا فيـه ميـرادٍ ولا حاصـلٍ ذوق

يـومٍ يـبعّدنـا ويـومٍ دعـانـا

ويـوم يلبّسنا خيال الهـوى طـوق

طيـفٍ يرغّـبنـا وطيـفٍ نهـانـا

فوق الثرى نمشي وحلم الهوى فوق

خيالنـا من كـل نبعٍ سقـانـا

وأيامنا تسوق عبراتنـا سـوق

ميعادنـا عند التمنّـي نسانـا

وظروفنا تزرع على دربنا عوق

[ملامح خجوله]

كل مانسنس

كلما نسنس من الغربي هبوب حمل النسمة سلام

وان لمحت سهيل في عرض الجنوب .. عانق رموز الغرام

لك حبيب ما نسا .. كلمته دايم عسى

اطلب الله وارتجيه .. صبح يومي والمسا

كل زين اشهاده وانتم بعيد منوتي ليتك معي

وان سهرت الليل اهوجس بك واعيد هل لاجلك مدمعي

وانت هاجس خاطري .. وانت فرحة ناظري

يا قريب ويا بعيد .. فيك امس وحاضري

نشوتك تلعب مع قطر المطر .. وانتشى قطره معك

والسحاب يطاردك بين الشجر خالق الزين ابدعك

الندى في وجنتك .. صار عطر بلمستك

والهوى غنى طرب .. تستثيره بسمتك

كلما ضمت عيوني منك طيف يا بعد كل الطيوف

قلت ما مثلك على الدنيا وصيف لا حشا مالك وصوف

لا سحاب ولا مطر .. لا نسيم ولا زهر ..

لا طيور ولا زهر .. ولا مع باقي البشر ..
لو نسيت

لو نسيت العمر ما انسى دمعتك

صرخة ذابت من عيونك دموع

ترتعش مرتاعة في وجنتك

وانتفض قلبي لها بين الضلوع

أزعجت صمت الليالي عبرتك

بالخفا ثوره وبالظاهر خشوع

تسكب الدمعه وتظمى نظرتك

مشهد النظرة وهي تظمى يروع

يا ضياع العمر ضيعة بسمتك

ضاع معها خافق مثلك جزوع

ليت من يمتص جارح لحظتك

والفرح يشعل دياجيرك شموع

[ملامح خجوله]

سريت

سريت ليل الهوى لين انبلج نوره

امشي على الجدي وتسامرني القمرا

طعس وغدير وقمر ونجوم منثوره

انفاس نجد بها جرح الدهر يبرا

يا نجد الاحباب لك حدر القمر صوره

طفلة هلال وبنت اربع عشر بدرا

حبيبتي نجد عيني فيك معذوره

معشوقة القلب فيها للنظر سحرا

فضة شعاع القمر في نجد مسحوره

من شاف لمع قمر في خدة سمرا

[ملامح خجوله]

طال السفر

والمنتظر مل صبره

والشوق يا محبوب في ناظري شاب

رد النظر

خليت بالكف جمره

سعيرها في داخل القلب شباب

عز الخبر

والمهتوي ضاق صدره

يا من يرد العلم عن هاك الأحباب

طيفه عبر

ما أرسل مع الطيف عذره

هو خاطره من لوعتي ما بعد طاب

هو ما ذكر

أن الجفا فيه كسره

للخافق اللي من هوى صاحبه ذاب

يا ما سهر

طرفي على حبس عبره

اردها والوجد للدمع جذاب

دمعٍ حدر

جاله على المنع جسره

عظيم وجدي للدمع شرع الباب

يوم وشهر

عزاه والعمر مره

والناس واجد لكن الولف غلاب

[ملامح خجوله]

في سحــــــــابه ..


في سحباه ..

على متن التمني

شفت عمري

خيال في سحابه


يا ذهابه ..

تعدى ما ارجهن

كن عامه

نهار يا ذهابه ..


من غدا به

ربيع العمر مني

حسبي الله

على وقت غدا به ..


إلتوى به

رجا قلب يون

ويل قلب تعلق والتوى به


في شبابه ..

حبس نشواه عني

ما تهيا لذيذه في شبابه


ذا صوابه

عقب ما هو طعني ..

لو نسيته يذكرني صوابه


من هقابه ..

يخيب كل ظني

واعذاب الخفوق اللي هقابه


رد بابه ..

زماني وامتحني

يوم ثور عجاجه

رد بابه


يا ربابه ..

على المسحوب غني

من قصيدي

بكى قوس الربابه .

[ملامح خجوله]

بنت الكحيله ..


بنت الكحيله مهــرتي

وخيالتي من كل اصيل

ألقى عليها طربتي

بين المعنـــــــق والشلــــــــيل

صدر وقطاة فلـــوتي

العنــــق والســـــاق الطويــــــــــــل

وقع الحـــوافر نغــــــمتي

وحــــداتنا رجـــــــع الصهيـــــــل

أبوي وجدي قدوتي

لو ما لهــــم عنــــــــــدي مثيل

بالدين تفخر عزوتي

والرمح والسيف الصقيل

ماكر حرار ديرتي

ما في هل العوجا ذليل

[ملامح خجوله]

ساعة الفرحة ..



يا ساعة الفرحه تشوقت للعيد

عيد العيون وعيد قلب الصبابه

رد الجمال لشوفتي يا اتلع الجيد

واسحب على حرفي لحون الربابه

حرفي بصوتك يا اجمل الصوت تغريد

يا رمز حبي هاك رمز الكتابه

يا صبح عمر فيك للعمر تجديد

وحبك يجدد كل يوم شبابه

للعين والقمرا وحسنك مواعيد

وليل الهوى شرع للأحباب بابه

ياما زعجت الصوت باسمك تراديد

وياما نسيم الوجد يمك سرابه

وياما تمنيتك على باقي الغيد

واقول مثلك يا غلا الروح ما به

ابيك تهوى مثل ما اهواك وتزيد

يا من خفوق القلب حسنك غدا به

يا قطرة الغيمه على يابس البيد

رد الحياة لخافقي يا ذهابه

[ملامح خجوله]

حدر القمر ..


حدر القمر صوّت لخله وناداه

ثلاث مرات وبالرابعة ون

حدر القمر يا ما همس له وناجاه

وعيونهم ياما بنوره تلاقن

والبارحه عدا على الذيب بعواه

واقفت ظنونه بالليال يتعادن

مرٍ حوالينه ومرٍ تعداه

ومر تضاحك له ومر يتباكن

هذي سواة اللي عن النوم قزاه

طيف الحبيب اللي على خاطره عن

ان شافت عيونه جمال تمناه

وان صوت القمري لصوت الهوى حن

الجارحه تجرح وتسري وتنساه

وجروح مجروح الليالي تساقن

والخافيه طعنة زمانه تمثناه

والبينه عنها عيونه يبوحن

[ملامح خجوله]

اون وريـــــــاح الــلــيـالـي تـــونِـــي

والـبرد فـي جـوفي كـما الغار خاوي

مــاكـن لـــي عــقـل ولا قـلـب كـنـي

جــذعٍ وقـف فـي وجـه الأيـام ذاوي

وبـــي عــبـرة مـحـبـوسةٍ تـمـتـحني

وفي عيني وحلقي وصدري شكاوي

وبــي مـن قـديم الـوقت جـرحٍ مـكني

وبـي مـن جـديد ايـام وقـتي مـكاوي

إن قـلـت زانــت خـالـف الـوقت ظـني

وإن قـلـت هـانـت عـاجـلتني بــلاوي

أجـــامـــل ايـــامـــي ولا جــامــلـنـي

هـامـت بــي الـدنـيا هـيـام الـخـلاوي

الــوقــت جــايـر والـلّـيـال اسـهـرنـي

والـحـزن مـا بـين الـضلوع مـتلاوي

أون وكــــلٍ يــحـسـب انــــي اغــنـي

عـلـيل وكــلٍ يـحـسب انــي مــداوي

[ملامح خجوله]

الحـزن في صـوتك







الـحزن فـي صـوتك ازعـج ساكني

لـين صار الكون من حولي حزين

غـصب عـني حـزن صوتك هاجني


لـيـن خـلَّـى عـاصي الـمعنى يـلين

وامـتـثل حــرف الـقصيد وعـادني


وانسكب حزنك على شِعري حنين

شِـلت أنـا صـوتك وحـزنك شـالني

أكْـتـم الـصـرخه ويـنـساب الأنـين

شِـفت حـزنك كـيف حـزنك شـافني

كـيف داهـم خـلوتي فـي لـحظتين

طـيـر أنــا مـثـلك زمـانـي ضـامني

جـرّحـتني مـثـلك سـيوف الـسنين

صـابـك الـلـى مــن زمــانٍ صـابني

فـي مـعاليق الـحشا جـرحه دفـين

الــفـرح عــقـب الـصـداقه هـابـني

خـافت الـبسمه عـلى وجهي تبين

طـير يـا اللّي صوت حْزنك هاضني

الله الــلــي يـنـتـصـر لـلـصـابـرين

[ملامح خجوله]

يـا صقـر









يـاصـقر و اهـنـيك لــك جـنـاح تـطير

لـى طـرى لك نزعت وطرت يم الهوا

بـيـن قـلـبي وبـيـنك فـرق والله كـبير

لـى كفخت انطلقت ولى كفخت التوى

انــت حـايم وانـا بـالقاع دوبـي اسـير

فـي صـحاري زماني ذيب ليلي عوى

فوق جوك سحاب وحدر جوي هجير
الـقدم فـوق رمـضا والـخفوق التوى

الـحـذر يــا صـقر لا يـشبكونك اسـير

ويــل صـقـرٍ يـتـله مـربطه لـى نـوى

بـرقـعته الـلّـيالي فــوق وكــرٍ قـصير

عقب صفقه جناحه بالهوا لى اهتوى

كـل حـرٍ الـى ضـاق انـتهض لـلمطير

حـومـتـه بـالـسما سـاعـة لـقـلبه دوا

واعــذاب الـجناح الـلّي يـجره كـسير

كّـلـما فــزّ مـكسور الـنواهض هـوى

[ملامح خجوله]

حـروف القـوافي









سمرت بصحبة حروف القوافي

احملها تناهيت خوافي

اشكل بالحروف الوان صوره

احركها من المعنى بصافي

اشيل الحرف من معنى لمعنى

واجاري ما زهر واظهر بخافي

والى مني عطيت الحرف ونه

بها حرفي على النجمات طافي

يقوم كل نجم من منامه

أنا ما نيب اسامر نجم غافي

يجيني كل نجم منه معنى

ولا قد قلت للنجمات كافي

تصور لي دموع وابتسامه

من عيون تقصوت ما تشافِ

ألا يا نجم يا عالي تبصر

شف بعين المحبه عين وافي

وخبرني عن علومه وحاله

عسى قلبه مع الأشواق دافي

ولو ممشاي في جمر يفيده

مشيت بجمرها كنه عوافي

ولكن وش يفيده لو ذبحني

ومن يوصف جماله عقب قافي

[ملامح خجوله]

ليـالي نـجد









ليالى نجد مامثلك ليالي

غلاك اول وزاد الحب غالي

ليالي نجد للمحبوب طيبي

امانه نور عينى ياليالي

حبيبي لى ذكرت انه حبيبي

دريت اني حظيظ وزان بالي

على شانه تهاونت المصايب

اذوق المر لاجل رضاه حالي

والى من الزمان اشتد حره

لقيت بقرب مظنوني ظلالي

عفا الله عنه مما جاني اول

غسل حبه جميع الهم تالي

[ملامح خجوله]

عـز القصيـد








عــز القـصـيد وزاعـلـتـنى حـروفـه
من يوم غاب اللي قصيدي ... مهاويه



غـابت به الـدنـيـا وخـلـت طـيـوفه
عـزي ... لـمـن مـثـلى زمـانـه يعاديه



عقب الـملاقـي بـس بالـقـلـب اشـوفه
وعـقـب الـمـناجي ... بس بالـفكر انـاجيه



كـلامـي وشـوفي لغيره ... حـسوفه
مـن غـيـره يـخـاوي غريبي واخـاويـه



يالـوعه الـمـشـتاق تصفق كـفـوفــه
لين الـتـفـت مـاشـاف بالـدار غــالــيه



كـن الـعـيون بكل شــيــن محذوفـــه
والـقـلب كـن جموع ... الأيام تـرمـيـه



تسابقـنــي من زمــاني ســيوفــه
تــجــرح مــرادي .. في حـياتي وترمــيه



ياعـونـه الرحـمـن ... ويـن الـنكـوفـه
لـيـن انـتـحي ... الـخـفاق وش عـاد يثنيه



مارحت ادور عـــنـد خــلــى مــروفـــه
مــايرحــم ... الا الله فــلا شـك مـغـلـيـه

[ملامح خجوله]

لو يبـور المـلا








لو يبور الملأ ما أحسب حبيبي يبور

وأحسب اني أموت ... ولايموت الوفا

وأحسب انه على هاك المودة ... غيور

ما احسب ان الشعاع .. اللي بقلبه طفا

كيف يانور عينى ... وانت للعين نور

يختفي نور وصلك في ظلام ... الجفا

اثر قلبك على فرقا الولايف جسور

واثر ... طرفك اليا سهرت عيوني غفا

وين هاك الونين ... اللي يشق الصدور

وين هاك الدموع ... اللي تشق الصفا

كل حي ٍ اليادارت لياليه ...يدور

كل قلب اليا ... عفت جروحه عفا

ويل قلب توالت فوق جروحه كسور

كل جرح الهوي ... ياصاحبي ماكفا

التمس لك عذر ... لو كان ما أنت معذور

وان جحدت الموده بان لك ماخفا

[ملامح خجوله]

•·.·°¯`·.·• ( أغير الطاروق ) •·.·°¯`·.·•



أغيّر الطاروق والقاف و أبدع
وأولّع قلوبٍ تحس بولعنا




و أسير في بستان الأشعار و أقطع
وردة قصيدٍ مثلها ما زرعنا



و أحاكي الوجدان و القلب و أنزع
من كل قلبٍ ونةٍ من وجعنا



و أجاذب الونّات في كل مطلع
لأهل الغرام اللي يونّون معنا



و ألاعب النغمات في كل مقطع
يطرب لها لبيب قلبٍ سمعنا



و أغازل عيونٍ بالأشواق تدمع
و أبكّي قلوبٍ و تجزع جزعنا



و أشاهد عيون المحبين و أجمع
من كل عينٍ دمعةٍ و ألف معنى



و أصبها في بيت الأشعار و أسمع
صرخة فوادٍ قال معك إندفعنا

[ملامح خجوله]

¯`·.·• ( تدلل علينا ) •·.·°¯`·.·•






تدلل علينا يا سمي الظبي وش عاد
تدلل و لك بامر الهوى شافعٍ عندي



و لك في خيال الشاعر المهتوي ميعاد
و مجلس على غيمه و ليلة قمر نجدي



أسافر معك لبلاد و انزل معك في بلاد
من غيمه لغيمه ولا للسما حدِ



رسمتك ضحوك الفجر يا فرحة الأعياد
و لمعة شعاعٍ ينغمس في ندى وردي



و غنيت بك صوتٍ لقلب الهوى ميلاد
و نغمة غرامٍ ذاب في لحنها وجدي



أشوفك مطر هتان لا برق لا رعاد
من الوسم يبعث بالصحاري زهر ودي


أحبك وصل و بعاد احبك رضا و عناد
و لا يختلف وعدي و لا ينتقض عهدي

[ملامح خجوله]

•·.·°¯`·.·• ( مجموعة انسان ) •·.·°¯`·.·•



قالت من انت و قلت مجموعة انسان
من كل ضد و ضد تلقين فيني


فيني نهار و ليل و افراح و احزان
اضحك و دمعي حايرٍ وسط عيني


و فيني بداية وقت و نهاية أزمان
أشتاق باكر و اعطي أمسي حنيني


و أسقي قلوب الناس عشقٍ و ظميان
و اهدي حيارى الدرب و أحتار ويني


و احاوم صقور السما حوم نشوان
و اسيل الوديان دمعٍ حزين


في عيني اليمنى من الورد بستان
و في عيني اليسرى عجاج السنينِ


تهزمني النجلا و انا ند فرسان
و اخفي طعوني و المحبة تبينِ


إن ما عرفتيني فلاني بزعلان
حتى أنا تراني احترت فيني

[ملامح خجوله]

•·.·°¯`·.·• ( ياللي حياتي ) •·.·°¯`·.·•


ياللي حياتي كلها منك تجريح
ما مر يومٍ سالمٍ ما جرحته


المشكل إنك واجد اللوم وتصيح
وأنت الذي طفل المودة ذبحته


ما انت بتعرف تريّح النفس وتريح
كم منظرٍ حلوٍ بكفك مسحته


لوّحت بي في ليل الأحزان تلويح
هذا عطاك وربحي اللي ربحته


أبيك تبرا لي على هبّه الريح
وتناصح القلب الذي بك نصحته


أثرك تدوّر عثرتي وين أباطيح
وش ينفعك لا قيل خلك طرحته

[ملامح خجوله]

•·.·°¯`·.·• ( ليتك معي ) •·.·°¯`·.



ليتك معي ساهرٍ ليل الهوى كلّه
مانوم أنا وأنت لأجل الحب سهرانِ


ترى السهر مع حبيبك يبري العلّه
لى صرت شفقٍ وهو عليك شفقان


كلش طراته الى وافق على حلّه
والا ترى كل شيٍ يالغضي فانِ


لاعاش خلٍ تنكر في هوى خلّه
يومٍ حبيب ويوم يصير قوماني


وش فيك دايم تعسر القلب وتتلّه
أخاف يومٍ يجي ما عاد تلقاني

[ملامح خجوله]

•·.·°¯`·.·• ( الله أكبر ) •·.·°¯`·.·•



الله أكبر كيف يجرحن العيون
كيف ما يبرى صويب العين أبد


أحسب إن الرمش لا سلهم حنون
أثر رمش العين ما ياوي لأحد


يوم روّح لي نظر عينه بهون
فز له قلبي وصفق وارتعد


لفني مثل السحايب والمزون
في عيوني برق وبقلبي رعد


نقّض جروحي وجدّد بي طعون
قلت:يكفي قالت عيونه بعد


وانعطف هاك الشعر فوق المتون
وانثنى عوده وقفّى وابتعد


أشغلتني نظرة العين الفتون
حيّرتني بالتوعد والوعد


هي تمون العين وإلا ما تمون
لى خذت قلبي وقفّت يا سعد

[ملامح خجوله]

•·.·°¯`·.·• ( ساافر ) •·.·°¯`·.·•



سافر عسى ربي يحرسك وياقاك
هذا البخت عزاه وش في يديني


يا شين باكر يا حبيبي بليّاك
لى جا وعدك اللي بوقته تجيني


لى قمت أدوّج في مداهيل ماطاك
يا ما جرى بشهار بينك وبيني


هذا وهو توّك تطرى بممشاك
وش لون لى أقفيت يانور عيني


ياشيب عينك يا هوى البال ماشْقاك
كانك مثل ما أبيك يا أسمر تبيني

[ملامح خجوله]

•·.·°¯`·.·• ( تغنت طيور أبها ) •·.·°¯`·.·•




تغنّت طيور أبها ومالت غصون الريف
ولبس الجبل غترة بياضٍ من مزونه



سرت في الروابي فرحةٍ مالها توصيف
تبسّم بها سلطان والخير مكنونه



تشرّفت بزيارة قروم العرب تشريف
هلا بالذي كل المراجل يرومونه



ترى العز بالجمعا ومن شذ راح ضعيف
ويمنى بلا يسرى بالأخطار مرهونه



إلين اجتمع رايٍ صويب وحد رهيف
ترى كل من راوز حماكم تردّونه



عملكم ظهر والهرج من غيركم تطفيف
يقولون لكن ما حصل ما يقولونه



صدقتوا نجحتوا وارتفعتوا عن التسويف
عسى الله يوفقكم على ما تريدونه



أحاول أجاري شاعر المجلس الحريف
وأرد التحية مثل ما جات موزونه



أرّوح عن اللي صابته شارة الهديف
رماه الشّطير اللي تركّد على هونه



أبأنصحك يا محمد تجي حزّه التصييف
وعلى سنه الله كل شيٍ تدركونه

[ملامح خجوله]

•·.·°¯`·.·• ( سلام يا فيصل ) •·.·°¯`·.·•





سلام يا فيصل عدد ما ذكرناك
وأعداد ما قالوا الناس مرحوم




وأعداد دمع العين يوم فرقاك
وأعداد مافرّجت من كرب مضيوم



إن قلت ياليتي ألا ياليتي فداك
وإن قلت واعزاه ما نيب مليوم



يالعن ابو من لام عينٍ تمناك
قد بدّدت شوفتك عن شوفها غيوم



وين العزا مابه عزا غير نجزاك
بمواصلة مسعاك والدرب معلوم



ترى عزانا يوم حنا فقدناك
إنا خذلنا راي من يزعم زعوم



الراية اللي رفرفت فوق يمناك
أبشرك يا شيخ ما طالها خصوم



إن كان قصد عداك تعطيل ممشاك
حقك علينا ما نوقف ولا يوم



نسير في دربك وناخذ سجاياك
ونرد من هو ضد الإسلام ملطوم



نم هاني العينين حنا تبعناك
والدار فيها لابةٍ مالهم نوم



إن قاله الله ما نضيّع لك مناك

نسجد لرب البيت في القدس ونصوم

[ملامح خجوله]

•·.·°¯`·.·• ( ظلمتني ) •·.·°¯`·.·•




ظلمتني والله قويٍ يجازيك
باللي بلاني خالق الناس يبلاك



شابهت عدواني وأنا طامعٍ فيك
أقرب قريبٍ لي هقيت انه إياك



اللي جرى لي منك ماهوب خافيك
روحي على حد الخطر من سواياك



والله ما غيرك بقلبي يوازيك
أغلى من الدنيا على الخد ماطاك



أشفق على اللايم إلى جاب طاريك

[ملامح خجوله]

•·.·°¯`·.·• ( قال الوداع ) •·.·°¯`·.·•


قال الوداع وقلت:ريّع لي شويْ
إصبر ترا عمر السعاده ثواني


قال:الظروف وقلت:عن ظرفها عيْ
تعال وقّف ساعتك في زماني


قال:احترق في شمسها وإنت في فيْ
ماكل ما غطى عيوبك كساني


قلت:العفو بأصبر على حامي الكيْ
وأكسيك من صبري كساوي حناني


قال:الحقيقة شي وأحلامنا شيْ
والشاهد الله ليت هذا مكاني


قلت:الوعد قال:الوعد يا بعد حيْ
لى صاح لك قلبي وقلبك دعاني

[ملامح خجوله]

•·.·°¯`·.·• ( كتبت لك ) •·.·°¯`·.·•







كتبت لك خطٍ ولا جاني ردود

ياليتي أدري وش مشغلك عني




هذا جزايا منك هجران وصدود
عزّاه يالمجمول خيّبت ظني





يزلّ ليلي ما تهنيت برقود
بين التوجد والسهر والتمني





ترى العمر يا مالك الروح محدود
ليّاك تنزع باقي الروح مني





أنا ترى مالي بدنياي مقصود

إلا اجتماع بك وأموت متهنّي

[ملامح خجوله]

•·.·°¯`·.·• ( لا والذي ) •·.·°¯`·.·•



لا والذي صورْك ما لاق للعين
غيرك ولا سوى بي أحدٍ سواتك


إنت الذي حطيت بالجوف رمحين
رمح العيون ورمح وردي شفاتك


وأنت الذي زيّنت يا غايه الزين
حياتي اللّي نورها من حياتك


أحب فيك الحب يا جامع اثنين
الزّين وطبوعٍ تكمل حلاتك


وأحب فيك العطف واللطف واللين
واحب فيك رضاك عقب زعلاتك


وأحب هاك الجيد بين الجديلين
وأحب ما تخفيه طرقة غطاتك


ياجارح المجروح لا تودع البين

يقضي علي بغيبتك وسفراتك

[ملامح خجوله]

•·.·°¯`·.·• ( لا هنت ) •·.·°¯`·.·•




[لاهنت ياراس الرجاجيل لاهنت
لاهان راسٍ في ثرى العود مدفون



والله ما أحطك بالقبر لكن آمنت
باللّي جعل دفن المسلمين مسنون



منزلك ياعز الشرف لو تمكّنت
فوق النجوم اللّي تعلّت على الكون



سكنت دار المجد يا شيخ وأسكنت
شعبك معك في منزل العز ممنون



صنت العهد يا وافي العهد ما خنت
علّمتهم وشلون الأشراف يوفون



كم ظالمٍ عاداك وأعفيت وأحسنت
وأخلفت ظن جْموع ناسٍ يظنون



شلت الأمانه حافظٍ ماتهاونت
شفنا بك رجالٍ على النفس يقوّن



ياللّي طلبه الملك بالحب زيّنت
عرشك بتاج قلوب شعبٍ يحبون



لوّنت تاج الملك ما قد تلوّنت
ما غرّتك دنياك ما صرت مفتون



بالزهد والمعروف والصبر كوّنت
منهاج فيصل منهج اللّي يعدلون



تلفّتت روس المحالق وين أنت
وين العظيم وعوّد الشوف مطعون



كم خافقٍ وقّف عقب ما تكفّنت
وكم ناظرٍ ذوّب سواداه محزون



لو شفت حال الناس عقبك تبيّنت
مقدار حب الناس للّي يودون



مما بقلبي قلت يابوي لاهنت
وإلا انت فوق القول مهما يقولون

[ملامح خجوله]

•·.·°¯`·.·• ( مابي وعد ) •·.·°¯`·.·•



ما بي وعد باكر ولا توعد اليوم
خلك بعيد وخل للحب قيمه



لا توقظ النايم تحرمه من النوم
ولا تبعث جروحٍ بقلبي قديمه



ترى له سنينٍ وهو عنك محشوم
وان عاودت بلواه صارت عظيمه



من عاد لأمرٍ خابره قبل مذموم
يستاهل الحسرات عقب الذميمة



كانك بزينك يا أريش العين موهوم
ترى لنا زودٍ على الصبر شيمه



ماعاد أنا في لمعه الزين مغروم
والرابح اللي حط عقله خصيمه

[ملامح خجوله]

•·.·°¯`·.·• ( مالوم قلبي ) •·.·°¯`·.·•




ما لوم قلبي لى انتفض عند طاريك
والعين تبكي شوفتك يا عناها


ياليتني ما أشد عن جال واديك
وأشارك الخلان صافي هواها


أقعد معك وأشوف زولك وأحاكيك
وأوصّل النّفس الحزينه مناها


ياما حسدت ربوعك اللي حواليك
بالشّوف يوم الله بقربك عطاها


أهواك أنا وأشتاق بالحيل وأغليك
وأرهي من أسبابك على العين ماها


مانيب والله يا هوى البال ناسيك
مادام لي روحٍ بوصلك هناها

[ملامح خجوله]

•·.·°¯`·.·• ( يغار سمعي ) •·.·°¯`·.·•








يغار سمعي ويشره كل وجداني

لى غاب صوتك نهارٍ ما بلغ سمعي




ياللي لقيت بنواعس عينك أوطاني
هي ديرتي هي ملاذ القلب هي ربعي





أملي النّظر من جمالك يوم تلقاني
وأحبس خيالك بعيني حبسي لدمعي





لى شفتك آعيش في عيونك أزماني
واخذ من نجومها وأشعل بها شمعي





من نورها سالت الفرحه بودياني
ومن سحرها قام يورق بالذّهب زرعي





يا واحد الحسن مالك بالعرب ثاني
عطني شرابك وخذ قرطوع من نبعي





غريب الأطوار والغربات ميداني
في غربة العمر وافق طبعكم طبعي





أصبحت تغريبتي وأصبحت عنواني

يا واحدي بالهوى يا اثنيني وجمعي

[ملامح خجوله]

•·.·°¯`·.·• ( زمان العجايب ) •·.·°¯`·.·•




يازمان العجايب وش بعد ما ظهر
كل ما قلت هانت جد علمٍ جديد



إن حكينا ندمنا وإن سكتنا قهر
بين قلبٍ عطيب وبين راسٍ عنيد



لو تفيد المدامع كان أسيّل نهر
مير كثر التوجّد والدمع ما يفيد



أصبر أيّام وأشهر وأتصبّر دهر
وإن حصل لي مناتي جيت لوني بعيد



أرجي الله وأراقب كل طالع شهر
يجلي الهم عني أو عسى ما يزيد



يا غزالٍ فضوح الزّين عنه اشتهر
في عيوني ملاك ووسط قلبي وحيد



مخطي اللّي يشبه وجنتك بالزهر
الزهر ماله رماحٍ تصيب وتصيد



لو جحدت المحبه سقم حالي جهر
مير ما كل قلبٍ ياصل اللّي يريد

[ملامح خجوله]

•·.·°¯`·.·• ( قلبي اللي ) •·.·°¯`·.·•





قلبي اللي لواه من الصواديف لاوي
جرّحته الليالي والحظوظ الرديّه






والله إني بوسط الناس كني خلاوي
من يلوم المفارق عقب فرقا خويّه





أشهد إن المفارق من عظيم البلاوي
مير هذا نصيبك يالعيون الشقيّه





أتجلّد وأقول إني على الصبر قاوي
والله أعلم بقلبٍ فيه الأشواق حيّه





كيف راحت يابو تركي حياتي شقاوي
وين درب السعادة والحياة الهنيّه





ليت لأهل الهوى والحب قاضي دعاوي
كان أداعي عيون اللي فراقه خطيّه





كنّي المبلي اللي قطّعته المكاوي
كل ما جظ بالونات زادوه كيّه

[ملامح خجوله]

•·.·°¯`·.·• ( شبيه صويحبي ) •·.·°¯`·.·•




يا شبيه صويحبي حسبي عليك
كل ما ناظرت عينك شفت ذاك




شفت لونه في خدودك والعيون
في سلامك في كلامك في حلاك



كل شيٍ فيك يطرى به عليْ
يا حلو بسمة حبيبي في شفاك



ما هقيت إن القمر مثله قمر
لين شفتك يا شبيه أحلى ملاك



ليتهم سمّوك باسمه وأستريح

كل ما نبّيتك أغلط في نباك

[ملامح خجوله]

•·.·°¯`·.·• ( فدوة عيونك ) •·.·°¯`·.·•




فِدوة عيونك لو غدت روح مغليك
وش عاد لو راحت لعينك عشاير



أبيع ما يغلى على الكون وأشريك
وأسوق لى جتني علومك بشاير



وأزعل جميع الناس بالحيل وأرضيك
وأصبر ولو دارت علي الدواير



وآخذ من أيامي لك أيام وأعطيك
وإن راح عمري لك فلا هو خساير



أحب أنا شوفك وصوتك وطاريك
دايم وفكري فيك هايم وحاير



بالصمت أهوجس بك وبالصوت أناديك
والله عليم البيّنة والسراير



أنا وقلبي والهوى بين أياديك
عندك مفاتيح الهنا للضماير



من روحي أحبك ومن روحي أغليك
يا من غرامه والحسن فيه ثاير

[ملامح خجوله]

•·.·°¯`·.·• ( كيف ننسى ) •·.·°¯`·.·•





كيف ننسى الكويت ومن غزاها
والحميّه لنا والمقدريّه




باكر الحرب لى دارت رحاها
ذاكرتنا تعرف انها قويّه



تحرق النار رجل اللي وطاها
والرديّه عواقبها رديّه



ما تهون الديار لمن بغاها
دونها الموت ورجالٍ عصيّه



كل نفسٍ تبي تلحق جزاها
وكل نيّه لراعيها مطيّه



كل عذرا بكينا من بكاها
هتكة العرض ما عقبه خزيّه



والعجوز اللي جندك رماها
وش سبب ذبحة النّفس البريّه



وكل طفل لكم نفسه عطاها
وش جنا الظفل من ذنب وخطيه



كل شايب وقف يسند فتاها
حالفين نرد الجابريّه



كيف ننسى الكويت ومن غزاها
باكر تشوف من ينسى خويّه

[ملامح خجوله]

•·.·°¯`·.·• ( قصيدة عمري ) •·.·°¯`·.·•






يا قصيدة عمري اللي تكتبيني
كل يومٍ حرف من نغمة هواكِ


ارحميني يا الهوى و الا اذبحيني
لا تخليني معلق في سماكِ


كل ما خذتي عمر مني عطيني
لحظةٍ من ساعةٍ داخل حماكِ


الحياة آشوفها و الموت فيني
وا عذاب اللي بغاك و لا لقاكِ


يسهر الليل و قمر طيفك بعيني
و الشعاع الصبح يوقظ بي رجاكِ


ان حدا حادي تولاني حنيني
و ان عرض طيفك على طرفي بكاكِ


كيف هذا من هوى قلبي يجيني
يا أرق الناس قولي وش دهاكِ


لو تماديت بملامي سامحيني

كم تماديتي بذبحي من طغاكِ

[ملامح خجوله]

•·.·°¯`·.·• ( من يقول الزين ) •·.·°¯`·.·•




من يقول الزين ما يكمل حلاه
كل شيٍ في حبيبي اكتمل



الله اللي كمله و الله عطاه
ما بقى للزين في خلي محل



العيون أحلى من عيون المهاه
شافها قلبي و صفق و احتفل



نظرته من فتنته شعلة حياه
و الجفون من الحيا فيها كسل



ساهمٍ رمشه على الخد و سناه
كن لمعة وجنته وردٍ و طل



و الشفايا كنها جمر الغضاه
تحرس الريق المحلى بالعسل



و الشعر ليلٍ نقل حمرة مساه
أجعدٍ حول على صدره همل



مايجٍ من فوق متنه ما طواه
لون شلالٍ مع المغرب نزل



إنطلق جيده يماري في بهاه
فوق مياسٍ تعزل و اعتدل



بالرشاقه فيه من ظبي الفلاه
لى مشى كنه على الريح انتقل



ريحته من كل زهرٍ منتقاه
و الزياده للخزامى و النفل



صافيٍ مثل المطر فوق الصفاه
باسمٍ مثل البشاير بالأمل



جامعٍ من كل زينٍ منتهاه
مستحيل الوصف في خلي سهل



كايدٍ ما هو يلين لمن بغاه
يرتفع عن كل سقطات الزلل

[ملامح خجوله]

•·.·°¯`·.·• ( استكثرك وقتك علي ) •·.·°¯`·.·•


إستكثرك وقتي علي وغدا بك
عادة زماني كلما طاب هون


ليت الذي وداك يت زين جابك
تشوف عقبك كيف الايام سون


شرق مشيت وغرب وقتي مشى بك
والقلب ماله لايم فيك لو ون


عقب الهنا بك ذاق لوعة وقتي عذابك
تلونت دنياه ولا تلون


طويتني طي الورق في كتابك
حتى معاليق الحشا لك تطون


إشتقت لايام الهوى في جنابك
يوم الشموع بليل الاحباب ضون


واشتقت أقول لهاتفك مرحبا بك
واشتقت لغيوم لصحاري تكون


عود ترى داعي الهوى عند بابك
وارو القلوب اللي بعد ماترون


غنيت لك عمري ولاجا جوابك
واسمي مع مجنون ليلى تدون

[ملامح خجوله]

•·.·°¯`·.·• ( لبست الليل ) •·.·°¯`·.·•










لبست الليل و عانقني قمرها

و زفتني نجوم الليل ساري








ركبت الموج أسافر في بحرها

على شطين ليلي مع نهاري









و عيني صاحبت لأجلك سهرها

و قلبي وهّج الظلما بناري









غروب الشمس أواصّله بسحرها

بنورٍ من شعاع الحب جاري









و إذا شفتك نسيت أطول شهرها

و طارت فرحتي و الوقت طاري









ضحك في عيني بشوفك بصرها

و غنى سمعي بصوت الكناري









و هلّت غيمتي بأحلى مطرها

و طالت كل الأغصان القصاري









رعاك الله يا ناعم زهرها





تفوح بريحتك رياض الصحاري

[ملامح خجوله]

•·.·°¯`·.·• ( غريب الدار ) •·.·°¯`·.·•




غريب الدار و مناي التسلي
أسلي خاطري عن حب خلي



سمعت الشور من قاصر معرفه
يحسب البعد عن داره يسلي



أسافر عنه من ديره لديره
عساي اسلاه لكن ما حصل لي



اهوجس فيه و أنسى اني نسيته
و افكر في ليالٍ قد مضن لي



أنا لا جيت أبنساه التوى بي
خياله و انهمر دمعي يهلي



و اشوفه واقفٍ من دون دمعي
حبيب القلب في عيني يهلي



دعاني يا غريب الدار عود
ترى ما لك محل إلا محلي



مكانك في عيوني يا عيوني
و قلبي من غرامك ما يملي

[ملامح خجوله]

•·.·°¯`·.·• ( تساوت عندي الدنيا ) •·.·°¯`·.·•





تساوت عندي الدنيا تساوت
و هي يومك قريبٍ لي تفاوت




حياتي عقب نورك مثل ليلٍ
جميع نجومه من أدنى تهاوت



ألا يا ناصحٍ بالطب روحي
تراها لو لقت طبٍ تداوت



و لكن من يعوّضني بخلٍ
معاليق الضماير به تلاوت



أنا وياه من عهد الطفوله
مثل قلبين في صدرٍ تخاوت



يجي عقبه فرح و الاّ حزاين
تساوت عندي الدنيا تساوت

[ملامح خجوله]

•·.·°¯`·.·• ( وش بقى باعطيك ) •·.·°¯`·.·•








يا وش بقَى باعطيك منّي و لا جاك

ما باقي الاّ روحي أحيا بها لك




أوصف جمالك كل ما انشدت و اهواك
و ازين ايّامي بجلسة خيالك





يا الغايب الحاضر بقلبي و لا القاك
أقرب من عْروقي و صعبٍ منالك





شالك زماني عن عيوني و ودّاك
لا شك وثّق في ضلوعي حبالك





يا حاجبٍ شمسي ورا ليل جفواك
ما بالعهَدْ بك قاسيٍ في دلالك





وش غيّرك يا مِنْوة القلب و اطغاك
علَى حبيبٍ ما تخيّر بدالك





دنياي ما تصلح بلا شمس دنياك
و اللّيل يوحش لوْ تغيّب هلالك





ما ينقطع ظما الهوَى إلاّ علَى ماك
و لا يهوّن حرّه إلاّ ظلالك





و لا تشوف العين زينٍ بليّاك
و لا يطرّب سمعي إلاّ مجالك





ولا انتفض قلبي من الحب لولاك
و لولاك ما يبدي علَيْ ما بدالك

[ملامح خجوله]

•·.·°¯`·.·• ( عوى الذيب ) •·.·°¯`·.·•




عوَى الذيب يا ساري
عوَى ذيبها حذرا
يردّ الظلام عواه
لضلوعه صياحِ
ترَى الّليل قمّاري
و عقب القمر غدرا
و من طاوله مسراه
زهّب له سلاحِ
أحد بالخفا داري
واحد بالخفا يدرَي
تشيل الدروب خطاه
و الصبح فضّاحِ
طويلات و قصارِ
و يمنَى لها يسرَى
يخاف القدم ماطاه
ما قام من طاحِ
عن العين متواري
توارَى ورا غبرا
يبيه النّظر و اخطاه
ما لاح لوّاحِ
علَى نهرنا الجاري
نوايا تبي مجرَى
مصبّه شكا مبداه
في بحر الاملاحِ
شمال الهوا عاري
جنوب الرمل جمرا
متَى الوسم ينثر ماه
تخضرّ الاسياحِ
إذا ما الصقر طارِ
علا بالهوا قدرا
وطنه السما و حماه
مخلاب و جناحِ
هواجيسي أشعاري
و لا للشّعر عُذرا
كتبته لمن يقراه
للصّاحب الصّاحي

[ملامح خجوله]

•·.·°¯`·.·• ( حومة فكر ) •·.·°¯`·.·•




ستّل جناحه ثم حام
يرقَى علَى متن الهوا



يزفّه بعيدٍ و انا
محدود في حد النظر



له بالهوا شفّ و مرام
يلعب مع الغيمه سوا



و لا جناحٍ لي و اطير
و الأرض صارت لي مقر



طيري ضرب جوّ الهيام
و لو دعيته ما التوَى



عزّي لمن طيره غدا
و لا له من أمره مفر



فكري تغشّاه العسام
أمسيت و فكري ما ضوَى



الأرض قفر من الونس
و الّليل من فرحي قفر



شبّيت ضوّي بالظلام
في صحصحٍ ذيبه عوَى



مالي أنيس إلاّ النجوم
أو نور وضّاح القمر



خالي و كنّي في زحام
قلبي تلهّب و انشوَى



ما عاد أميّز بالحشا
و الاّ علَى الضّو الجمر



وين انت يا داعي سلام
وين انت يا بايع دوا



ردّوا لي النومه ترَى
بالعين جلاّد السهر



دوّرت بالشَّده حزام
و لا لقيت الّلي قوَى



يا الله دخيلك ما لقيت
الّلي نشدّ به الظهر

[ملامح خجوله]

•·.·°¯`·.·• ( السما وردي ) •·.·°¯`·.·•




السما وردي و صحراي أزهرت
و السحابه بالهوى هلّت علي




يوم هلّت و استهلت و امطرت
روضةٍ عقب الوسم جاها و لي



و الجداول بين روضاتي جرت
ذا يسيل و ذا غديرٍ يمتلي



و الطيور بكل صوتٍ عبرت
من طربها في هواها تعتلي



و النسايم باجمل أشوافي سرت
من خفوقٍ ما هجع ليلٍ خلي



كل هذا يوم رجلك سيّرت
في مرابيعي و صرت أغلى هلي



في جنابك عاصي جروحي برت
كيف ما تبرى و حبك منهلي

[ملامح خجوله]

•·.·°¯`·.·• ( المعاناة ) •·.·°¯`·.·•




يا ليل خبّرني عن امر المعاناةْ
هي من صميم الذّات و الاّ اجنبيّهْ




هي هاجسٍ يسهرْ عيوني و لا باتْ
أو خفقةٍ تجمح بقلبي عصيّهْ



أو صرخةٍ تمرّدت فوق الاصْواتْ
أو ونّةٍ وسط الضّماير خفيّهْ



أو عبرةٍ تعلّقت بين نظراتْ
أو الدّموع اللّي تسابق هميّهْ



أعاني السّاعه و اعاني مسافاتْ
و اعاني رْياح الزّمان العتيّهْ



و اصوّرْ معاناتي حروف و ابياتْ
يلْقَى بها راعي الولَعْ جاذبيّهْ



و لاني بْندمانٍ علَى كل ما فاتْ
أخذتْ من حلو الزّمان و رديّهْ



هذي حياتي عشتها كيفما جاتْ
آخذْ من ايّامي و اردّ العطيّهْ

[ملامح خجوله]

•·.·°¯`·.·• ( الذاهبة ) •·.·°¯`·.·•





يا المعرفه يا ما سعيت أدوّرك و انت شرود
أمشي و أصوّت بالحياه . . يامن لقيت الذاهبه



دخلت أدوّر كل بيت و ظهرت أدوّج بالنفود
و أسأل مراكيب الزمان . . الشارقه و الغاربه



و لساري النجمه سريت
لعل نجماتي تجود



سافرت للبعد و مشيت أتبع فوانيس الوجود
و أزور واحات القلم . . عند العجم و العاربه



عوّدت للحرف و قريت أبي من الكلمه ردود
لقيت كتّاب الفلاه . . تطرد نياقٍ هاربه



يا المعرفه دونك غديت و الحد من فوقه حدود
و المدّعين المعرفه . . أجهل من اللّي طالبه



أبعد من أيامي مشيت و الحمل بالكاهل يزود
رجلٍ تورّدني خطر . . و رجلٍ تأخّر هايبه



لله توجهت و دعيت الخالق الفرد الودود
يدلني درب الرشاد .. درب العباد التايبه

[ملامح خجوله]

•·.·°¯`·.·• ( لا تملين الشعر ) •·.·°¯`·.·•


لا تملّين الشِّعر و انا القصيده
صاغها من لوعة ايّامي زماني


المعاني من غرابيلي جديده
من عذابي لحّنوا حلو الأغاني


كلّما ونّيت ردّوها نشيده
و اسمع جْروحي تصيح بصوت ثانِ


حرفي المجروح سامرهم يعيده
كلّما ودّعت موجوعٍ لفاني


معْ جميع الناس و افكاري وحيده
شالوا الحاني و انا شِلْت المعاني


زلّت الايّام و احلامي بعيده
و الغريب يعذّبه طول الثّواني


الحزن لَى ضاق في صدري شديده
أبتسم لين يغبّطْني من لقاني


يا حبيبةْ شعري و غالي خريده
يا اشتياق الرّوح يا داعي حناني


يا عروسٍ في خيالاتي فريده
زفّها ركب الغرام إلَى مكاني


انت و الايّام في وجهي عنيده
و اللّيالي ساريه و العمر فانِ

[ملامح خجوله]

•·.·°¯`·.·• ( أسابق الساعه ) •·.·°¯`·.·•








أسابق الساعه و تسبقني الساعه

تقضي و أنا توني بأول ثوانيها




أباشتري وقت وين أسواق بياعه
ياللي تبيع الدقايق حِد و أشريها





قلبي يبي وقت لو الوقت ما طاعه
وعيني تبي شمس لو الشمس تعميها





و نفسي مثل باقي الأجواد طماعه
أبي أجدد على الفرحه لياليها





لا شك الأيام للفرحات مناعه
لو نوَّرت ليلة العشرين تطفيها





يظهر ثبات الفتى و النفس مرتاعه
خوفٍ على اللي نحبه من بلاويها





لو إن كلٍ ينال مناه بذراعه
خذيت حقي من أقصاها و دانيها





المشكل إنك يا بو لحظين بتاعه
تاخذ سلاحي من الكفين و أعطيها





و أنا أدري إن العيون السود خداعه
لا شك ودي أصدق منك داعيها





و المهتوي إلا إهتوى مايطوي شراعه

يمشي على النار كنِّه ما وطى فيها

[ملامح خجوله]

•·.·°¯`·.·• ( الظنون الثايرة ) •·.·°¯`·.·•


استريحي يا الظنون الثايره
لا تشبين الحرايق بالخضر


دام الافلاك بسماها سايره
كل مطلع شمس له علم و خبر


يستقيم الخط و الا دايره
الله اعلم وش مع غيب القدر


العفو ما هيب عيني حايره
حيرتي بالفكر ما هي بالنظر


و روحي اللي في فلكها طايره
ما لها لو حلت عندي مقر


يوم زادت بالثرى عثايره
حلقت و الجو محفوف الخطر


بعض تلات الخوافق جايره
و الذي قد جرب التله عذر


التوى قلبي على سرايره
و الهوى فضّاح مكنون البشر


لو بغيت أجحد تبيَّن ثايره
له حريق و له شعاع و له شرر


والغزاله في فلاها ذايره
الله اقوى قد لها فوق الشهر


من يبشّرني و له بشايره ؟
السّما و نجومها بشارة قمر


قالها اللي فتحت بصايره
شاف و استعبر و عبّر و اعتبر

[ملامح خجوله]

•·.·°¯`·.·• ( في غربتي ) •·.·°¯`·.·•


في غربتي .. عارضت أنا ركْب الاغراب
أشدّ و أنزل و الليالي ركايب


أضداد و أقران و عدوان و أصحاب
متناقضات الخلق ما غاب غايب


و قامت تجاذبني على درب الاسباب
نفسٍ شباب يحدّها عقل شايب


أصبح على فجرٍ ضحوكٍ و عجّاب
و أمسي على همسات ستر العجايب


مشيت في رمضا وسنّدت بهضاب
وعارضني سيول ٍ وهبّة هبايب


وامسيت في صحراء وقيّلت في غاب
و من طاول الغربات شاف العجايب


مرتني الدمعه بها الوجد ما ذاب
في غربة الاشواق راحت هبايب


مرتني البسمه تقل فوقها حجاب
وراك خجلى يا رسول الحبايب


والحب مرّيته غريب ٍ على باب
عقب القصور امست قصوره خرايب


بغيت اسلّي خاطري عقب ما شاب
لقيت ما له بالتسلّي طلايب


أقفي مع المقفين وجل ٍ ومرتاب
على عقوق الوقت بالحيل عايب


في غربتي مرّيت .. رجلي وركّاب
أرزاق من رب الخلايق .. وهايب

[ملامح خجوله]

•·.·°¯`·.·• ( أحب الليل ) •·.·°¯`·.·•





أحب الليل و نجوم الليالي
حبيباتي أساهرهن لحالي




لقيت بصحبة النجمات سلوى
عقب ما فارق الخفاق غالي



ألا يا ساريات الليل سيري
على واديه مع مسرى خيالي



تجلي في سماء خل المودّه
و قولي للحبيّب وش جرى لي



هنيك يا نجوم تناظرينه
و أنا مالي على النظره مجالي



صبرت و كل حيٍ لو تصبر
إلا مالت ليالي العمر مالي



و لكني و لو شابت عيوني
أحب الليل و نجوم الليالي

[ملامح خجوله]

•·.·°¯`·.·• ( النيل ) •·.·°¯`·.·•




يا أسمر النيل عاودني عليك الحنين
من ثلاثين عامٍ ما تغير هواك




ساريٍ بي غرامك ما طوته السنين
كل ما قلت أبنسى زاد عندي غلاك



ملهم المبدعين و ساحر العاشقين
من قديم الزمان الفن زهرة عطاك



أسقني .. و أروني .. يا ساقي الخالدين
و أبعث الوجد من عاطر نداك



و مساك في قصيدي خيال و في ضميري يقين
و في لساني هواك و في عيوني بهاك



شاعرٍ من صحاري نجد لحني حزين
جيت أغني غرامي بين ماك و سماك



من رياض النشامى و قبلة المسلمين
حاملٍ لك خزاما و قحويانٍ و راك



أقبل الحب مني يا هوى الحالمين
طيف حبي على موجك سرابه ملاك

[ملامح خجوله]

•·.·°¯`·.·• ( الذكرى ) •·.·°¯`·.·•




في غير الزّمان
في نفس المكان
مَرّتني الذّكرَى و انا واقف
في نفس المكان
في غير الزّمان
في ذا ضحكت أيّام لكنّي بكيت
في ذا حلمت أحلام لكنّي صحيت
و منها ابتديت و فيها انتهيت
إلاّ من الذكرى
في نفس المكان
في غير الزّمان
قالت لي الذّكرَى كلام عنّي
كلام و اللّه بغيت أنساه
و صاحت ربابة شوق و اثر النّغم منّي
يشكي و انا شكواه
و غنَّى صوت في ليلة فرح
و هلّت عين و قلب انجرح
في صوتها جرح و تعب
و في عيونها نظرة عتب
و شفت ابتسامه عليها هلّت الدمعه
و نظرة ملامه من الماضي علَى ربعه
و انا مع الذّكرَى
في نفس المكان
في غير الزّمان
تعطيني الذّكرَى و لا تاخذ أبد
تحكي لي الذّكرَى و لا تسمع لاحد
و انا عندي كلام ممنوع حتّى على الخاطر
لا ياخذه أمسي و لا يقبله باكر
ما اقدر أوضّح غايم الصّوره
ولا أزود للمسا نوره
اللّه يا ذكرَى ياما فهمتيني خطا
ياما قدم رجلي علَى جمرك وطا
و اليوم هيّضني هواي
اشكي و لا ادري وش بلاي
هو من شقاي إللّي مضّى
و الاّ هناي
و انا مع الذّكرَى
في نفس المكان
في غير الزّمان

[ملامح خجوله]

•·.·°¯`·.·• ( الوعد ) •·.·°¯`·.·•





إنتظرت ازمان في ظلّ الوعَدْ
أحسبْ الخفقات يا أغلَى وعَدْ
إنتظرت و الظّاهر إنّك يا وعَدْ ماجيتْ
عيّا عليك الوقت و الاّ يا وعَدْ عيّيتْ
إنتظرت لكن النّجمه سرتْ
و القمر راحوا أصحاب السّمرْ
و نسمة وفا مرّتْ
و لفّت مكان الوعَدْ ضمّت
تعتذر و انتظر
إنتظرت ازمان في ظلّ الوعَدْ
ما احسبْ يجيني يوم أكذَّب احساسي
و الاّ أقول للّيل طوّلت يا قاسي
سقَى اللّه أمْسيَ العاشق
و نورك في السّما شارق
تعاطينا المحبّه شوق
تساقينا هوانا ذوق
نقول للّيل لا ترحل
تَرى الباقي معك أجمل
سرينا و الوعد باكر
حضرت و لا حضر باكر
إنتظرت ازمان في ظلّ الوعَدْ
اللّه ياهُو الوعَدْ ظالم
إذا جيته و لا جاني
و انا ما اظن ينساني
و يتركني لأشجاني
دعاني بالأمـل لكن مسح قدّامي دْروبي
و لا ادري شيْ أو لا شيْ
أغنّي فيه مسْحوبي
تأكّد يا وعَدْ و الاّ
ترَى لَى جيت باتْغلَّى
و باتأخّر و لَوْ لحظه
و اجيك اسابق اللّحظه
و لا أغمّض و لا غمضه
تفوّت من سناك ومضه
و إنتظرت ازمان في ظلّ الوعَدْ

[ملامح خجوله]

•·.·°¯`·.·• ( سواليف الورى ) •·.·°¯`·.·•



أستطيع أمنع لساني لا يقول
و أستطيع أمنع عيوني لا ترى


و أستطيع أمنع إيديني لا تنول
و أمنع أذني عن سواليف الورا


لكن المشكل أنا و شلون أحول
دون فكري لو خيالي به سرى


شارد أفكاري على رغمي تجول
كل ما عن الهوى و إلى طرى


كل نجمٍ للخيال أصبح ذلول
بالفلك طواف لا ضاق الثرى


شاغلي يا راعي الطرف الخجول
باع حبك في خفوقي و أشترى


يا ربيع القلب في كل الفصول
ورد حبك فاح عطره و أزهرا


مرني طيفك على العاده عجول
عز طيفك مثل ما عز الكرى


ما نفع تحذيري يا القلب الجفول
يرقد الخالي و عيني تسهرا


باسألك.. قل لي و لو فيها فضول
كيف تذبح من يشوفك ما درى؟

[ملامح خجوله]

•·.·°¯`·.·• ( سايق الخير ) •·.·°¯`·.·•




سايق الخير ساقك يم عاشق جمالك
لو تأخرت أبصبر لو هي ألفين عام



أسفرت و أنورت من يوم شعشع هلالك
فز قلبي لفزَّك ياضبي العدام



أنزل القلب و آمر مابه إلا حلالك
و أشهد إنه حظيظ اللي غدى لك مقام



ما يسد بمكانك غيرك أحدٍ بدالك
بانيٍ لك قصور وبانيٍ لك خيام



عقب رمضى زماني جيت ضلالك
بِل ريقي بقربك عقب طول الصيام



كل شي تبسم يوم لامس دلالك
و كل نار كوتني منك صارت سلام

[ملامح خجوله]

•·.·°¯`·.·• ( يا مسافر للجفا ) •·.·°¯`·.·•








يا مسافر للجفا و الوصل يبكي عليك

وين عهدك بالوفا للخفوق اللي يبيك




لي جناح و لك جناح و لا نطير إلا سوى
إسقني عذب القراح لي زمان أشرب هوى





ليت لي قلبٍ خلي ما عرف فرقا الوليف
لا عليه و لا عليّ لا ربيع و لا خريف





الهوى أمرَّه عجيب مرّه يسابق حلاه
إن صفى ود الحبيب الزمان أبعد مداه





ويل قلبي يالغرام كل يومٍ لي قصيد

إشتكى مني الكلام أجرح حروفه و أعيد

[ملامح خجوله]

•·.·°¯`·.·• ( للدار وحشة ) •·.·°¯`·.·•


للدار وحشه عقب سيّد هل الجود
وعيني غشاها عقب شمسه ظلالي


ما ألوم رجلك لو شكت كايد الكود
أتعبتها ترقى سنود المعالي


للجسم حد وغايتك مالها حدود
ظلمت نفسك من قديمٍ وتالي


تمشي وعرها كنه سهود ومهود
لله درّك ما تغاليت غالي


ما تنتظر للجود يا شيخ مردود
تشرب مرار وتسقي الغير حالي


ما ينثني عزمك خطيرٍ على الزود
من عاليٍ تجمح على راس عالي


يا طيبٍ طابت لك البيض والسود
أسرت في حبك قلوب الرجالي


يفوح مع ذكراك شذا الورد والعود
وكلٍ ينعم لك إذا جا مجالي


مرضك يمرضني وسعدك لي سعود
ياليتني أنقل عنك ضيم الليالي

[ملامح خجوله]

•·.·°¯`·.·• ( أنا والصحاري والمطر ) •·.·°¯`·.·•


أنا والصحارى والمطر والفرس والطير
ونبت الخزامى والظبي والشِّعر خلان


بنيت البيوت من الشِّعر والشِّعر تعبير
عن الماضي الحاضر وعمّا يكون وكان


أحب القَنَصْ بأرضٍ ما وطاها الغير
وصهوة فرس كل الكرامة لها ميدان


ومنظر غديرٍ ترتعش فيه شمس عصير
وطعسٍ حمر عقب المطر ما مشاه إنسان


وشوف القطا سربٍ تواقَع وسرب يطير
وفزّه ظبي حذّر بها غافل الغزلان


شمسٍ مضت بدرٍ ظهر والنجوم تسير
وريح النفل هيّض شجوني وأنا ولهان


وبالليل أشبّ الضو مع ضيفي التفكير
وبالفكر تقدح لمعة النّجم والضيان


أقلّب جمر ضوّي وبي مثلها تجمير
شرار وشرار وليل ومولّعٍ حيران

[ملامح خجوله]

•·.·°¯`·.·• ( جمال الروح ) •·.·°¯`·.·•




كتبت من الشعِر في كل معنى
ولكن وصف زينك ما بلغنا



أنا وشلون أوصّف زين روحك
وذاتك حسْنها ما قد شهدنا



أشوف الصبح في طلعتك باسم
وبك خجلة غروب الشمس شفنا



تجي مثل الكَرى شلطة حضورك
وما تبغيه من حلمٍ حلمنا



نشيت بعالمي منشى سحابه
يسابق نبتنا فيها زهرنا



أحبك حب صقّارٍ لطيره
يعاف النوم لو ريشه تثنّى



وأحبك حب شاعر للقصيده
إذا جت وَنْ وان عيّت يونِّى



وأحبك حب فنّان لفنّه
عصر روحه على شانك تغنّى



وأحبك حب هاوي للهوايه
قضى عمره ولا أدرك ما تمنّى



وأحبك حب من يفداك عمره
فتح قلبه وخلاك اتحنّى

[ملامح خجوله]

•·.·°¯`·.·• ( الولع غنى ) •·.·°¯`·.·•




الولع غنّى و أنا فيني ولع
هاضني مغناك يا ورق الحمام



مثلك اصوت ولا حيٍ سمع
ما لقيت أحدٍ ولو ينقل سلام



غيّبه عنّي زماني و انقطع
ولْ يا وقت التفرّق و الهيام



وين غيّبت اللي بقلبي زرع
زهرة الأشواق و غصون الغرام



يا قمر عمري إلى منّه طلع
خيّمت عقبك دياجير الظلام



كل حرٍ لين ضيّق به جزع
القهر ياصل به حدود العدام



كل ما لمته هوى قلبي شفع
ذا حبيبي كيف محبوبي يلام



لو تمادى بالتغلي و الدلع
ما تمادى بالقطيعه و الخصام

[ملامح خجوله]

•·.·°¯`·.·• ( الا يا عين هلي ) •·.·°¯`·.·•








ألا يا عين هلّي دمعك الصّافي على الخدّين

لعّل الدمع يا عيني يزيل الهم عن بالي




سهير الطّرف أهوجس و الخلايق كلهم ممسين
أنا و الليل و فوادي و دمع العين همّالي





إلى منه ذكرته صار ليلي يا سعد ليلين
ألا وا عزتا لي منه خياله تغايا لي





ألا يا ونتي ونّه كسيرٍ و العرب مقفين
كسير السّاق تالي الليل يذرف دمعه الغالي





إلى من غاب عن عيني نهارينٍ شكيت البين
و لو صاروا جميع الناس عندي كنّي لحالي





أعزّي نفسي الولهى و أقول الصبر لأجلك زين

و من يصبر ينال مْناه كانه صدق بالتّالي

[ملامح خجوله]

¯`·.·• ( نعمة النسيان ) •·.·°¯`·.·•





يا نعمة النسيان يا رحمة الله


لولاك أنا عزاه وش كان سويت






لو أذكر اللي كان دقّه وجلّه

ماكان ساعه في حياتي تهنيت









لولاي أسلّي خاطري جاه علّه

وأرتاح لين أرسلت بعض التناهيت









لى ضعت بالنسيان وقتي يدله

وليت يا وقت العنا كيف عييت









خل الفكر يرتاح والقلب خلّه

في غيمه النسيان يلقى بها بيت









أسج بعض الوقت ماهوب كلّه

وأعود كني ما عن الحال سجيت









وأشوف كلش ثابتٍ في محله

عن واقع الأيام ما كني أقفيت









هذا ضحى شمسي وهذاك ظلّه


والليل رعشه ساريات المواقيت

[ملامح خجوله]

•·.·°¯`·.·• ( لو نسيت العمر ) •·.·°¯`·.·•



لو نسيت العمر ما أنسى دمعتك
صرخةٍ ذابت من عيونك دموع


ترتعش مرتاعةٍ في وجنتك
وانتفض قلبي لها بين الضلوع


أزعجت صمت الليالي عبرتك
بالخفا ثوره وبالظاهر خشوع


تسكب الدمعه وتظمى نظرتك
مشهد المظره وهي تظمى يروع


يا ضياع العمر ضيعة بسمتك
ضاع معها خافقٍ مثلك جزوع


ليت من يمتص جارح لحظتك
والفرح يشعل دياجيرك شموع