هات الورق يالحميدي والقلم هاته=في خاطري كلمتينٍ جات حزتها
يا راكب اللي على بديه ولزقاته=رشة وكالة تايوتا حي رشتها
لكزز تميز عن خوانه بلوحاته=عون اربعه تقصر نفوسٍ تهقوتها
كنه مع السايد الايسر ليا شاته=معواد حربيتن من عقب هجمتها
ما همه الدرب لو طالت مسافاته=توايره تقصر المشوار دورتها
وصل سلام العطاوي مع تحياته=وبيوته اللي هجوس الشعر صفتها
لشاعر اللي عسى الله يرحم امواته=هو مركز النادره فالشعر وسبتها
ما جازلي غير صرف الجزل فبياته=تقول يصرف من الدولار عملتها
هذاك ابن عون عبدلله وعاداته=يرهي على الطيبه ويجيب هامتها
تلقاه في مجلسٍ مدهال لبداته=على عقاب الدلال يدير صبتها
ما يحسب حساب كم وصلت خساراته=يفداه من عود البيبان صكتها
شيخٍ تزيده على الطالات هقواته=يوم ان بعض العرب في حلو نومتها
ثم سلمه ما كتبته والخبر هاته=عن جادلٍ سقم روحي ما تعدتها
اتلا العهد به يوادعني بنضراته=ونا وقفت ارثي بحالي وحالتها
فجت ضلوعي برمح البعد وازماته=تبا تكحل عيون الحب وعمتها
وقفت بعد سلمت قلبي معاناته=وزريت اداوي خفوقي من محبتها
على كثر مرسل المرسول بوصاته=عيت تهياء لبن فراج شوفتها
ونا يابن عود صبري في نهاياته=والعين عيت تذوق النوم سبتها
في عبلةٍ بين ظلم وبين سفواته=حملت عيني ورجلي فوق طاقتها
صدري شمالي لاكن النفس مشماته=تضغط على العين لين تبين عبرتها
واليوم حتى الخلاء ضاقت مساحاته=ولا عاد الي فيه خاطر عقب غيبتها