نومك طرب وأنا بنومي هواجيس = ماساهرك بالليل كثر الهمومي
أسهر الا نامت عيون الهداريس = وبالليل أساهر ساهرات النجومي
أوجس بقلبي مثل دق النحاحيس = الله يلوم اللي لمثلي يلومي
أشوف عدلات الليالي مقابيس = ولاحد من الدنيا عظامه سلومي
تضحك وتخفيلك حفي الهناديس = تفطر لها يوم ويوم تصومي
أعمل وتلقى وأفهم العلم بالقيس = دنياك لو زانت تراها نقومي
قالوا جهلت وقلت جهل بلاقيس = الجاهل اللي مايعرف اليمومي
من لايدوس الراي من قبل ماديس = عليه داسوه العيال القرومي
ومن لايقلط شذرة السيف والكيس = تبدي عليه من الليالي ثلومي
ومن لاياخذ الدنيا بميز وتقييس = مثل الذي يسبحر بحر يعومي
القصر مايصلح على غير يأسيس = ومن لاتعلم ماتسر العلومي
واليا توافق مشى ورى السو وأبليس = تدر منه وستر ربك يدومي
كل القلم من كتبنا بالقراطيس = واركابنا من كثر الاذلاج تومي
ولاخير في كثر الحكا والتماليس = هرج بلافعل يجيبه وهومي
والعز فوق معسكرات السواديس = اليا قصدت اللي بالاشيا رحومي
قب تنازا بالنشاما كراديس = والطير في روجاتهن يحومي
بالليل أصالي حاميات المحاميس = والصبح أصالي كل قب قحومي
أربع سنين ودمع عيني أماريس = العين تسهر كن فيها هزومي
واليا ركبت معالجات المضاريس = يبرد على قلبي لهيبه سمومي
صوابنا بالميل عمق اليا قيس = وطريحنا في مثبره مايقومي
ان جن بنا مثل النعام الاماريس = لاخف عقل مع رقاق الحزومي
استلحق اللي يطلبون النواميس = اللي من الاقصين وادنا اللحومي
وان جن بالميدان مثل الدواويس = وتعاقبوا من فوقهن السهومي
عرج باهلهن كنهن القرانيس = على الطريح مصوبراتن كظومي
لومي على اللي ينقلون العبابيس = واهل الفرنج وكل رامي لحومي
وشلفن تركب بالعروق المناسيس = وقحص المهار وكل قب قحومي
واليا سمك عج الرمك بالملابيس = المسعد اللي حظ ربعه يقومي
الشيخ من يعطي الفقارى المفاليس = يبدل الساعة بعز يقومي
والحر ليا دبت عليه النواميس = يشهر وعن دار المذلة يشومي
واليا اكترب من بعض الاشيا نسانيس = اعزموا لابد الفرج بالعزومي
ثوب الشرف لبسه نظيف الملابيس = ينجيك باليام الكرب والزحومي
يجلي صدا قلبي ضبيح المهاريس = لي قام شراب القهاوي يعومي
والدلال فوق النار دايم مجاليس = اكرامه حق علينا لزومي
من صنعة الصبة وخمسة تخاميس = ذرية يعمل بها كل يومي
وبهارهن هيل بليا حواسيس = كيف يعدى للنشاما القرومي
عده لحماي العياد المراويس = ولا الحصان اللي بقينه وهومي
حتى يطب لنا المثل والتوانيس = والكيف طاب لمن يفك القحومي
وصلاة ربي عد رمل الطعاميس = على شفيع الخلق يوم اللمومي
عد البنات وعد ذار الطعاميس = واعداد مايمطر سحاب الغيومي
يازبن كرب فوق مايطرد النوم = حراير يازبن مثل الاهله
مرباعهم مابين ظلم والكموم = ومن السفيف يرمحن الاظله
ملفاك شيخ بالقسا يذبح الكوم = شيخ وشيخان القبايل تدله
تلقى محمد زبن من جاه مضيوم = زبن الذليل اللي مخيف محله
وليا لفيت الشيخ يازبن ملزوم = تعطيه مرسوم في وسطه سجله
وان كان جيت النضو يازبن ماسوم = رد الخبر والنضو يازبن خله
جانا من الشايب مكاتيب وعلوم = حي الكتاب اللي لفا حشمة له
الشايب اللي ينقل الكبر والزوم = باغي لحكمي مير انا عاصي له
الله يغشك يوم غشيتنا اليوم = تقرا الكتاب ولا تهاب المظله
جزاك من عندي من الخيل حثلوم = مثل البرد من مزنة مستهله
ان كان تذكر سابق لك من اليوم = فرس عتيبي ورد شاهد له
انا رمحي باول الخيل ملحوم = والا انت رمحك عند ساره تشله
اديت انا اربع قحص والخامس التوم = بقعود زبن اللي بغي ماحصله
والحرب شب وشبشبه كل شغموم = من شبته ملح الفرنجي عصا له
اعرف ترى من طاح ماهوب مرحوم = اكود من رب الملا شافع له
شافي وجرمان غدوا باول القوم = خلوا امطوعهم وانا شاهد له
خلوا مطوعهم على غوجة التوم = وعزي لمن حط الردي مسند له
وانتم كما حوت على الشط لاهوم = وحنا اخلقنا للواهيم عله
وانتم كما ضلع طويل ومزموم = وحنا خلقنا الله انجوم تهله
وانتم كما طير البحر ذاك ابا الحوم = وطير البحر مايذبحه غير ظله
خط القلم واكتب لنا ياسليمان = اكتب لنا جعلك تطب الجناني
جعلك تطوف البيت مع كل الاركان = وتصلي الجمعة بها دور ثاني
هذا محمد مانبيعه بالاثمان = عبدٍ مطوع شاعرٍ مطرباني
قم كيَـف الطبخه ترى بان لي شان = مشتان في شانٍ وشانٍ عناني
بريَـةٍ من سوق صنعا ونجران = يعبا لها بالهيل والزعفراني
نخسر لها لو كان تغلي بالاثمان = لا هابها خطو الصبيَ الهداني
بصينٍ يبـدَى فيه ذربين الايمان = بكفوف ظفرانٍ قرومٍ ذهاني
ياراكبٍ من فوق سلسات الاقران = فجَ العضود وساسهن من عماني
فجَ العضود فخوذهن تقل بيبان = وساع الزغون موخَـرات الثفاني
ملفاك من يروي شبا مقدم الزان = عيد الركاب اللي بها الحيل واني
شيخٍ نشا بالطيب من روس قحطان = عاداتهم فكَ النشب والعواني
مطلوبكم ياشيخ به زود حقران = والذلَ مايرضي عريب المجاني
لو أن مطلوبك على مثل ماكان = خفَـت مداريجه علينا وهاني
أدرا كلامي عن عـدو وسفهان = لزَازة المجلس وجيه الحصاني
للهرج ميدانٍ وللرمي نيشان = ومفتاح صندوق الضمير اللساني
ياراكبن من فوق بواجة الخلا = من البقل ما بانت مواري فطورها
زعولن من الراكب جزوعن من العصا = خطر على فزاتها قصم كورها
ركابها من ربعنا خابرينه = دليلة الظلما إليا غاب نورها
انص (ابن هادي) ريف هشالة الخلا = ريف الهجافا في ليالي عسورها
في مجلسه تلقى علومن طرايف = وحيل تطاها كل يوم قدورها
قل له طلبنا الصلح منكم ولا حصل = دنياك مايبقى بها الا صبورها
ترى الحرب سقم العين ماهو بـ راحه = تسهر ويقزي نومها عن حجورها
وإليا حربتونا فحنا حريبه = ماحن بشيان قصارن شبورها
تضدوننا بالكثر ، وحنا نضدكم = بأكوان منا ما تجبر كسورها
نقفي وحنا عيننا في حريبنا = نعقب لهم نمرا تعاقب سبورها
ونرد سرحات الخلايع مشايع = كبار القفاير نابيات ظهورها
إما نوافق غرة تـتـفق لنا = والا مقابيـس تقسـم شرورها
يرجا لفزعتنا إليا جاء كميننا = بدهم الفرنج اللي وساعن قرورها
كرامة للي تشوق لحربنا = لو انتحوا عنا بعيدن نزورها
وما أذمكم ياربعنا نعمن بكم = انتم سباع الهيش وحنا نمورها
وانتم كما ضلعن صبور على الشقا = وحنا حرار في مشاذيب قورها
ساعة تجيكم خيلنا عارفينها = معاريض والا معطيتكم نحورها
وساعة تجينا خيلكم عارفينها = نحد السبايا لين تركب وعورها
كم سربتن دهما دهوم نجرها = تحاكوا بها غيابها مع حضورها
إليا نسيتوها عليكم نجرها = تموتون وانتم مانسيتوا حرورها
تصبح مداس الخيل من غب كوننا = تشبع حناديها وباقي نسورها
ماينفع الا الصدق والفعل والنقا = وباقي الحكايا بايهات أمورها
عاداتنا لطم المعادي على النقا = والا العميلة راتعه مانذورها
ان صاح صياح براس الغاره = وغارت على حص الوبر عدوانها
الجيش زرفل والجموع انحازت = عيت على المدب عصت عيانها
وحنا لحقنا فوق قب قرح = كله لعين البل وحلو ألبانها
وش عذرنا من دون حلوات اللبن = لاضيعت بالمعركة حيرانها
لا من عج الخيل ثور دونها = ورمت تواديها بحث اثـفانها
انا على قبن قحوم قارح = خطرن على الحنكان من ذرعانها
إليا تلاقا ذيلها مع راسها = تسمع ضريس ضروسها بعنانها
كن المعارف يوم تنهض راسها = ثليل عذرا كاسي أمتانها
تثلث على رجلن تقول مكسورة = حلية عيدان السلم سيقانها
يا الصانع البيطار واسمع مني = دع بالك المسمار يخطي شانها
الله ياقاها نهار الهيـه = من عين رماي حفظ علمانها
مع سربتن يذهل لميع سيوفها = وقصارها تلوذ في فرسانها
الموت معهم واردن ومصدر = والروح كنه واقفن ديانها
كم واحدن بالقاع يسهج طايح = عليه بيض حرقن اوجانها
ياما طرحنا دونها من فارس = عقب الشجاعه ياكله سرحانها
ترعى بنا العرا ويكبر نيها = وننزح العدوان عن حدانها
وننزل بها في كل وادي مخضر = ترعى وسو الموت عند اركانها
في نجد نرعى مانعلق عاني = بسيوف هندن ماضي برهانها
يشهد لنا وادي الرشا بأفعالنا = وتشهد لنا نجد وحصا ضلعانها
قول بليا فعل عيب واضح = والصدق ما يمحاه طول ازمانها
ساعة تواجهنا بهاك الزبـارا = واثر الحريب مظهرن قد له ايام
جونا كما الدبو علينا مغارا = جرد الايادي فوقهن كل همام
دخانها منقاد والعج ثارا = كن الطلوح البايدة حذف الازلام
راحت بأبن هادي تذب الخبارا = أدميتن تأخذ ورا العدي دوام
ياراكبن من عندنا فوق شقران = يلفي على شيخ نزل بالحضايف
يتلونه العاصم نجوع وسلفان = وطرشن على رعي المخافة زهايف
ياحيسفا يانزلته فوق بـبـان = واليا بغى يندى بذيـك الندايف
قطعاننا مابين كشب وفيحان = مانشتحن لو حضبونا الحفايف
يالله ياللي ماش حالن يكوده = رب لطيف صرف الريح تصريف
ان ترحم اللي وحدوا به جنوده = احد صلح وأحدن تحدر على السيف
حنا اليا كلن تمصلح بقوده = نصلح بقب كنهن الشواحيف
طريحنا سحم الضواري تروده = اليا ركبنا لينات المحاريف
مرباعنا الطيري بطية نفوذه = اصيح للغلبا بروس المشاريف
اهل بلاد موثقين حدوده = واهل مهار يلعبن العجاريف
ماحدة البرقا لشرقي نفوذه = حامينها الغلباء بروس المراهيف
ياواصل مني سعد ويش فوده = من واحد وصف من الحكي تصريف
ماجاب طهطام حصان يقوده = ولا مهرة تبرى لجيش مناكيف
ان خاف قرب جدهم من جدوده = وهم على عامر عصاة مواليف
وليا من ليم عليكم جروده = جاهم مع الوادي جموعه مراديف
يوم الحوية ما أمنتكم عهوده = مسيس رايه جموع مراديف
البارحه بالنوم كنّى موراّ = جا حلم ليل يوم عبّر ولاشيف
اونست هاجوس علىالصدر مراّ = منه الفواد معلّق بالمخاطيف
وابدى كنين الروح داخل وبرّا = من نقض مايفتل وفتل بتكليف
يارازق اللى فى رجاك يتحرّا = من مدّ جودك ياوسيع المحاريف
ان جت من الله ماعدويضرّا = وليا ادبرت قلت دبور المصاريف
مادون ربك واحد لك يسرّا = للرب حكمه بالمعانى وتصريف
قم يامحمد سوّ حلو ومرا = رسم الى جوك النشاما هل الكيف
مع منسف حول المناره يجرّا = واشناق حيل صفوها له ذواريف
واعمل بخير ولا تجازى بشرّا = وارجى الفرج من عند والى المصاريف
واجهد بتقوى الله لدار المقرا = العبد طرقىّ ركابه مناكيف
دنياك لو زانت تراها مغرّا = دنيا خراب ولا عليها تحاسيف
فيها لبيب العقل ما يستغرّا = لو امهلت لابد رحله وتخفيف
اخشع تواضع لا تكبّر تزرّا = ما شفت ميلات الليالى مراديف
ورفيقك الغالى منه لاتبرّا = ادمح خطاه اللى تعبّث عجاريف
يشرب معك صافى وكدر ومرّا = ويرد معك حوض المنايا الى عيف
نوب تذرّى به ونوب يتذرّا = عديل عمرك باليالى الشفاشيف
جر القلم واكتب لنا اللى تورّا = سلام احلى من حليب المشاغيف
منّى لمن تابع هوى كل غرّا = شيخ يروّى بالملاقى شبا السيف
زيزوم غلبا كل يوم تجرّا = واطرافها تاطا الغبا والمشاريف
ذولى يسرّحهن وذولى تسرّا = وذولى مغيرات وذولى مناكيف
والى عدا باللى عدا فيه غرّا = بر بع على قحص المهار المزاغيف
سلاحهم شغل العجم والمجرّا = ودهم الفرنج مفرّقات المواليف
وصلّوا على المختار والصحب طرّا = ماهبت الانسام من رايح الصيف
يا ما حلا ياعبيد في وقت الاسفار = جذب الفراش وشب ضو المناره
مع دلة(ن)تجذا على واهج النار = ونجر(ن) اليا حرك تزايد عباره
النجر دق وجاوبه كل مرار = مالفه الملفوف من دون جاره
وأخير منها ركعتين(ن) بالاسحار = لا طاب نوم اللي حياته خساره
تلقاه في يوم يضيعن الافكار = يوم على المخلوق مطول نهاره
وقم في قصير البيت حشمة ومقدار = لو جار فادمح له ولو به خساره
ترى النبي وصى على الجار لو جار = خذ الحذر ياعبيد عقب النذاره
رافق قوي الدين حفاظ الاسرار = ينفعك في يوم يجي به كراره
ترى الهوي والغي هن شر الاشرار = ومن داس عار الناس داسوا لعاره
جنب ردي الكار مافيه تعبار = مافيه من فعل المناعير شاره
جنب عنه خله لقصاف الاعمار = واحفظ وصاتي يارفيع المناره
واسلم ودم بالخير ياطير غيمار = وصلوا على المختار ماغار غاره
|
|
|
|
..,, تحياااتي ,,........................ . |
|
|
|
|