المساعد الشخصي الرقمي

مشاهدة النسخة كاملة : الملك فيصل وابن علوش رحمهما الله


سلطان الدوسري
18-10-2015, 02:21 PM
.
.
في البداية القصة لايصلح سردها إلا بالعامية ..
وإن كان موقعها خاطىء انقلوها للقسم الصحيح مع الشكر ..
.
.
كان الملك فيصل الله يرحمه ووالدي والمسلمين شاعر ومن فطاحلة الشعراء وكان له يوم يجلس
مع الشعراء ويسامرهم الشعر والحديث والقصص وكل مايحدث بالساحة الشعرية , وكان يقدّر
الشعراء والشعر , وكان من ضمن اللي يحضرون مجلسه الشاعر فهد بن علوش وكان هذا عيّار
وكان منولوجست وله اشرطة صوتية مضحكة مثل عبدالعزيز الهزاع والتمامي وغيرهم وكانت
اشرطته متداوله وشعره كذلك , المهم كانت الحالة ضنك وفقر ومهنا رواتب وكانوا الشعراء
يستجدون عطاء الملك فيصل رحمة الله عليه وكان ابن علوش فقران وحالته حاله وكتب قصيدة
يمدح فيها الملك فيصل يبي كوده يعطيه 150 ريال والا 200 يعتاش فيها هو وعياله والناس
كلها فقرانه ذاك الوقت , المهم اجتمعوا الشعراء بالمجلس وجاء الملك فيصل كالعادة وسلموا
عليه وقعدوا وبدت السوالف وبدا الملك ينشد عن احوالهم وياخذ منهم بعض القصص والاحداث
اللي صارت في هاليومين وينشد كل شاعر : عطنا اللي عندك يافلان .. وكلٍ يقول قصيدته
او سالفته وهكذا , طبعا الملك فيصل يعرف عيارة ابن علوش وسرعة بديهته ونوى الملك
يحرث ابن علوش وقال له : هاه يابن علوش سمعنا قصيد , قال ابن علوش ابشر ياطويل العمر ..
وكان ابن علوش كاتبها على ورقة 25 بيت يمدح فيها الملك ويشكي الحال ويبي عطيّه
المهم سرد القصيدة ابن علوش لين قضت وهو يطوي الورقة ويعطيها الملك , اخذها الملك
بيده ومدّها للي وراه من الخويا وهو يقول لابن علوش مرّنا باكر ومالك الا طيبة الخاطر ..
المهم جاء باكر وجاء ابن علوش والمجلس مليان وجاء الملك فيصل واخذ مكانه وكالعادة
ينشد عن امورهم واحوالهم ثم مد يده للي وراه من الخويا واخذ ورقة مطوية وناظر ابن علوش
وهو يعرف عيارته وسرعة بديهته ويبي يطلعها عشان يضحكون قال له : يابن علوش
انت عطيتنا 25 بيت وهذي 50 بيت رد عليها .. وهو ينقز ابن علوش مكانه وياقف ويقول :
ياطويل العمر ماخبرتك تاكل حرام وقصيد بقصيد ربا مايجوز !!
والملك فيصل يحط شماغه على فمه ويضحك ويضحكون الجالسين كلهم ثم قال الملك للي
وراه : عطوا ابن علوش واكرموه واقضوا حاجته .
تمّت
وسلامتكم

النجلاء
18-10-2015, 05:28 PM
الله يرحم الملك فيصل واموات المسلمين ان شاء الله
سلطان
يعطيك العافيه على القصه الرائعه
تقديري لك
النجلاء

محمد الغنامي
18-10-2015, 08:23 PM
سلطان الدوسري
سلمت ولاهنتي طال عمرك
قصه رائعه فعلا ومعروف المللك فيصل رحمه الله واموات المسلمين
انه شاعر فحل ويحب القلطه بشكل غير طبيعي
سجل مروري وتقديري
لاهنت

محمد الروقي
18-10-2015, 09:41 PM
من الغريب اتفاق قصتين

صارت على فاضي ابن ساير الغنامي الشاعر المعروف
وبعد ان قال قصيدته للامير فيصل في مكه قاله تعال بكره ,’, ويوم جاه فاضي الغتاني
قاله انت عطيتني كم بيت وهذي دبل ونت فاضي ونا مشغول ,’, ضحكو الحضور وطلع فاضي
لقا عمر البحر شاعر واقف برا قال عان بعيرك محمل يافاضي من خير الله ومدة فيصل امير مكه




وسلمت يالدوسري على القصه ويسعد قلبك

مهرة يام
24-10-2015, 06:11 PM
سلطان الدوسري
يعطيك العافيه على القصه الجميله
لاهنت على الطرح
احترامي لك

السيد زيني
25-10-2015, 01:40 AM
مافي اجمل من البساطة بين الحاكم والمحكوم
ونزول الحاكم للجلوس بين الشعب تعبر اكبر تواضع
وهذا ما بعث الحب والولاء للحاكم وارتباط الشعب بالوطن
الحمدلله الذي سخر لبلادنا حكاماً يسهرون على رعايتنا وراحتنا
اللهم ارحم من مات منهم وارزق القوة والعون لكل من يتحمل امرنا

سلمت يمينك على جمال القصة وروعة العبرة فيها