الرائع .. عبدالله البكر التميمي ...

مساءكم / صباحكم ................. شعر
هــُنا واحة عذبة قطراتها من ذهب .... هــُنا قصايد حروفها من زهر

هـــُنا ....... عبدالله البكر التميمي

من هو عبدالله البكر التميمي

اول نجمة ..............

......... قصائد نصيه .............

ليلة فراقنا

المسافة وضيق الوقت .. وأشواقنا !
والكلام .. ووجيه المقبلين السمـر

والسؤال الوحيد اللي من أعماقنـا ..
ودي أسأله قبـل إن الدقايـق تمـر

القدر أو ظروفك .. أيهـم عاقنـا ؟!
قللي إن كان باقي لي بعذقـك تمـر

حسبي الله على اللي سبـب فراقنـا
ما رحم وقفة الذل وعيوني الحمـر

كل ساعة تعدي تخنـق أعناقنـا ..
كن حروفي حفاة وأرض وقتي جمر

تدري اليوم .. جالس احسب أوراقنا !
من يصدق تفارقنا بعـد هالعمـر !!

تذكر آخر لقاء والدمع .. وعناقنـا
كيف كان المكان بشوقنـا منغمـر

خايف إن الزمان اللي قبـل ساقنـا
للجفا .. يعجبه ما صار ثم يستمـر

وإنت روحي وأنا من ليلة فراقنـا !
أنتظر في مكانـي كـل ليلـة تمـر

بنت ٍ تفاخر بالقصيد

في جنون ٍ يَصفـع العقـل .. ويبـادر بالوعيـد!!
ويتمـادى ليـن يفـرض سَطوتـه .. بالإرتجـال

ويتحكم بالجِسـد .. كـن الخلايـا لـه عبيـد ..
يعرفون السمع .. والطاعة .. وحاضر .. وإمتثال !

إستغلـت حالتـي ((بنـت ٍ)) تِفاخـر بالقِصـيـد
لاتِعـزوى كـل بيـت ٍ فيـه بأوصـاف الجمـال

وأسردتلي مـن تِفاصيـل الغـزل مَوقـف فريـد
شاعـر ٍ ... يوصـف خطاهـا لاتِثنّـت بإختيـال

تعرف إني .. مارضيـت بغير(شاعرهـا الوحيـد)
وماولِد من قـال أنـا لـك نِـد بأوقـات النِـزال

ومن سِوايا غيرتي ..!! قلت : الجرايـد ماتفيـد؟
(( يحسب إني ماأعرف إنه سرقها من مقـال )).!!

وأضحكت كن الصيـاح بثغرهـا .. أمـر ٍ شديـد
يِلزم الليـل إيتنـازل عـن ( مفاتيـح ) الوصـال

وأمسكت يـدي .. وتابـع صبعهـا خـط الوريـد
لين قاده للصـدر وأشّـر علـى قلبـي وقـال :

بإسم مولاتي ... أهنـي الـروح بالنصـر الأكيـد
يوم فازت بإستثـارت ( غيرتـك ) بيـن الرجـال

وصدّ عني .. فارس ٍ ماشاف بـي خصـم ٍ عنيـد
شـاف شخـص ٍرافـع ٍ رايـة قـدوم الإحتـلال

بعض يـدي يرتجـف والبعـض يطمـع بالمزيـد
وشـوف عينـي ماكِفـاه لسـد بـاب الإحتمـال

قلت أنا مانـي بوعـي ٍ قابـل إن الإيـد إيـد ..!!
هي أنامل كفها ..؟ ولا حريـر ٍ خِيـط شـال ..؟

إسحرتنـي بالجمـال الـلـي خـذانـي للبعـيـد
للسحاب اللـي يـداري بالحضـن روس الجبـال

وإجبرتنـي أرتكـز .. قالـت : تِأمـل يـا وِليـد
قِس مِسافات الغـرام إن كِنـت راضـي بالخيـال

قلت شوفيلي طِريق ٍ صِنـع مـن عـذب الجليـد
جابني من مِظلمـات الأمـس وبليّـا سـؤال ...!

جيت أقايـس هالمسافة.!وأكتشفـت إنـي بليـد!!
دام عقلي من جنون الحـب والعشـق إستقـال ..

جعل بفراقنا " خيرة " !

أرجوك .. كل الحكي معروف .. من بدري
مافيه داعي تعيده .. شـوف لـك غيـره

تدري ..! أبآشاركك .. باللي شغل فكـري
وخل السوالف .. ( رحى ).. وقلوبنا تديره

سنتين مرت وأشـوف الثالثـة .. تجـري
وحنـا نجامـل .. وكـل ٍ بـان تقصيـره

قد قلت لك من زمان .. إن غبت من عذري
ما قوى علـى الهـم والغربـال والغيـره

وشلـون أبقـوى .. ودم فراقنـا يسـري
بعروق الأيام .. من كان الصدر .. ( ديرة )

لين أثقل الهـم كتفـي .. وإنحنـا ظهـري
ودنقّت .. والبال .. طـاح بكفـة الحيـرة

وماشفت . بعيونك النعّاس .. مـن قـدري
غير إني اللـي كِسـر خَاطـر مشاويـره

تذكر .. قبل كم سنة يوم الجفـا يطـري !
وتقول لي : بس عـاد .. وفضهـا سيـرة

كنت إنت ..؟ ولا أظن إني أنـا آهـذري ؟
أو هو حلم .. يشتكي من كِـذب تفسيـره

بالحالتين .. الحبر جَف ْ.. بـورق عمـري
ولا عاد ينفع نعيد ..اللـي قِضـى خيـره

يا أعز من ب..أتركه للبُعـد .. وأستَـذري
تحت ( إني الطهر .. وإنه درب ما آسيره )

خلاص .. كل ٍ يدور له طريـق .. أدري .!
ما نيب أبشكي .. جعـل بفراقنـا خيـرة !

من كم سنة كنت أعز إحساس في صـدري
واليوم دار الزمان .. و ( فضهـا سيـرة )

للطرح بقيـــة

...... قصائد نصيه ........




زعلنا البارحة !


ما بقى !
يمكن يخلينا .. اصدقاء ..
أو يسمح لباقي مشاعرنا ..
بأحاسيس ولقاء !


وط صوتك حبيبـي .. السمـاء تسمعـك !
ليه تفضـح زعلنـا البارحـة لـالمطـر .

ماتخاف إن لمحك تصيح .. جـاء يتبعـك
وتغرق هالمدينـة .. مـن سبايـب قهـر

صب كـل الحكـي بإذنـي ترانـي معـك
وإن سكرت .. إعرف إن عيني تحسبك خمر

ولا تقول الهبـوب اللـي مسـح مدمعـك
والله أن أربط يديـه .. بيديـن الشجـر ..

ما يمسّح دموعك .. غيـر مـن يمنعـك
ومن يبي يمنعك غيري .. مدامك سحر .. !

خلني بيـن قلبـك وبيـن نحـف أضلعـك
يمكن إن شافني قلبـك .. يـدور عـذر .

كنـك الرجـم .. وإيدينـي تبـي تطلعـك
وآتمايل وأصيـر .. معلـق ٍ فـي حجـر

لا وصلت لغـلاك .. ولا قـدرت أجمعـك
ولا بقى بيـن هالثنتيـن .. غيـر الصبـر

يا كبر قـدرك بقلبـي .. ويـا مسرعـك !
لا تمشيت مـع دمـي .. وأشوفـك تمـر

يوم كنت تحكي لي .. كنت أبوس إصبعك ..
ويوم طال الكلام .. شـوي قلـت : أنتظـر

لا رقيت لخدودك .. مـن يبـي ينفعـك !!
مـا يـرد الظـلام .. الا طلـوع الفـجـر

وط صوتك حبيبي .. لـو أنـا ماأسمعـك
مابي أحـد ٍ يشاركنـي .. بصـوت القمـر

أ.......حبك

غفلة وانا آراقب مدى وادي الظـلام بصمـت
تسلل بالخفـى ظـل الخيانـة مـن ورى ظهـري

وأنا في كل عزي فـوق صخـرة قصتـي ماقمـت
دريـت أنـه وراي ولابغيتـه لا قــرب يــدري

لعلـي أكسـره بـأول كلامـي لامـن إتكلـمـت
وأنا أخاطب ضميره وآتشكى مـن وجـع كسـري

عمدت أكتب ( أحبك ) عـالتراب بلا ( ألف ) مادمت
أعرف إن ( الألف ) تعني ( أنا ) وتطيح من قـدري

بديت أهمس بإذن جوفي نسيـم يصيبنـي لاهمـت
تناهيد ٍ بـدت تحبـي ألـم ليـن أصبحـت تجـري

على كبـر الخيانـة والتناسـي والكـذب قاومـت
ثمـان شهـور لا طـب ٍ يعيـن ولا دوا يـبـري

أجـل أتـرك مكانـي للغيـاب وهقوتـي أجرمـت
وأجي وألقى الجريمة من يدين أجناب في صـدري

وانا ياويل حالـي قبـل أغـادر دنيتـك صممـت
أعـود بـلا عتـاب ولا مـلام وخافـق ٍٍ عـذري

من اول ما عرفت إن البحر دمعة قهر بـه عمـت
إلين أصبحت في جوف الورق غرقان في سطـري

أتمتـم بالكـلام اللـي كتبتـه وأمسحـه لانمـت
أخاف أحلـم وأكمـل ماكتبـت وينفضـح سـري

ويدرون الملا عن ماحبستـه بالحشـى وأقسمـت
أخبيـه لذبـول آخـر ورود الحـب فـي حجـري

ومر الوقت وإحساسي مابين آلمـت / مـا آلمـت
وظهـري يرقبـه عيـن ٍ تلـد تشـوف مايجـري

وفجأة .. خالط الموقف شهيق المذنب اللـي لمـت
ونبظاته بـدت تزعـج حشـاي وتقتـرب حـدري

مسك كتفي وهو يهمس ( تراني في غيابك صمت )
وحظني وأنفتح دفتر دمـوع ٍ مـن شهـر مقـري

نزعت إيده ونفضت اللي بلبسي من غبـار وقمـت
وخليت الذي يبكي ورى ظهـري .. ورى ظهـري

إنــســان غايــب

ليت المحبـــة ( كــــــــاس ) !
وأقوى على كسره ..

وليت الكـــلام ( إحســـاس ) !
ماهو كذا حســـــــرة ..

يمكن بقى فينــا ..
نـقـشــة اســامينـــا .. وسط الغصن الأبكم ..

لكن !!

كل الطـــرق عســرة ..

غابت سماء زرقا .. وشمس .. وهبايب
ولا بقى لي غير .. ليل وبعض هَـمّ . !

يسألني العالـم عـن إنسـان غايـب
وعجزت من حزني عليـه .. آتكلـم !

إن كان باقـي لـي دعـاء وطلايـب
فالله .. يعيد شفاهـي اللـي تِبسّـم ..

مريت بـدروب ٍ قديمـة .. عجايـب ؟
حتى المكـان اللـي تركتـه .. تألّـم !

بيـت ٍ قديـم وبـاب مبلـي وذايــب
وجدار .. من خـوف الملامـة تهـدّم

وماضي وعشـق وذكريـات وحبايـب
وكلمات .. مكتوبة على غصن أبكَـم !

بس التـراب اللـي وفـا .. للخرايـب
وغطا شوارعها .. لأجل يحجـب الغَـم

كن داخلي طفل ٍ لـه إحسـاس شايـب
وإتركتـه الدنيـا .. إلـيـن إيتعـلّـم

وكن الشجر .. رجل ٍ يعـرف السبايـب
ومات .. وترك كل الحيـاة .. إتنـدّم !!

دام العشق خايب .. والإحساس خايـب
و ش لي .. أمر بصوب بيته وأسلـم ؟!

ذكرنـي ( ترابـه ) بإنسـان غـايـب
وعجزت .. من حزني عليـه آتكلـم !!

للطرح بقية

▌ ... ابيات منوعه... ▌

أضيق وأرفع يدي لله .. وأظل أطلبـه !
وأمش دمعي .. وأقول إن طالت الله لنا ..

وألد عيني .. لسجـادة صلاتـك يبـه ..
وأقول : كان آخر أيامه .. يصلي هنـا !


&&

ما على عقلي سلاسل ولا قلبي قيـود !
وماني منزه على الناس بالصح والخطا ..

حظي اللي حط رجلي على خـط الحـدود
لين نامت ذكريات بـلا ستـر وغطـا !

لو بيدين العاشق الراحل لغيرك .. يعود !
كان بان الصدق بعيونه وبـان العطـا ..

&&&


طاحت سنيني من يدين أحباب !
من وين أجيب أيام وأحيى بـه

&&&


فراشة يلاعبها الهـواء بيـن صبـح وليـل ..
تنـام ووسادتـهـا ورود وغطـاهـا حــب

وتصحى علـى قطـرة نـدى ماسكـة منديـل
تبـي تمسـح الدنيـا طهـارة وطيبـة قلـب

إلا من مشـت ينبـت بأثـر رجلهـا قنديـل ..
وإلا من حكت يفـرح شجـر كـل ذاك الـدرب

وإلا من بدت تضحك بدا كـل غصـن يميـل !!
ويظهر ( صدر ) .. جوفه خضار وضلوعه حدب





يا رب إمتلى جوفي ذنوب وثقل ممشاي !
وأنا الخايف اللي يرجي العفو والتوبـة .


&&&


تاقف على رمل البعاد ..
وحـولـك أحبـابـك !

عينك على كل الفضاء ..
وعينـي علـى بابـك





لا تخيلت بكره .. وش يبي يصير !!
قلت : ربي .. عسى يعطيـه خيـره

جاء لقلبي .. وهو شيخ الغناديـر ..
وغاب عني .. وهو عيني البصيرة ..





يفز من غصني اليابس حمامة سـلام !
وتطيب نفسي من الشكوى .. وكثر العتب

مرات أحس الزمن .. ما يستحق الملام ..
ومرات .. يصعب علي أحزن بليا سبب !!


&&&


يرتاح سرب الهموم إن صوتوا بالأذان !
وترق نفس الرجل .. لو كان قلبه حجر ..

الله يبارك لكـل المسلميـن رمضـان ..
وتطيح منا الخطايـا ويتبقـى الأجـر !!





وحيد .. إستفردت في صدره الظلمى .. وغاب النور !!
حيا بأرض الغرام .. وماتـوا أصحابـه وجلاّسـة ..

&&


لا يطول الزعل الله يخليك .
ما يفيد الزعل والله فديتك .




ليه الأيام خرساء .. مـا تـرد السـلام
وليه حتى السنين الماضية .. ما ترد .. !!
لي سنـة رافـع ٍ كفـي .. بليّـا كـلام
وإنكسر خاطر الغيمـة .. ورد الرعـد





لا تسألي يا عصافير الفجر عنها !
خلي دريشة لقانا .. وإرحلي عني ..
هي في يدين الرياض اليوم .. لكنها
في داخلي .. وهذا هو اللي مجنني !

&&&


سامح الله خطاك إن كانك أخطيت !!
ما يفيد العتب .. يا نـور عينـي ..
روح كمل طريقك .. وإن تناسيت ..
بأطلب الله عسى اللي فيك فينـي !




أبيك تذكر كلمتي .. لا تماديـت !
محد ٍ يبي يفرش لك الأرض زيي
ماهو عشانك أجمل اللي تمنيـت
كم بنت ٍ أبدت لي غلاها .. وأعيي




الحين "أحبك" وأمس تمشين بخطاك !
لا تاسعـك دنيـا ولا تاسعـك أرض
ألحين " أحبك " وأمس متبرجة هناك
وأنا أقرض يديني من مشاهدك قرض





مطار ..
وناس تحجز للمفارق .. عمد !





( شمس ) .. ضمي يديّ .. أبغى دفى يديك !
زاد .. بـرد الغيـاب اللـي بـصـدري ..




للطرح بقية

قصاصات وبطاقات تألقت بحروفه...

سجادة صلاتك يبه

إختارت فراقي

لو بالسهر دم !

تصبح على خير

كم مرة إنجرحت ؟!

دمعات النساء حِـرفة

يارب إمتلى جوفي !

ظنك الدنيا تنسينا بعضنا ؟!

وداعة الله .

ظنك كذا يا شمس ؟

صرت أحبه






كل الطرق .. عسرة !

أحزن بليا سبب .

تودعني على فالي !

على بـابـك !!

▌ ... صــور شخصيه... ▌

هذه زهور فقط من واحة عبدالله البكر التميمي اتمنى أن تنال رضاكم وترضي ذائقتكم

اختكم

حـــُور !

الله يعطيك العافيه على نقل القائد الرائعه

للشاعر المميز عبدالله البكر

تقبل تحياتي

إقتباس:
أرسل أصلا بواسطة إبراهيم صبحي العضيله
الله يعطيك العافيه على نقل القائد الرائعه

للشاعر المميز عبدالله البكر

تقبل تحياتي



الاستاذ .. ابراهيم العضيله
مرورك وقراءتك لما طرحت شرف لي
دمت بكل الخير

حــُور !