بديت بالله وانخزا كل شيطان=والوذ به عن جملة الخلق كله
ناصر وابو فارس وناصر وفوزان=مثل الجبال النايفات المطله
عنهم زبنت لخالقي عالي الشان=فيه التجي عن شر ذولا بضله
صاروا عليِّ اخصام ومن اول اخوان=الله عليم وصار بالربع خله
ليش ابلشوا هالعود والعود وجعان=ماخافو الله عن خطا كل عله
قالو نبي هالعود للرمي نيشان=عودٍ بخيص وماعقدنا يحله
مايعلمون اني على الربع سلطان=احوسهم والمخطي ارمي واذله
ومافي يدي بندق وهاجمت بلسان= والكل منهم جاهزه بندقٍ له
والله ما اذم افعول طلقين الايمان=لو كان كلٍ ضايعه شوفةٍ له
مقلطين الحيل وفطاح خرفان=ومقلطين الكيف في وقت حله

بسم الذي لو قال للشي كن كان=جل وعلا محصي حساب الاهله
الواحد اللي كل يومٍ هو بشان=برحمته يغفر لنا كل زله
عالم بما يخفى وداري بما بان=بحكمته يهدي ومن شاء يظله
ومن بعد هذا ياسلايل كحيلان=ليا شرحت الوضع دقه وجله
حرك يابو ناصر على صنع يابان=ماله يباري لامشى غير ضله
حجي خلف منصاك رح له مسيان=راعي هلا حييت بيته تدله
قل له وش اللي صار ياطير حوران=صاحبك وش سوى بنارك تمله
زعلك ابو فارس وناصر وفوزان=ولانيب رابعهم من العام لله
كم مره ارسل لك لشوفتك شفقان=لمجالس اهل الطيب مابه ممله
وجوابك لداعيك يالذيب سفهان= واللي تبيه اتروح له في محله
وابو محمد كفو من غير حقران= بمجلسه براد شاهي ودله
فيضٍ لغيض بصدر ضايق ومشحان=ذا مختصر مافيه ماهوب كله
وختامها عنبر وجوري وريحان =وهلا كما وبل المطر حين هله