المساعد الشخصي الرقمي

مشاهدة النسخة كاملة : ((الذيب)) مصافحتي الأولى لرواسي الأدب


عبدالله محمد العصيمي
21-11-2008, 02:20 PM
السلام عليكم ورحمة الله وبركاته
وأسعد الله جميع أوقاتكم بكل خير
في بداية الأمر لايسعني إلا أن اتقدم بالشكر الجزيل للشاعرين

يوسف عبدالله الغنامي
و
خالد الغنامي

على هذه الدعوه الكريمه
كما اتقدم بالشكر الجزيل للجميع على حسن الإستقبال
وأسال الله التوفيق لي ولكم
تحياتي وامتناني
.
.
.
.


((مقدمه))
.
.
.


مايحمل الشلفا قصيرين الايمان=ولايارد الجمه ضعيف الهقاوي
ومن لاكسب فعلٍ به الطيب يافلان=يستر شوارب لحيته بالغطاوي

.
.
.
.

((الذيب))
.
.
.

http://www8.0zz0.com/2008/08/01/23/325762102.gif (http://www.0zz0.com)

الذيب ماهرول عبث والشمس دنّت للمغيب=والشعر حانت حزته والنار من شبابها
وليا ادلهمت ساعة المعنى على الفكر النجيب=نارد مواريد القروم ولانحسب حسابها
من راس شهمٍ لا وقف ماله عن السده طليب=مطلوب راسه جزلةٍ توفي حقوق اصحابها
فعل اليمين اللي على الطالات لايمكن يعيب=طنخ القروم اللي على الشدات يضرس نابها
وكلٍ على وضح النقا يارد على جم القليب=اما سقا له مضميه والا حضر مشرابها
غنيت قافي والعرب غنت طواريق اللبيب=موروث شعرٍ ضمته بصدورها وكتابها
صورة زمانٍ لو مضت ماشطبوها بالصليب=عاشوا زمنها واحتموا مسروجها وركابها
قافٍ على مر الزمن لو طال وقته مايشيب=نقشه على عوج الضلوع اللي تطول أرقابها
من روس قومٍ ماهفت يوم الملاقا والحريب=راس الفتى مايندفن والمرجله ماجابها
العيب مشيٍ بالرداء والحق لايمكن يغيب=والروس يرقى عزها مايرتخي لذنابها
والرجل يحفظ عزته بين الجماعه والغريب=يعرف مداخيل القدم من قبل يطرق بابها
والحلم ميزة عاقلٍ غير الثمينه مايجيب=والصمت هيبه للفتي والناس مايغتابها
والدين وعلوم الوفاء والصبر وحقوق الطنيب= والعز ويدين الكرم للمرجله واحزابها
ودرب الردي لاتتبعه لو كان من دمك قريب=احشم شوارب لحيتك عن لحيته واشنابها
من عاش جاهل ماحيا لو كان حضه مايخيب=الشجره اللي بّلا ثمر تنبت ولا يدرابها

.
.
.
.
وسلامتكم

محمد الروقي
21-11-2008, 02:29 PM
ويش اقول

غير بيض الله وجهك على هالجزاله

جزل جزل الى ابعد الحدود ويشرفنا ويسعدنا انضمام مثلك وشرواك

من الجزلين وسيكون هذا الموقع مخصص بامر الله للجزلين امثالك


صح لسااااااااااانك الى رضاك

مروري وتقديري

محمد القسامي
21-11-2008, 02:36 PM
عبدالله العصيمي
صح لسانك وكلك
وبيض الله وجهك على هالرائعه
للشعر روائع
وللقصيد جزاله
وللطرق عذوبه
وأنت هنا جمعت الجميع بهالقصيده الراقيه والجزله
بيض الله وجهك على هالمصافحه

خالد الغنامي
21-11-2008, 03:51 PM
من راس شهمٍ لا وقف ماله عن السده طليب
مطلوب راسه جزلةٍ توفي حقـوق اصحابهـا

كفو والله يالعصيمي

عز الله انك تبيض الوجة وتجمل....

صح لسانك مدد لا عدد وما فيك حيله...


تقبل مروري واعجابي..

محمد الايداء المورقي
21-11-2008, 03:54 PM
العصيمي اما كذا والا بلاش امن الشعر

اشهد بالله انه نص مليان من اوله لا خره



تقبل مروري وسجل اعجابي في الباذخه

إبراهيم صبحي العضيله
21-11-2008, 04:46 PM
السلام عليكم ورحمة الله وبركاته

صـــــــــــــــــح لسااااااااااااااانك

داهيه جزل الله يعطيك العافيه

نص مليان بكل الحكم

تقبل تحياتي

محمد شراز
21-11-2008, 05:42 PM
عبدالله العصيمي
صح لسانك وكلك
وبيض الله وجهك على هالرائعه
للشعر روائع
وللقصيد جزاله
وللطرق عذوبه
وأنت هنا جمعت الجميع بهالقصيده الراقيه والجزله
بيض الله وجهك على هالمصافحه

يوسف عبدالله الغنامي
21-11-2008, 09:44 PM
صح لسانك وعلا شانك ياجزل

شاعر غني عن التعريف متميز ورائع

لك مني كل الود والتقدير

الجوهره
21-11-2008, 10:10 PM
عبدالله محمد العصيمي

شاعر غني عن التعريف

شاعر مبدع ورائع بكل معنى الكلمه

صح لسانك الى رضاك

وياهلا وغلا والله نورت رواسي نجد بهالطله الجميله

ودام عطاؤك الفيّاض

تحيااتي لك .


الشيهانه

غــادة
22-11-2008, 04:35 AM
صح الله لســــــاانكـ على هذا الايداع

اخي

عبدالله محمد العصيمي

دمت ودام قلمك
يعطيك الف عافية
وتقبل مروري المتواضع

عبدالله محمد العصيمي
01-12-2008, 07:46 PM
صحت ابدانكم جميع

وبيض الله وجيهكم

وشاكر لكم مرورك وتواصلكم

لاهنتوا

تحياتي وتقديري للجميع

أسير الغلآ
01-12-2008, 10:11 PM
صح لسانك قصيدة في قمة الروعه

سعد الشقحاء
04-12-2008, 12:52 AM
صح لسانك
واعتلا شانك
ولا هنت على الابداع

السيــ عمهوج ـف
07-01-2009, 03:32 PM
صح للسانك وعتلا شأنك

قصيدة جزله من رأس جزل