فستان لكل مناسبة؛؛

فستان لكل مناسبة؛؛ يا إخوان.. الإنسان اللي الله منعم عليه بنعمة العقل يروح يسجد لله شكر ويحمد ربه؛ لأنه بهالزمان الأقشر صعب عليك تمسك مخك وكل الدنيا مصرقعة وبدون مخ، يا كثر ما تشوف عندنا شغلات ما تخش المخ، تصرفات ما لها تفسير، ومن هالاشياء اللي تبط الكبد ومحتاجة عالم رياضيات عشان يحلها سالفة حريمنا مع الفساتين، الزوج يجبر نفسه ويحاول يقتنع أن زوجته لازم تلبس زيها زي الحريم الثانيات، والحرمة لا عطيتها ريق حلو يمكن تخليك تشتري أسواق الفيصلية كاملة لو ترجع مديون عشرين مليون، وإذا قلت لها يا زوجتي خربتي بيتي صرت مديون بعشرين مليون تقول لك: ليه هو أنا ما أستاهل وش ينقصني عن بنات الناس وبعدين شد حيلك وافتح مؤسسة وطلع كم عامل على كفالتك زي غيرك، في سنتين زمان تصير رابح فوق العشرين مليون، يا عالم مين قال إن الحرمة عيب تلبس الفستان مرتين؟ نفسي أعرف منهو بس؟ يعني واحد مسكين عند قرايبه اربع مناسبات زواج في هالصيف، خلاص يروح فيها ويشوف أقرب مسجد يجلس على بابه يشحذ، وش اكثر من هالبذخ والبطر في النعمة؟! فستان مكلف شي وشويات ما تلبسه الحرمه الا مرة بحياتها، يعني الازواج محتاجين يكونون رجال أعمال عشان يقدرون يصرفون على بيوتهم، الحريم عندنا يشتكون من كثرة العنوسة والطلاق وهم ما هم دارين ان تصرفاتهم اللي يشوفونها الناس كرهتهم بالزواج وسنينه! السؤال الحين : تشوفون لما الوحده تشتري فستان كل مناسبة شي طبيعي ولا تبدير ؟؟؟؟

سناء ,محمد الغنامي ,ملكة الرواسي معجبون بهذا

مهوره
يعطيك العافيه ع الموضىع القيم
من جد انا ضد سالفة ان الوحده ماتلبس الفستان مره ثانيه
لانه مو معقوله كل مناسبه فستان من وين تتوفر الميزانيه الخاصه بالفساتين
الا في حال ان المناسبه تكًون من العائله صح لازم فستان جديد اما مناسبات الاصدقاء
يكفيني اي شي في الكبت اطلعه والبسه والحمد لله مارح ينقص من قيمتي ولا قدري عند الناس
ومشكوره مهوره وبنشوف راي البنوتات في الموضوع
وردة فعل الرجال من هذه التصرفات
تحياتي لك
النجلاء

انا ضد هذا الشيء بصرااااحه وانتقد البنات اللي كذا
احسه شيء مبالغ فيه مرررررررره كل مناسبه فستااان
انا بصراحه اتكلم عن نفسي ما احب المبالغه في هذا الشيء والبس الموجود
وكل اللي موجود عندي خمسة فتسااااين فقط هههههههه ويازينهم اروح فيهم المناسبات وعادي وعلى قول نجوله ماينقص من قيمتي ولا قدري
روعه مهوره طرحك حماس النقاش مره هههههههههه
يعطيك العافية غلاي

يعطيك العافيه مهوره
موضوع 
بجد يستاهل المناقشه

اهم شي يكون الفستان عاجبني
عادي البسه ولو مية مرة (:

وللمعلومية كل ما كان الفستان انيق ومرتب
ومو غالي تحبينه وتكررين لبسه

لكن الشي الغالي والمكلف تكرهينه ):

وانا بطبعي احب اضيف لمساتي وتعديلاتي
اسوي اعادة تدوير لبعض الفساتين ههههههههه
ههههههههههههه

لكن اذا المناسبة لحد يقرب لي
اكييييييييييد لازم فستان جديد

ومثل ما قالوا البنات
ماراح ينقص من قيمتي وقدري

لاهنتي على الموضوع الرائع والطرح القيم

يعطيكِ العافيه مهره

الصراحه انا اشوف انه تبذير
ولاهو معقول ان كل مناسبه فستان


مهرة يام
لاهنتي على الطرح

مشكووره مهووره على الموضوع الرائع والجميل

وانا ضد فستان لكل مناسبه وهذا من التبذير والاسراف

اللي نهى الله عنه

إِنَّ الْمُبَذِّرِينَ كَانُوا إِخْوَانَ الشَّيَاطِينِ ۖ وَكَانَ الشَّيْطَانُ لِرَبِّهِ كَفُورًا


وبالنسبه لي عادي اكرر الفستان خاصه لما يكون حلوو وأنيق ومكلفني

بس بصراحه ما اكرره عند نفس الناس

يعني البسه مره عند قرايبي مره صديقاتي يعني اكرر في كذا مكان ومناسبه


وبس والله

اكرر شكري مهوره ع الموضوع

ويعطيك العآفيه

السؤال الحين : تشوفون لما الوحده تشتري فستان كل مناسبة شي طبيعي ولا تبدير ؟؟؟؟

أعجبني شرحك وتقديمك للموضوع بصراحة
بالنسبة لسؤالك : كل واحدة ولها ظروفها وطبائع النساء دائما متغيرة و مزاجية
عن نفسي لا اهتم لآراء غيري المهم ان البس ما اراه لائقا بي وان كان عدة مرات
ممكن تغيير في الاكسسوارات ، التسريحة، اشياء صغيرة تكفي لاعطاء لمسة جديدة
يا اختي المفروض اننا نرى ما يناسبنا ودعي غيرك يتحدث سيصمت يوما ما

شكرا